കടം കൊടുത്ത പണം തിരകെ ചോദിച്ചതിന് കല്ലുകൊണ്ടിടിച്ച് കൊന്നു; സഹോദരങ്ങൾ അറസ്​റ്റിൽ

കാസര്‍ഗോഡ്: ചെര്‍ക്കളയില്‍ കര്‍ണ്ണാടക ബാഗൽകോട്ട്​ സ്വദേശി രംഗപ്പ ഗാജിയെ (27) കല്ലുകൊണ്ടിടിച്ച് കൊലപ്പെടുത്തിയ കേസില്‍ സഹോദരങ്ങൾ അറസ്​റ്റിൽ. ബെല്‍ഗാം സൂരേബാന്‍ ഗ്രാമത്തിലെ അക്കണ്ടപ്പ (30), സഹോദരന്‍ വിട്ടള (33) എന്നിവരെയാണ് ജില്ലാ പൊലീസ് മേധാവി കെ.ജി സൈമണിന്‍റെ നേതൃത്വത്തിലുള്ള സംഘം അറസ്​റ്റ്​ ചെയ്​തത്​. മൂന്നുമാസം മുമ്പ്​ ആഗസ്റ്റ് 9ന് രാവിലെയാണ് ചെര്‍ക്കള ദേശീയ പാതയോരത്ത് ആളൊഴിഞ്ഞ പറമ്പില്‍ രണ്ട് ദിവസം പഴക്കമുള്ള രംഗപ്പയുടെ മൃതദേഹം പുഴുവരിച്ച നിലയില്‍ കണ്ടത്. 

സംഭവത്തിൽ പൊലിസ് ​കേസെടുത്തു അന്വേഷണം നടത്തിയെങ്കിലും പ്രതികളെ കണ്ടെത്താനായില്ല. തുടർന്ന്​ ജില്ലാ പൊലിസ്​ മേധാവിയുടെ നേതൃത്വത്തിൽ പ്രത്യേക അന്വേഷണ സംഘമുണ്ടാക്കി നടത്തിയ അന്വേഷണത്തിലാണ്​ പ്രതികൾ പിടിയിലായത്​. സംഭവത്തിന്​ സാക്ഷിയായ ഒരാൾ രണ്ടുദിവസം കഴിഞ്ഞ്​ അന്വേഷിക്കാനെത്തിയത് കേസിൽ വഴിത്തിരിവായി​. പ്രതികൾ ബെൽഗാം സ്വദേശികളാണെന്ന്​ അറിഞ്ഞതോടെ പൊലിസ്​ അന്വേഷണം കർണാടകത്തിലേക്ക്​ നീട്ടി. ബെല്‍ഗാം രാംദുര്‍ഗിലെത്തി ഇവരുടെ വീട് കണ്ടെത്തുകയും ഇരുവരെയും അറസ്റ്റ് ചെയ്യുകയുമായിരുന്നു. 

മദ്യവുമായി ബന്ധപ്പെട്ട പണ തർക്കവും തുടർന്നുണ്ടായ അടിപിടിയുമാണ്​ കൊലയിലേക്ക്​ നയിച്ചതെന്ന്​ ​ജില്ലാ പൊലിസ്​ മേധാവി മാധ്യമങ്ങളോട്​ പറഞ്ഞു. ചോദ്യം ചെയ്യലില്‍ പ്രതികള്‍ കുറ്റം സമ്മതിച്ചു. രംഗപ്പ ഗാജി നേരത്തേ മദ്യപിക്കുന്നതിന് അക്കണ്ടപ്പക്ക് പണം നല്‍കിയിരുന്നുവത്രെ. പിന്നീട് മദ്യപിക്കാൻ പണം ഇല്ലാതെ വന്നപ്പോള്‍ അക്കണ്ടപ്പ പണം നല്‍കാനുണ്ടെന്ന കാര്യം പറഞ്ഞ് രംഗപ്പ ഗാജി അക്കണ്ടപ്പയുടെ സഹോദരന്‍ വിട്ടളയെ മര്‍ദ്ദിച്ചിരുന്നുവത്രെ. ഈ വിവരം വിട്ടള അക്കണ്ടപ്പയോട് പറയുകയും ചെയ്തു. പിന്നീട് രണ്ട് പേരും ചേര്‍ന്ന് രംഗപ്പയെ മർദ്ദിച്ചു. നിലത്ത് വീണ രംഗപ്പയുടെ ദേഹത്ത് വിട്ടള ചെങ്കല്‍ കഷ്ണം കൊണ്ട് കുത്തുകയും ചെയ്തുവെന്ന്​ പൊലിസ്​ പറയുന്നു.

സംഭവസമയത്ത് മൂവരും മദ്യലഹരിയിലായിരുന്നുവെന്നും പൊലീസ് പറഞ്ഞു. പഞ്ചായത്തംഗം എം.സി.എ. ഫൈസലിന്‍റെ മൊഴി പ്രകാരമാണ്​ വിദ്യാനഗർപൊലിസ്​ കേസെടുത്തത്​. കണ്ണൂര്‍ ഫോറന്‍സിക് സയന്‍സ് ലബോറട്ടറിയില്‍ നിന്ന് മൃതദേഹത്തിൽ നിന്നുള്ള രക്​ത സാമ്പിളുകൾ പരിശോധച്ചിരുന്നു. ചെര്‍ക്കളയിലും പരിസരത്തും കