കൂട്ട ബലാത്സംഗം: മുഖ്യപ്രതിയെ  പെൺകുട്ടി പരേഡിൽ തിരിച്ചറിഞ്ഞു

ദില്ലി: ഇരുപത്തൊന്നുകാരിയെ കൂട്ട ബലാത്സംഗത്തിനിരയാക്കിയ സംഭവത്തിൽ പ്രതിയായ ഒാ​ട്ടോ ഡ്രൈവറെ ഇരയായ പെൺകുട്ടി സെക്കന്‍റുകൾക്കകം തിരിച്ചറിഞ്ഞു. മുഹമ്മദ്​ ഇർഫാനെ (29)യാണ്​ ബുറൈൽ മാതൃകാ ജയിലിൽ മജിസ്​ട്രേറ്റിന്‍റെ സാന്നിധ്യത്തിൽ നടന്ന പരേഡിൽ പെൺകുട്ടി തിരിച്ചറിഞ്ഞത്​. പത്ത്​ പേരെ അണിനിരത്തിയായിരുന്നു തിരിച്ചറിയൽ പരേഡ്​. 

വനിതാ പൊലീസ്​ സംഘത്തി​ന്‍റെ അകമ്പടിയിലാണ്​ പെൺകുട്ടിയെ ജയിലിൽ എത്തിച്ചത്​. പെൺകുട്ടി ​പ്രതിയെ തിരിച്ചറിഞ്ഞെന്നും ഇയാളെ കസ്​റ്റഡിയിൽ വിട്ടുകിട്ടാനായി അപേക്ഷ നൽകിയിട്ടുണ്ടെന്നും  പൊലീസ്​ സ്​റ്റേഷൻ ഹൗസ്​ ഒാഫീസർ  നസ്​ബീർ സിങ്​ പറഞ്ഞു. ഇയാളെ ചോദ്യം ചെയ്​ത ശേഷം രണ്ട്​ കൂട്ടുപ്രതികൾ ആരെല്ലാമെന്ന്​ ഉറപ്പാക്കുമെന്നും പൊലീസ്​ പറഞ്ഞു. ദാരുണമായ  ബലാത്സംഗം അരങ്ങേറിയത്​ ചാണ്ഡിഗഡിലാണ്​. ഒരാഴ്​ച പ്രയ്​തനം നടത്തിയാണ്​ ആദ്യ അറസ്​റ്റ്​ നടത്തിയത്​. മറ്റ്​ രണ്ട്​​ പേർ അവരുടെ സിരക്​പൂരിലെ വീട്ടിൽ നിന്ന്​ ഒളിവിൽ പോയിട്ടുണ്ട്​. 

ഇർഫാനെ പ്രാഥമികമായി നടത്തിയ ചോദ്യം ചെയ്യലിൽ ഗരീബ്​ (22), പോപ്പു (23) എന്നിവരാണ്​ കൂട്ടു​പ്രതികൾ എന്ന്​ സൂചന ലഭിച്ചിട്ടുണ്ട്​. മൂവരും മദ്യപിച്ചിരിക്കു​മ്പോഴാണ്​ സ്​ത്രീയെ തട്ടികൊണ്ടുപോയി മാനഭംഗപ്പെടുത്താനുള്ള പദ്ധതി തയാറാക്കിയത്​.