രക്ഷാപ്രവര്‍ത്തനത്തിനിറങ്ങാന്‍ ബിജെപി പ്രവർത്തകർക്ക് നിർദേശം

ദുരന്ത മുഖത്ത് സർക്കാർ ഏജൻസികളും  സേവാഭാരതിയും നടത്തുന്ന ദുരിതാശ്വാസ പ്രവർത്തനങ്ങൾക്ക് ആവശ്യമായ പിന്തുണയും സഹായവും ചെയ്യണം

തിരുവനന്തപുരം: സമാനതകളില്ലാതെ മഴക്കെടുതിയിലൂടെ സംസ്ഥാനം കടന്നു പോകുന്ന സാഹചര്യത്തിൽ  എല്ലാ ബിജെപി അംഗങ്ങളും അനുഭാവികളും സഹായവുമായി രംഗത്തെത്തണമെന്ന് ബിജെപി സംസ്ഥാന അദ്ധ്യക്ഷൻ അഡ്വ പി എസ് ശ്രീധരൻപിള്ള ആഹ്വാനം ചെയ്തു. 

ദുരന്ത മുഖത്ത് സർക്കാർ ഏജൻസികളും  സേവാഭാരതിയും നടത്തുന്ന ദുരിതാശ്വാസ പ്രവർത്തനങ്ങൾക്ക് ആവശ്യമായ പിന്തുണയും സഹായവും ചെയ്യണം. നിത്യോപയോഗ സാധനങ്ങൾ, മരുന്ന്, ഭക്ഷണം, വസ്ത്രം തുടങ്ങി ഏത് തരത്തിലുമുള്ള സഹായവും ഇപ്പോൾ ആവശ്യമാണ്. ഇവ സമാഹരിക്കാൻ പ്രവർത്തകര്‍ മുന്നിട്ടിറങ്ങണം. ശാരീരികമായി സഹായം ചെയ്യാൻ സാധിക്കുന്നവർ സേവാഭാരതി പ്രവർത്തകരോട് ചേര്‍ന്ന് പ്രവർത്തിക്കണമെന്നും അദ്ദേഹം ആവശ്യപ്പെട്ടു. 

മഴക്കെടുതി നേരിടാൻ കേരളത്തിന് ആവശ്യമായ സഹായം ഉറപ്പാക്കണമെന്നാവശ്യപ്പെട്ട് ദില്ലിയിൽ കേന്ദ്രമന്ത്രിമാരെ കണ്ടിരുന്നുവെന്നും. ഇക്കാര്യം അനുഭാവപൂർവ്വം പരി​ഗണിക്കാമെന്ന് അവർ ഉറപ്പു നൽകിയതായും ശ്രീധരൻപ്പിള്ള വാർത്താക്കുറിപ്പിൽ അറിയിച്ചു.