ആദായ നികുതിയിലെ മാറ്റം, നേട്ടം എങ്ങനെ? ബജറ്റിലെ നികുതി ഇളവിനെ കുറിച്ച് ഒരു സമഗ്ര ചിത്രം

പുതിയതും പഴയതുമായ നികുതി വ്യവസ്ഥകള്‍ക്ക് കീഴിലുള്ള ഏറ്റവും പുതിയ ആദായനികുതി നിരക്കുകള്‍, ലഭ്യമായ സ്റ്റാന്‍ഡേര്‍ഡ് ഡിഡക്ഷന്‍, അടിസ്ഥാന ഇളവ് പരിധി, റിബേറ്റ്, കിഴിവുകള്‍ എന്നിവ പരിശോധിക്കാം

ആദായനികുതി റിബേറ്റിലൂടെ നികുതി പരിധി 7 ലക്ഷത്തില്‍ നിന്നും 12 ലക്ഷമാക്കിയതോടെ പുതിയ നികുതി സമ്പ്രദായപ്രകാരം നികുതിയടയ്ക്കുന്ന ഒരു കോടിയിലധികം പേര്‍ക്ക് നേട്ടം ലഭിക്കുമെന്നാണ് കണക്കുകള്‍. പുതിയതും പഴയതുമായ നികുതി വ്യവസ്ഥകള്‍ക്ക് കീഴിലുള്ള ഏറ്റവും പുതിയ ആദായനികുതി നിരക്കുകള്‍, ലഭ്യമായ സ്റ്റാന്‍ഡേര്‍ഡ് ഡിഡക്ഷന്‍, അടിസ്ഥാന ഇളവ് പരിധി, റിബേറ്റ്, കിഴിവുകള്‍ എന്നിവ പരിശോധിക്കാം

ബജറ്റ് പ്രകാരം, പുതിയ നികുതി വ്യവസ്ഥയ്ക്ക് കീഴിലുള്ള അടിസ്ഥാന ഇളവ് പരിധി 3 ലക്ഷം രൂപയില്‍ നിന്ന് 4 ലക്ഷം രൂപയായി ഉയര്‍ത്തിയിട്ടുണ്ട്. അതേ സമയം പഴയ നികുതി സമ്പ്രദായത്തിന് കീഴില്‍ ഇത് 2.5 ലക്ഷം രൂപയായി നിലനിര്‍ത്തി.  60-80 വയസ്സ് പ്രായമുള്ള മുതിര്‍ന്ന പൗരന്മാര്‍ക്ക്, പഴയ നികുതി സമ്പ്രദായത്തിന് കീഴില്‍ അടിസ്ഥാന ഇളവ് പരിധി 3,00,000 രൂപയാണ്. സൂപ്പര്‍ സീനിയര്‍ പൗരന്മാര്‍ക്ക് (80 വയസ്സിനു മുകളില്‍), ഇത് 5,00,000 രൂപയാണ്.

2025 ലെ ബജറ്റ് പ്രകാരം പുതിയ നികുതി വ്യവസ്ഥയ്ക്കും പഴയ വ്യവസ്ഥയ്ക്കും സ്റ്റാന്‍ഡേര്‍ഡ് ഡിഡക്ഷന്‍ പരിധി യഥാക്രമം 75,000 രൂപയും 50,000 രൂപയുമായി മാറ്റമില്ലാതെ നിലനിര്‍ത്തി.

നേട്ടം എങ്ങനെ?

ഒരു വ്യക്തി ഒരു വര്‍ഷത്തില്‍ 12,75,000 രൂപ സമ്പാദിക്കുന്നുവെന്ന് കരുതുക. അതിനാല്‍, പുതിയ വ്യവസ്ഥ പ്രകാരം, 12,75,000 രൂപയുടെ വരുമാനത്തില്‍ നിന്ന് 75,000 രൂപ കുറയ്ക്കും, ബാക്കി തുക (12,00,000 രൂപ) മാത്രമേ നികുതി ചുമത്തുന്നതിനായി പരിഗണിക്കൂ. 50,000 രൂപ സ്റ്റാന്‍ഡേര്‍ഡ് കിഴിവ് ലഭ്യമായ പഴയ വ്യവസ്ഥയിലും ഇങ്ങനെയാണ് നികുതി ചുമത്തുന്നത്.

2025-26 ലെ ബജറ്റില്‍, പുതിയ നികുതി വ്യവസ്ഥ പ്രകാരമുള്ള റിബേറ്റ് 12,00,000 രൂപ വരെയുള്ള മൊത്തം വരുമാന പരിധിക്ക് 60,000 രൂപയായി (മുമ്പ് 25,000 രൂപയില്‍ നിന്ന്) വര്‍ദ്ധിപ്പിച്ചു. പഴയ നികുതി വ്യവസ്ഥയില്‍, 5,00,000 രൂപ വരെയുള്ള മൊത്തം വരുമാനത്തിന് 12,500 രൂപയുടെ റിബേറ്റ് തുടര്‍ന്നും ലഭ്യമാണ്.

