'കോടി കോടി പ്രണാമം, ജിയോയ്ക്ക് കൃത്യമായ ലക്ഷ്യബോധം നൽകിയത് പ്രധാനമന്ത്രി'; മോദിക്ക് നന്ദി പറഞ്ഞ് അനന്ത് അംബാനി

ജിയോ പ്ലാറ്റ്‌ഫോംസിന്റെ ഐപിഒ ലിസ്റ്റിംഗ് ചടങ്ങിൽ പ്രധാനമന്ത്രിയുടെ ഡിജിറ്റൽ ഇന്ത്യ കാഴ്ചപ്പാടിന് നന്ദി പറഞ്ഞ് അനന്ത് അംബാനി. ഓഹരി വിപണിയിൽ മികച്ച മുന്നേറ്റത്തോടെ ലിസ്റ്റ് ചെയ്ത ജിയോ, ഇന്ത്യയിലെ ഏറ്റവും മൂല്യമുള്ള രണ്ടാമത്തെ കമ്പനിയായി മാറി.

മുംബൈ: റിലയൻസ് ഇൻഡസ്ട്രീസിന്റെ ടെലികോം- ഡിജിറ്റൽ വിഭാഗമായ ജിയോ പ്ലാറ്റ്‌ഫോംസിന്റെ ഓഹരി വിപണിയിലെ തിളക്കമാർന്ന ഐപിഒ ലിസ്റ്റിംഗ് ചടങ്ങിൽ പ്രധാനമന്ത്രി നരേന്ദ്ര മോദിക്ക് നന്ദി അറിയിച്ച് കമ്പനി ഡയറക്ടർ അനന്ത് അംബാനി. പ്രധാനമന്ത്രിയുടെ 'ഡിജിറ്റൽ ഇന്ത്യ' എന്ന കാഴ്ചപ്പാടാണ് ജിയോയ്ക്ക് കൃത്യമായ ലക്ഷ്യബോധം നൽകിയതെന്ന് അദ്ദേഹം പറഞ്ഞു. കൂടാതെ കമ്പനിയെ വിശ്വസിച്ച് കൂടെ നിന്ന കോടിക്കണക്കിന് വരുന്ന ഉപഭോക്താക്കൾക്കും ജീവനക്കാർക്കും ബിസിനസ് പങ്കാളികൾക്കും അദ്ദേഹം നന്ദി രേഖപ്പെടുത്തി.

ഇന്നത്തെ ദിവസം എന്നെ സംബന്ധിച്ചിടത്തോളം ഏറ്റവും പ്രധാനപ്പെട്ട ഒരേയൊരു വാക്ക് നന്ദി എന്ന് മാത്രമാണ്. വിപണിയിലെ ലിസ്റ്റിംഗ് ബെല്ലിന്റെ ശബ്ദം ഒരു അമ്പലമണി കേൾക്കുന്നത് പോലെയാണ് എനിക്ക് അനുഭവപ്പെടുന്നത്. ബിസിനസ് എന്നത് തങ്ങൾക്ക് പൂജയാണെന്നും പൂജ കഴിയുമ്പോൾ പ്രസാദം നൽകുന്നതുപോലെ ജിയോ ഇന്ന് ഇന്ത്യയിലെ ജനങ്ങളിലേക്ക് ഷെയർ ചെയ്യപ്പെടുകയാണെന്നും അനന്ത് അംബാനി പറഞ്ഞു.

'വികസിത് ഭാരത്' (വികസിത ഭാരതം) എന്ന ലക്ഷ്യം കൈവരിക്കാൻ റിലയൻസ് എപ്പോഴും മുന്നിലുണ്ടാകുമെന്നും അദ്ദേഹം കൂട്ടിച്ചേർത്തു. തന്റെ അച്ഛനായ മുകേഷ് അംബാനിയും മുത്തച്ഛൻ ധീരുഭായ് അംബാനിയും കണ്ട സ്വപ്നങ്ങളാണ് ഇന്നിവിടെ എത്തിനിൽക്കുന്നതെന്നും, സഹോദരങ്ങളായ ആകാശിനും ഇഷയ്ക്കുമൊപ്പം ഈ ഉത്തരവാദിത്തം തങ്ങൾ ഏറ്റെടുക്കുന്നുവെന്നും അനന്ത് അംബാനി പറഞ്ഞു.

ഓഹരി വിപണിയിൽ വൻ മുന്നേറ്റം

ചടങ്ങിന് പിന്നാലെ ബിഎസ്ഇ, എൻഎസ്ഇ ഓഹരി വിപണികളിൽ മികച്ച മുന്നേറ്റത്തോടെ ജിയോ പ്ലാറ്റ്‌ഫോംസ് ലിസ്റ്റ് ചെയ്തു. ഇഷ്യൂ വിലയായ 1,119 രൂപയേക്കാൾ 21.36 ശതമാനം നേട്ടത്തിൽ 1,358 രൂപയിലാണ് ഓഹരികൾ വ്യാപാരം തുടങ്ങിയത്. ലിസ്റ്റിംഗോടെ കമ്പനിയുടെ വിപണി മൂല്യം ഏകദേശം 12.5 ലക്ഷം കോടി രൂപയിലെത്തി. ഇതോടെ മാതൃ കമ്പനിയായ റിലയൻസ് ഇൻഡസ്ട്രീസ് കഴിഞ്ഞാൽ ഇന്ത്യയിലെ ഏറ്റവും മൂല്യമുള്ള രണ്ടാമത്തെ കമ്പനിയായി ജിയോ മാറി. 30,200 കോടി രൂപ സമാഹരിക്കാനായി നടത്തിയ ഐ.പി.ഒ 22.19 മടങ്ങാണ് സബ്‌സ്‌ക്രൈബ് ചെയ്യപ്പെട്ടത്. നിലവിൽ മെറ്റ (Meta), ആൽഫബെറ്റ് (Google) തുടങ്ങിയ വമ്പൻ ആഗോള കമ്പനികൾക്ക് നിക്ഷേപമുള്ള ജിയോ പ്ലാറ്റ്‌ഫോംസിന് 53 കോടിയിലധികം ഉപഭോക്താക്കളുണ്ട്.