വറുതിയിലായി വിസ്‌കി വിപണി: സ്‌കോച്ച് വിസ്‌കിയുടെ 'കയ്‌പ്പേറിയ' കാലം, ഇനി പ്രതീക്ഷ ഇന്ത്യയില്‍

അമേരിക്കയും ചൈനയും ഉള്‍പ്പെടെയുള്ള പ്രമുഖ വിപണികളില്‍ വില്‍പ്പന കുറഞ്ഞതോടെ പല വമ്പന്‍ ഡിസ്റ്റിലറികളും പ്രവര്‍ത്തനം താല്‍ക്കാലികമായി നിര്‍ത്തിവെച്ചിരിക്കുകയാണ്.

ലോകമെമ്പാടുമുള്ള മദ്യപ്രേമികളുടെ പ്രിയപ്പെട്ട 'സ്‌കോച്ച് വിസ്‌കി' കടുത്ത പ്രതിസന്ധിയിലേക്ക്. ആഗോള വിപണിയിലെ തിരിച്ചടികളും പ്രധാന രാജ്യങ്ങള്‍ ഏര്‍പ്പെടുത്തിയ അധിക നികുതികളും കാരണം സ്‌കോച്ച് വിസ്‌കിയുടെ ഉല്‍പ്പാദനത്തില്‍ വലിയ ഇടിവാണ് രേഖപ്പെടുത്തുന്നത്. അമേരിക്കയും ചൈനയും ഉള്‍പ്പെടെയുള്ള പ്രമുഖ വിപണികളില്‍ വില്‍പ്പന കുറഞ്ഞതോടെ പല വമ്പന്‍ ഡിസ്റ്റിലറികളും പ്രവര്‍ത്തനം താല്‍ക്കാലികമായി നിര്‍ത്തിവെച്ചിരിക്കുകയാണ്.

അമേരിക്കന്‍ നികുതി വില്ലനായി

സ്‌കോച്ച് വിസ്‌കിയുടെ ഏറ്റവും വലിയ വിപണിയായ അമേരിക്കയില്‍ ഇറക്കുമതി തീരുവ വര്‍ദ്ധിപ്പിച്ചതാണ് തിരിച്ചടിയുടെ പ്രധാന കാരണം. ട്രംപ് ഭരണകൂടം ഏര്‍പ്പെടുത്തിയ 10 ശതമാനം നികുതി നിലവില്‍ വിപണിയെ ബാധിച്ചിട്ടുണ്ട്. വരും വര്‍ഷങ്ങളില്‍ സിംഗിള്‍ മാള്‍ട്ട് വിസ്‌കികള്‍ക്ക് 25 ശതമാനം വരെ അധിക നികുതി ഏര്‍പ്പെടുത്താന്‍ സാധ്യതയുള്ളത് വ്യവസായത്തെ കൂടുതല്‍ ആശങ്കയിലാക്കുന്നു.

വിപണിയിലെ കണക്കുകള്‍ ഇങ്ങനെ:

വിസ്‌കി വിപണിയിലെ നിലവിലെ തകര്‍ച്ച വ്യക്തമാക്കുന്ന ചില പ്രധാന വിവരങ്ങള്‍ താഴെ പറയുന്നവയാണ്:

ചൈനയിലെ തകര്‍ച്ച: കഴിഞ്ഞ വര്‍ഷം ചൈനയിലേക്കുള്ള വിസ്‌കി കയറ്റുമതിയില്‍ 31 ശതമാനത്തിന്റെ ഇടിവുണ്ടായി. ഇതോടെ ലോകത്തെ അഞ്ചാമത്തെ വലിയ വിപണിയായിരുന്ന ചൈന പത്താം സ്ഥാനത്തേക്ക് പിന്തള്ളപ്പെട്ടു.

കയറ്റുമതി മൂല്യം: ഈ വര്‍ഷത്തിന്റെ ആദ്യ പകുതിയില്‍ കയറ്റുമതി മൂല്യത്തില്‍ ഒരു ശതമാനം വര്‍ധനവുണ്ടായെങ്കിലും (250 കോടി പൗണ്ട്), വിറ്റഴിക്കപ്പെട്ട അളവില്‍ 4 ശതമാനത്തോളം കുറവുണ്ടായി.

ബാര്‍ലി ഡിമാന്‍ഡ്: വിസ്‌കി നിര്‍മ്മാണത്തിനാവശ്യമായ മാള്‍ട്ടഡ് ബാര്‍ലിയുടെ ഡിമാന്‍ഡ് 10 ലക്ഷം ടണ്ണില്‍ നിന്ന് 6 ലക്ഷം ടണ്ണിലേക്ക് താഴ്ന്നു.

ബാര്‍ലി വില: ഒരു ടണ്‍ ബാര്‍ലി ഉത്പാദിപ്പിക്കാന്‍ 200 പൗണ്ട് ചെലവ് വരുമ്പോള്‍, വിപണിയില്‍ ഇപ്പോള്‍ ലഭിക്കുന്നത് വെറും 160 പൗണ്ട് മാത്രമാണ്.

