രോഗികളായ കുട്ടികള്‍ക്ക് കൈനിറയെ സമ്മാനവുമായി ഒബാമ സാന്റയെത്തി; പിന്നെ നടന്നത് - വീഡിയോ

കുട്ടികള്‍ക്ക് സമ്മാനങ്ങള്‍ നല്‍കിയും അവരുടെ മാതാപിതാക്കളോട് സംസാരിച്ചും ഏറെ നേരം ആശുപത്രിയില്‍ ചിലവിട്ട ശേഷമാണ് ബരാക് ഒബാമ ആശുപത്രി വിട്ടത്.

വാഷിങ്ടൺ: ക്രിസ്തുമസ് ആഘോഷങ്ങള്‍ക്കായി ലോകമൊരുങ്ങുമ്പോള്‍ രോഗികളായ കുട്ടികള്‍ സമ്മാനവുമായെത്തിയ സാന്റാക്ലോസിനെ കണ്ട് അമ്പരന്നു. അമേരിക്കയിലെ വാഷിങ്ടൺ ഡി സിയിലെ ചിൽഡ്രൻസ് നാഷണൽ ആശുപത്രിയിലെ കുട്ടികള്‍ക്ക് സമ്മാനവുമായി എത്തിയത് അമേരിക്കയുടെ മുന്‍പ്രസിന്റായ ബരാക് ഒബാമയായിരുന്നു. 

പാപ്പയുടെ ഭാണ്ഡകെട്ടും തൊപ്പിയുമായാണ് ഒബാമ ആശുപത്രിയിൽ എത്തിയത്. അപ്രതീക്ഷിതമായി എത്തിയ ഒബാമയെ ചുംബനം നല്‍കിയും ആലിംഗനം ചെയ്തുമാണ് കുട്ടികള്‍ സ്വീകരിച്ചത്. ഒബാമയെ കണ്ട് തിരിച്ചറിഞ്ഞ ആശുപത്രിയിലെ കുഞ്ഞുങ്ങളുടെ മുഖഭാവങ്ങള്‍ ചുരുങ്ങിയ സമയത്തിനുള്ളിലാണ് സമൂഹമാധ്യമങ്ങളില്‍ വൈറലായത്. കുട്ടികള്‍ക്ക് സമ്മാനങ്ങള്‍ നല്‍കിയും അവരുടെ മാതാപിതാക്കളോട് സംസാരിച്ചും ഏറെ നേരം ആശുപത്രിയില്‍ ചിലവിട്ട ശേഷമാണ് ബരാക് ഒബാമ ആശുപത്രി വിട്ടത്.

ഒബാമ തന്റെ ജീവനക്കാർക്കൊപ്പം ശേഖരിച്ച സമ്മാനങ്ങളാണ് കുട്ടികൾക്ക് സമ്മാനിച്ചതെന്ന്  അദ്ദേഹത്തിന്റെ ഓഫീസ് അറിയിച്ചു.  ഒബാമയുടെ ഭാര്യ മിഷേൽ ഒബാമ യു എസിന്റെ പ്രഥമ വനിതയായ സമയം മുതൽ എല്ലാ വർഷവും ഈ ആശുപത്രി സന്ദർശിക്കാറുണ്ടായിരുന്നു. 2014ൽ പ്രസിഡന്റായിരിക്കുന്ന സമയത്ത് ഒബാമയും ആശുപത്രി സന്ദർശിച്ചിരുന്നു.