ബൂട്ട് അഴിച്ചുവെച്ച് പതിറ്റാണ്ട് പിന്നിട്ടിട്ടും താരമായി ബെക്കാം! ലോകകപ്പ് പരസ്യങ്ങളിലൂടെ ഡേവിഡ് ബെക്കാം കൊയ്തത് 239 കോടി രൂപ
Synopsis
ഫുട്ബോളില് നിന്ന് വിരമിച്ച് ഒരു പതിറ്റാണ്ട് കഴിഞ്ഞിട്ടും ഡേവിഡ് ബെക്കാം ബ്രാന്ഡ് മൂല്യത്തില് തരംഗമായി തുടരുന്നു. 2026 ലോകകപ്പ് കാലത്ത് പരസ്യങ്ങളിലൂടെ കോടികള് സമ്പാദിച്ച അദ്ദേഹം, തന്ത്രപരമായ ബിസിനസ്സ് നിക്ഷേപങ്ങളിലൂടെ ശതകോടീശ്വരനായി മാറിയിരിക്കുന്നു. കളിക്കളത്തിലെന്ന പോലെ ബിസിനസ്സിലും ബെക്കാം ഒരു വിജയഗാഥ രചിക്കുകയാണ്.
ഫുട്ബോള് മൈതാനങ്ങളോട് 2013 ല് വിടപറഞ്ഞതാണെങ്കിലും ഡേവിഡ് ബെക്കാം എന്ന പേരിന്റെ തിളക്കത്തിന് ഇന്നും ഒട്ടും കുറവ് വന്നിട്ടില്ല. ഒരു പതിറ്റാണ്ടിലേറെയായി കളി നിര്ത്തിയിട്ടെങ്കിലും, ബ്രാന്ഡുകളെ തന്നിലേക്ക് ആകര്ഷിക്കാനുള്ള ബെക്കാമിന്റെ കഴിവിന് 2026-ലെ ഫിഫ ലോകകപ്പിലും യാതൊരു മങ്ങലുമേറ്റിട്ടില്ല. കോടികളാണ് ഈ ലോകകപ്പ് കാലത്ത് അദ്ദേഹം തന്റെ ബ്രാന്ഡ് മൂല്യത്തിലൂടെ സ്വന്തമാക്കിയത്.
കളിക്കളത്തിലില്ല, എങ്കിലും താരം ബെക്കാം തന്നെ!
2026 ലോകകപ്പിലെ വിവിധ പരസ്യങ്ങളിലൂടെയും പ്രൊമോഷനുകളിലൂടെയും മാത്രമായി ബെക്കാം സ്വന്തമാക്കിയത് 19 മില്യണ് പൗണ്ട് (ഏകദേശം 239 കോടി രൂപ) എന്ന വന് തുകയാണ്. 2013-ന് ശേഷം ഒരു മത്സരത്തില് പോലും പന്തു തട്ടാതിരുന്നിട്ടും, തന്റെ വിപണി മൂല്യം കൃത്യമായി ഉപയോഗിച്ച് ടെലിവിഷന് പരസ്യങ്ങളിലൂടെയും ആഗോള മാര്ക്കറ്റിംഗ് കാമ്പെയ്നുകളിലൂടെയും കോടികള് വാരുകയാണ് ഈ മുന് താരം.
അഡിഡാസ്, പെപ്സി, മക്ഡൊണാള്ഡ്സ്, ലെയ്സ്, സ്റ്റെല്ല ആര്ട്ടോയിസ്, ഹോം ഡിപ്പോ, ബാങ്ക് ഓഫ് അമേരിക്ക, വെറൈസണ് തുടങ്ങി ലോകോത്തര ബ്രാന്ഡുകളാണ് ബെക്കാമിനെ തങ്ങളുടെ പരസ്യങ്ങള്ക്കായി തിരഞ്ഞെടുത്തത്. മാഞ്ചസ്റ്റര് യുണൈറ്റഡ്, റയല് മാഡ്രിഡ്, എല്എ ഗാലക്സി, ഇംഗ്ലണ്ട് ദേശീയ ടീം എന്നിവയ്ക്കായി കളിച്ചിരുന്ന കാലത്തും കളിയിലൂടെ ലഭിക്കുന്ന ശമ്പളത്തേക്കാള് കൂടുതല് പരസ്യ വരുമാനത്തിലൂടെയാണ് ബെക്കാം സ്വന്തമാക്കിയിരുന്നത്.
'ഹൈഡ്രേഷൻ ബ്രേക്കുകള്' സമ്മാനിച്ച കോടികള്
2026 ലോകകപ്പ് മത്സരങ്ങളില് ഫിഫ ഏര്പ്പെടുത്തിയ 'ഹൈഡ്രേഷന് ബ്രേക്കുകള്' പരസ്യ വിപണിക്ക് പുതിയ സാധ്യതകളാണ് തുറന്നു നല്കിയത്. പ്രത്യേകിച്ച് അമേരിക്കന് വിപണിയില് ഇത് വലിയ ചലനമുണ്ടാക്കി. നോര്ത്ത് അമേരിക്കയില് ഏറ്റവും കൂടുതല് ആളുകള് തിരിച്ചറിയുന്ന ഫുട്ബോള് മുഖമായ ബെക്കാം, ഈ ബ്രേക്കുകളില് സംപ്രേഷണം ചെയ്ത എട്ടോളം വന്കിട ബ്രാന്ഡുകളുടെ പരസ്യങ്ങളിലാണ് പ്രത്യക്ഷപ്പെട്ടത്. ഈ മാറ്റം ബെക്കാമിന്റെ വാര്ഷിക പരസ്യ വരുമാനം 25 മില്യണ് യുഎസ് ഡോളറായി ഉയര്ത്തി.
ഫോബ്സ് പട്ടികയിലെ ശതകോടീശ്വരന്
2026-ല് ഡേവിഡ് ബെക്കാം ഒരു ശതകോടീശ്വരനായി മാറിയെന്ന് ഫോബ്സ് സ്ഥിരീകരിച്ചിട്ടുണ്ട്. 1.185 ബില്യണ് പൗണ്ടാണ് അദ്ദേഹത്തിന്റെ ആസ്തി. തന്റെ കായിക ജീവിതത്തിന് ശേഷമുള്ള തന്ത്രപരമായ നിക്ഷേപങ്ങളാണ് ബെക്കാമിനെ ഈ നേട്ടത്തില് എത്തിച്ചത്. ഇന്റര് മിയാമി ക്ലബ്ബിലെ നിക്ഷേപത്തില് നിന്ന് 12 ഇരട്ടി ലാഭമാണ് അദ്ദേഹത്തിന് ലഭിച്ചത്. കൂടാതെ ഓതന്റിക് ബ്രാന്ഡ്സ് ഗ്രൂപ്പുമായുള്ള 250 മില്യണ് ഡോളറിന്റെ ബ്രാന്ഡ് ലൈസന്സിംഗ് കരാറും, ആഗോള കമ്പനികളുമായുള്ള ദീര്ഘകാല പങ്കാളിത്തവും അദ്ദേഹത്തിന്റെ സമ്പത്ത് വര്ദ്ധിപ്പിച്ചു. കളിയിലെ വരുമാനത്തേക്കാള് തന്ത്രപരമായ ബിസിനസ്സ് നിക്ഷേപങ്ങള് ഒരു കായികതാരത്തിന് എങ്ങനെ വലിയ വിജയം നല്കുമെന്നതിന്റെ ഉത്തമ മാതൃകയാണ് ബെക്കാം.