നിക്ഷേപങ്ങള്‍ (സെക്ഷന്‍ 80ഇ) അല്ലെങ്കില്‍ ചെലവഴിച്ച തുക (സെക്ഷന്‍ 80ഉ അല്ലെങ്കില്‍ സെക്ഷന്‍ 80ഋ) എന്നിവ വഴി ഒരു നികുതിദായകന് അര്‍ഹതയുള്ള  കിഴിവുകളെയാണ് ആദായ നികുതി കിഴിവുകള്‍ എന്നതുകൊണ്ട് സൂചിപ്പിക്കുന്നത്. പഴയ നികുതി വ്യവസ്ഥയില്‍ മാത്രമേ ഇത് ലഭ്യമാകൂ.

ഉദാഹരണം:

സെക്ഷന്‍ 80സി: പിപിഎഫ്,എല്‍ഐസി,ഇഎല്‍എസ്എസ്  പോലുള്ള നിക്ഷേപങ്ങള്‍ക്ക് 1,50,000 രൂപ വരെ.

സെക്ഷന്‍ 80ഡി: ആരോഗ്യ ഇന്‍ഷുറന്‍സ് പ്രീമിയങ്ങള്‍.

സെക്ഷന്‍ 24(ബി): 2,00,000 രൂപ വരെയുള്ള ഭവനവായ്പയുടെ പലിശ.

എച്ച്ആര്‍എ,എല്‍ടിഎ പോലുള്ള മറ്റ് ഇളവുകള്‍.

2025-26 സാമ്പത്തിക വര്‍ഷത്തേക്കുള്ള  ആദായനികുതി സ്ലാബുകള്‍

പുതിയ നികുതി സമ്പ്രദായത്തിന് കീഴില്‍, കേന്ദ്ര ബജറ്റില്‍ പ്രഖ്യാപിച്ച ആദായനികുതി സ്ലാബുകള്‍ ഇവയാണ്:

4,00,000 രൂപ വരെയുള്ള വരുമാനം: ഇല്ല
4,00,001 രൂപ മുതല്‍ 8,00,000 രൂപ വരെയുള്ള വരുമാനം: 5%
8,00,001 രൂപ മുതല്‍ 12,00,000 രൂപ വരെയുള്ള വരുമാനം: 10%
12,00,001 രൂപ മുതല്‍ 16,00,000 രൂപ വരെയുള്ള വരുമാനം: 15%
16,00,001 രൂപ മുതല്‍ 20,00,000 രൂപ വരെയുള്ള വരുമാനം: 20%
20,00,000 രൂപ മുതല്‍ 24,00,000 രൂപ വരെയുള്ള വരുമാനം: 25%
രൂപയ്ക്ക് മുകളിലുള്ള വരുമാനം 24,00,000: 30%.

പഴയ നികുതി വ്യവസ്ഥയ്ക്ക് കീഴിലുള്ള നികുതി നിരക്കുകള്‍

2,50,000 രൂപ വരെയുള്ള വരുമാനം: ഇല്ല
2,50,001 രൂപ മുതല്‍ 5,00,000 രൂപ വരെയുള്ള വരുമാനം: 5%
5,00,001 രൂപ മുതല്‍ 10,00,000 രൂപ വരെയുള്ള വരുമാനം: 20%
10,00,000 രൂപയ്ക്ക് മുകളിലുള്ള വരുമാനം: 30%

60-80 വയസ്സ് പ്രായമുള്ള മുതിര്‍ന്ന പൗരന്മാര്‍ക്ക്, അടിസ്ഥാന ഇളവ് പരിധി 3,00,000 രൂപയാണ്. 80 വയസ്സിനു മുകളിലുള്ള സൂപ്പര്‍ സീനിയര്‍ സിറ്റിസണ്‍സിന് ഇത് 5 ലക്ഷം രൂപയാണ്.

 ബജറ്റില്‍ പ്രഖ്യാപിച്ച ആദായനികുതി മാറ്റങ്ങള്‍ ഈ വര്‍ഷം ഏപ്രില്‍ 1 മുതല്‍ പ്രാബല്യത്തില്‍ വരും. പുതിയ നികുതി വ്യവസ്ഥയില്‍ മാറ്റങ്ങള്‍ വരുത്തിയിട്ടുണ്ടെങ്കിലും, പഴയ നികുതി വ്യവസ്ഥ അതേപടി തുടരുന്നു. അതിനാല്‍, 2024-25 സാമ്പത്തിക വര്‍ഷത്തിനും 2025-26 സാമ്പത്തിക വര്‍ഷത്തിനും പഴയ നികുതി വ്യവസ്ഥ സ്ലാബുകള്‍ ഒന്നുതന്നെയാണ്.