ലോകത്തിലെ ഏറ്റവും പ്രശസ്തമായ വിസ്‌കി കേന്ദ്രമാണ് സ്‌കോട്ട്‌ലന്‍ഡ്. ഇവിടെ ഉല്‍പ്പാദിപ്പിക്കുന്ന വിസ്‌കിയെയാണ് 'സ്‌കോച്ച്' എന്ന് വിളിക്കുന്നത്. ഒരു വിസ്‌കിയെ സ്‌കോച്ച് എന്ന് വിളിക്കണമെങ്കില്‍ അത് സ്‌കോട്ട്‌ലന്‍ഡില്‍ തന്നെ നിര്‍മ്മിച്ച് കുറഞ്ഞത് മൂന്ന് വര്‍ഷമെങ്കിലും അവിടെ സൂക്ഷിച്ചു വെക്കണമെന്നത് നിര്‍ബന്ധമാണ്. ബാര്‍ലി മുളപ്പിച്ചുണ്ടാക്കുന്ന 'മാള്‍ട്ട്' ആണ് ഇതിലെ പ്രധാന ചേരുവ.

പൂട്ടുവീഴുന്ന ഡിസ്റ്റിലറികള്‍

ലോകത്തെ പ്രമുഖ വിസ്‌കി ബ്രാന്‍ഡായ 'ഡയാജിയോ' തങ്ങളുടെ ചില യൂണിറ്റുകളുടെ പ്രവര്‍ത്തനം നിര്‍ത്തിവെച്ചു. റോസ് ഐലിലെ മാള്‍ട്ടിങ് പ്ലാന്റ് അടുത്ത ജൂണ്‍ വരെ പ്രവര്‍ത്തിക്കില്ല. പ്രശസ്ത ബ്രാന്‍ഡുകളായ ഗ്ലെന്‍മോറാഞ്ചി, ആര്‍ഡ്ബെഗ് എന്നിവരും ഉല്‍പ്പാദനം വെട്ടിക്കുറച്ചിരിക്കുകയാണ്. ഉല്‍പ്പാദനം അമിതമായാല്‍ വിപണിയില്‍ വിസ്‌കിയുടെ വില കുറയുമെന്ന ഭയവും കമ്പനികള്‍ക്കുണ്ട്.

കര്‍ഷകര്‍ പ്രതിസന്ധിയില്‍

വിസ്‌കി നിര്‍മ്മാണത്തിന് ബാര്‍ലി നല്‍കുന്ന കര്‍ഷകരെയാണ് ഈ പ്രതിസന്ധി ഏറ്റവും കൂടുതല്‍ ബാധിച്ചത്. ഡിസ്റ്റിലറികള്‍ ബാര്‍ലി എടുക്കുന്നത് കുറച്ചതോടെ സ്‌കോട്ട്‌ലന്‍ഡിലെ കര്‍ഷകര്‍ മറ്റ് കൃഷികളിലേക്ക് തിരിയുകയാണ്. പലര്‍ക്കും അടുത്ത വര്‍ഷത്തെ വിളവെടുപ്പിനായി കരാറുകള്‍ ലഭിച്ചിട്ടില്ല. സ്‌കോട്ട്‌ലന്‍ഡിലെ ഈസ്റ്റ് ലോധിയനിലുള്ള ഒരു പ്രമുഖ മാള്‍ട്ടിങ് പ്ലാന്റ് സ്ഥിരമായി അടച്ചുപൂട്ടാന്‍ തീരുമാനിച്ചത് നിരവധി പേരുടെ തൊഴില്‍ നഷ്ടപ്പെടാനും കാരണമായി.

ഇന്ത്യയില്‍ പ്രതീക്ഷയുടെ നാളം

ആഗോളതലത്തില്‍ വിപണി മന്ദഗതിയിലാണെങ്കിലും ഇന്ത്യ നല്‍കുന്ന പ്രതീക്ഷ വലുതാണ്. നിലവില്‍ ലോകത്ത് ഏറ്റവും കൂടുതല്‍ സ്‌കോച്ച് വിസ്‌കി ഇറക്കുമതി ചെയ്യുന്നത് ഇന്ത്യയാണ്. ഇന്ത്യയില്‍ നിലവില്‍ ഒരു കുപ്പി വിസ്‌കിക്ക് 150 ശതമാനമാണ് നികുതി ഈടാക്കുന്നത്. ബ്രിട്ടനും ഇന്ത്യയും തമ്മിലുള്ള പുതിയ വ്യാപാര കരാര്‍ യാഥാര്‍ത്ഥ്യമായാല്‍ ഇത് ഘട്ടം ഘട്ടമായി 40 ശതമാനത്തിലേക്ക് കുറയും. ഇത് നടപ്പിലായാല്‍ ഇന്ത്യയില്‍ വിസ്‌കി വില വലിയ തോതില്‍ കുറയാനും വിപണി സജീവമാകാനും സാധ്യതയുണ്ട്.

എന്തുകൊണ്ട് ഈ തകര്‍ച്ച?

വിലക്കയറ്റവും ജനങ്ങളുടെ കൈവശം പണം കുറഞ്ഞതും മദ്യ വിപണിയെ ബാധിച്ചിട്ടുണ്ട്. കൂടാതെ, വിദേശ രാജ്യങ്ങളിലെ ഉയര്‍ന്ന ടാക്‌സുകളും പാക്കേജിംഗ് നിയമങ്ങളും കമ്പനികള്‍ക്ക് വലിയ ബാധ്യതയാകുന്നു. വിമാനത്താവളങ്ങളിലെ ഡ്യൂട്ടി ഫ്രീ ഷോപ്പുകളിലും വിദേശ സൂപ്പര്‍ മാര്‍ക്കറ്റുകളിലും വിസ്‌കിക്ക് ഇപ്പോള്‍ വലിയ ഡിസ്‌കൗണ്ടുകള്‍ നല്‍കിത്തുടങ്ങിയത് വിപണിയിലെ മാന്ദ്യത്തിന്റെ ലക്ഷണമാണ്.