പാറ്റകൾ കാരണം ഗോദ്റേജ് കമ്പനിക്ക് വൻ തിരിച്ചടി; നൽകേണ്ടത് മുക്കാൽ ലക്ഷം രൂപ; അലമാരയുടെ നിർമാണ തകരാറിൽ പിഴ ശിക്ഷ

നിർമ്മാണ തകരാറുള്ള സ്റ്റീൽ അലമാര വിറ്റതിന് പ്രമുഖ ഫർണിച്ചർ ബ്രാൻഡായ ഗോദ്‌റെജ് ഇന്റീരിയോയ്ക്ക് കൊൽക്കത്ത ഉപഭോക്തൃ കോടതി പിഴ വിധിച്ചു. അലമാരയുടെ ഡിസൈനിലെ പിഴവ് കാരണം പ്രാണികൾ കയറുന്നുവെന്ന 68-കാരന്റെ പരാതിയിൽ, കമ്പനി 75,718 രൂപ നഷ്ടപരിഹാരം നൽകാൻ കോടതി ഉത്തരവിട്ടു. ഉൽപ്പന്നത്തിന്റെ വില തിരികെ നൽകാനോ പുതിയത് നൽകാനോ നിർദ്ദേശമുണ്ട്.

കൊൽക്കത്ത: നിർമ്മാണ തകരാറുള്ള സ്റ്റീൽ അലമാര വിറ്റതുമായി ബന്ധപ്പെട്ട കേസിൽ പ്രമുഖ ഫർണിച്ചർ ബ്രാൻഡായ ഗോദ്‌റെജ് ഇന്റീരിയോയ്ക്ക് വൻ പിഴ വിധിച്ച് ഉപഭോക്തൃ കോടതി. അലമാരയുടെ ഡിസൈനിലെ പിഴവ് കാരണം ഉള്ളിലേക്ക് പ്രാണികളും പാറ്റകളും കയറുന്നുവെന്ന 68-കാരന്റെ പരാതിയിലാണ് കൊൽക്കത്ത ജില്ലാ ഉപഭോക്തൃ തർക്ക പരിഹാര കമ്മീഷൻ ഉത്തരവിറക്കിയത്. പരാതിക്കാരന് ആകെ 75,718 രൂപ നഷ്ടപരിഹാരമായി നൽകാൻ കോടതി കമ്പനിയോട് നിർദ്ദേശിച്ചു. പ്രസിഡന്റ് മനോജ് കുമാർ റായ്, അംഗങ്ങളായ അശോക ഗുഹ റോയ് ബേര, ഗോപാൽ ചന്ദ്ര റോയ് എന്നിവരടങ്ങിയ ബെഞ്ചാണ് കേസ് പരിഗണിച്ചത്.

വിലപിടിപ്പുള്ള സാധനങ്ങളും രേഖകളും സൂക്ഷിക്കാൻ വേണ്ടിയാണ് പരാതിക്കാരനായ വൃദ്ധൻ ഗോദ്‌റെജിന്റെ സ്റ്റീൽ അലമാര വാങ്ങിയത്. എന്നാൽ, അലമാരയുടെ വാതിലുകൾക്കിടയിലുള്ള അമിതമായ വിടവ് കാരണം ഉള്ളിലേക്ക് പ്രാണികളും പാറ്റകളും കയറുകയും സാധനങ്ങൾ നശിപ്പിക്കുകയും ചെയ്തു. അലമാരയുടെ ഈ ഡിസൈൻ പിഴവിനെക്കുറിച്ച് ഉപഭോക്താവ് കമ്പനിയെ അറിയിച്ചെങ്കിലും കൃത്യമായ പരിഹാരം കാണാൻ അവർ തയ്യാറായില്ല. ഇതോടെയാണ് അദ്ദേഹം ഉപഭോക്തൃ കോടതിയെ സമീപിച്ചത്. അലമാരയുടെ വാതിലുകൾക്കിടയിൽ പ്രാണികൾക്ക് കയറാൻ തക്കവണ്ണമുള്ള വലിയ വിടവുകൾ ഉണ്ടെന്ന് തെളിഞ്ഞിട്ടുണ്ടെന്ന് കോടതി ഉത്തരവിൽ പറഞ്ഞു. ഇത് നിർമ്മാണത്തിലെ ഗുരുതരമായ പിഴവാണ്. അതിനാൽ ഉപഭോക്താവിന് അലമാര മാറ്റി നൽകാനോ അല്ലെങ്കിൽ അതിന്റെ പണം തിരികെ നൽകാനോ ബാധ്യതയുണ്ടെന്നും കോടതി ഉത്തരവിൽ വ്യക്തമാക്കി.

അലമാരയുടെ വിലയായി 55,718 രൂപയോ അല്ലെങ്കിൽ പുതിയ അലമാരയോ നൽകണമെന്നാണ് കോടതി ഗോദ്‌റെജിനോട് ഉത്തരവിട്ടത്. മാനസിക ബുദ്ധിമുട്ടുകൾക്ക് നഷ്ടപരിഹാരമായി 10,000 രൂപയും കോടതി ചെലവുകൾക്കായി 10,000 രൂപയും നൽകണം. വലിയ ബ്രാൻഡുകൾ ഉൽപ്പന്നങ്ങൾ നിർമ്മിക്കുമ്പോൾ ഗുണനിലവാരത്തിലും ഡിസൈനിലും പുലർത്തേണ്ട കൃത്യതയെ ഓർമ്മിപ്പിക്കുന്നതാണ് ഈ വിധി.