ഓണക്കിറ്റുകളും ​ഗിഫ്റ്റ് കാ‌‍‌‍ർ‍ഡുകളും! ഓണക്കാലത്തേക്ക് സപ്ലൈകോ റെ‍ഡി, ഓഫറുകൾ ഇങ്ങനെ

ഓണത്തോടനുബന്ധിച്ച് സപ്ലൈകോ വിവിധ തരം ഓണക്കിറ്റുകൾ വിപണിയിലിറക്കി. 1000 രൂപയുടെ അത്തം കിറ്റ് മുതൽ 2000 രൂപയുടെ പ്രീമിയം തിരുവോണം കിറ്റ് വരെ കുറഞ്ഞ വിലയിൽ ലഭ്യമാണ്. കിറ്റുകൾക്ക് പുറമെ ഗിഫ്റ്റ് കാർഡുകളും സമ്മാനക്കൂപ്പണുകളും സപ്ലൈകോ നൽകുന്നുണ്ട്.

ഓണമിങ്ങെത്തി...എല്ലാവരും ഓണക്കോടി എടുക്കുന്നതിന്റെയും ഓണസദ്യ തയ്യാറാക്കാനുള്ള സാധനങ്ങൾ വാങ്ങുന്നതിന്റെയുമൊക്കെ തിരക്കിലാണ്. എന്നാൽ, ഓണസദ്യക്ക് ആവശ്യമായ വസ്തുക്കളും ബ്രാന്‍ഡഡ് ഉത്പന്നങ്ങളും ആയി ഓണക്കിറ്റുമായി സപ്ലൈകോയും റെഡിയാണ്. ഓണക്കിറ്റ് കൂടാതെ 1,000 രൂപയ്ക്കുള്ള അത്തം ഓണസമ്മാനക്കിറ്റും സപ്ലൈകോ നൽകുന്നു. അരി, വെളിച്ചെണ്ണ, പഞ്ചസാര, ശബരി മസാലകള്‍ തുടങ്ങി 21 ഇനങ്ങളുള്ള കിറ്റ് സപ്ലൈകോ വില്‍പന ശാലകളില്‍ ലഭ്യമാണ്. ഓണസദ്യക്ക് ആവശ്യമായ വസ്തുക്കളും ബ്രാന്‍ഡഡ് ഉത്പന്നങ്ങളും ഉള്‍പ്പെടുത്തി പ്രത്യേക ഗിഫ്റ്റ് കിറ്റുകളും സപ്ലൈകോ പുറത്തിറക്കുന്നുണ്ട്.

25 ഇനങ്ങളുള്ള ഉത്രാടംകിറ്റ് 1500 രൂപയ്ക്കും, 30 ഇനങ്ങളുള്ള പ്രീമിയം തിരുവോണം കിറ്റ് 2000 രൂപയ്ക്കും നല്‍കും. 1880 രൂപ വിപണി വില വരുന്ന കിറ്റാണ് സപ്ലൈകോയില്‍ 1500 രൂപയ്ക്ക് ലഭിക്കുന്നത്. അതേസമയം 2540 രൂപയുടെ സാധനങ്ങളാണ് 2000 രൂപയ്ക്ക് തിരുവോണം കിറ്റില്‍ ലഭിക്കുക. പുട്ടുപൊടി, സേമിയ, പായസക്കൂട്ട്, മുളകുപൊടി, മഞ്ഞള്‍പ്പൊടി തുടങ്ങി ഒന്‍പതു പ്രീമിയം ശബരി ഉത്പന്നങ്ങളുമായി 299 രൂപയ്ക്ക് ശബരി സിഗ്‌നേച്ചര്‍ കിറ്റും വില്‍പ്പനയ്‌ക്കെത്തും.

ഓണക്കിറ്റുകള്‍ക്ക് പുറമെ നിരവധി സമ്മാനങ്ങളും ബോണസുകളും സപ്ലൈകോ നല്‍കുന്നുണ്ട്. 500, 1000 രൂപ വീതം മൂല്യമുള്ള സപ്ലൈകോ ഓണം ഗിഫ്റ്റ് കാര്‍ഡ് ഉപയോഗിച്ച് സപ്ലൈകോ ഔട്ട്‌ലെറ്റില്‍നിന്ന് ആവശ്യമായ ഉത്പന്നം വാങ്ങാം. അതിന്റെ കൂടെ സമ്മാനക്കൂപ്പണുകളും ഉണ്ട് കേട്ടോ. ഗിഫ്റ്റ് കൂപ്പണും വലിയ ഓഫറുകളുമായി വിപണി കീഴടക്കാനാണ് സപ്ലൈകോ ലക്ഷ്യമിടുന്നത്. സപ്ലൈകോ സ്റ്റോറുകൾ കിറ്റ് വിതരണവുമായി പൂർണമായി തയ്യാറെടുക്കുന്നതോടെ ഈ വർഷത്തെ ഓണച്ചന്ത സജീവമാകും.