ഡിജിറ്റൽ അറസ്റ്റ് മുതൽ ഡീപ്ഫേക്ക് വീഡിയോ വരെ; 2024ൽ ഇന്ത്യ കണ്ട 5 സാമ്പത്തിക തട്ടിപ്പ് രീതികൾ

തട്ടിപ്പിലൂടെ നഷ്ടമായ മൊത്തം പണം ഏകദേശം എട്ട് മടങ്ങ് വർദ്ധിച്ച് 21367 കോടി രൂപയിലേക്കെത്തി.

2024-ൽ ഇന്ത്യയിൽ സൈബർ തട്ടിപ്പുകൾ  കുത്തനെ ഉയർന്നിട്ടുണ്ട്. സാധാരണ ജനങ്ങൾ മുതൽ കോടീശ്വരന്മാർ വരെ തട്ടിപ്പുകളിൽ വീണു. 2024-25 ആദ്യ പകുതിയിൽ ബാങ്കിംഗ് തട്ടിപ്പുകളുടെ എണ്ണത്തിൽ 27% വർദ്ധനവ് ഉണ്ടായതായി റിസർവ് ബാങ്ക്  പറയുന്നു. മാത്രമല്ല, ഇങ്ങനെ തട്ടിപ്പിലൂടെ നഷ്ടമായ മൊത്തം പണം ഏകദേശം എട്ട് മടങ്ങ് വർദ്ധിച്ച് 21367 കോടി രൂപയിലേക്കെത്തി. ഈ വർഷം ഇന്ത്യയിൽ കൂടുതലും കണ്ടുവരുന്ന 5  സാമ്പത്തിക തട്ടിപ്പുകൾ ഇതാ; 

1. ഡിജിറ്റൽ അറസ്റ്റ് തട്ടിപ്പുകൾ

ഫോൺ കോൾ അല്ലെങ്കിൽ വീഡിയോ കോളുകൾ വഴി ഇരകളെ വിളിച്ച് നിയമപാലകരോ സർക്കാർ ഉദ്യോഗസ്ഥരോ ആയി വേഷമിട്ട് പണം തട്ടുന്നതാണ് ഇത്. ഇര കുറ്റവാളിയാണെന്ന് രീതിയിൽ സംസാരിച്ച് അറസ്റ്റ് ഒഴിവാക്കാൻ പണം കെട്ടിവെക്കണം എന്നാവശ്യപ്പെടുന്നു. 

2. ഓഹരി വ്യാപാര തട്ടിപ്പുകൾ

ഉയർന്ന വരുമാനം വാഗ്ദാനം ചെയ്യുന്ന ചില വ്യാജ പ്ലാറ്റ്‌ഫോമുകൾ നിക്ഷേപകരുടെ താല്പര്യത്തെ മുതലെടുത്ത് നടത്തുന്ന തട്ടിപ്പാണ് ഇത്.  2,28,094 പരാതികൾ ഇത്തരത്തിലുള്ള തട്ടിപ്പുകൾക്കെതിരെ ലഭിച്ചിട്ടുണ്ട്. ഇരകൾക്ക് 4,636 കോടി രൂപയുടെ നഷ്ടമാണ് ഉണ്ടായത് എന്നാണ് റിപ്പോർട്ട്. 

3. ഡീപ്ഫേക്ക് അഴിമതികൾ

ആർട്ടിഫിഷ്യൽ ഇൻ്റലിജൻസിൻ്റെ പുരോഗതിയോടെ, ഉണ്ടായ ഒരു തട്ടിപ്പ് രീതിയാണ് ഇത്. ഉന്നത വ്യക്തികളുടെ പേരിൽ ആൾമാറാട്ടം നടത്തി പണം തട്ടുന്ന രീതിയാണ് ഇത്. ഡീപ് ഫേക്ക് വീഡിയോകൾ യഥാർത്ഥ വീഡിയോയുമായി അടുത്ത് നിൽക്കുന്നതിനാൽ ആളുകൾ പെട്ടന്ന് തെറ്റിദ്ധരിക്കപ്പെടും. ഇത് ഈ രീതിയിലുള്ള തട്ടിപ്പ് കൂടാൻ കാരണമായി. 

4. സിം ക്ലോഷർ തട്ടിപ്പ്

കെവൈസി പ്രശനങ്ങൾ പറഞ്ഞ് സിം കാർഡുകൾ ഉടൻ ഡിആക്ടിവേറ്റ് ചെയ്യുമെന്ന് പറഞ്ഞുകൊണ്ട് ടെലികോം റെഗുലേറ്ററി അതോറിറ്റി ഓഫ് ഇന്ത്യയുടെ പേരിൽ വ്യാജ സന്ദേശങ്ങളോ കോളുകളോ ചെയ്ത് പണം തട്ടുന്ന രീതിയാണ് ഇത്. ഇരകളിൽ നിന്ന് ബാങ്ക് വിവരങ്ങളോ പണമോ ആവശ്യപ്പെടും. ഇതിനെതിരെ ഉപയോക്താക്കൾക്ക് ട്രായ് മുന്നറിയിപ്പ് നൽകിയിട്ടുണ്ട്.

5. ക്യൂആർ കോഡ് അഴിമതികൾ

വ്യാജ ക്യൂആർ കോഡുകൾ നൽകുന്ന തട്ടിപ്പ് രീതിയാണ് ഇത്. വ്യാജ വെബ്‌സൈറ്റുകളിലേക്ക് റീഡയറക്‌ടുചെയ്യാനോ സ്കാനിംഗിൽ അനധികൃത ഇടപാടുകൾ നടത്താനോ ഇതിലൂടെ കഴിയും.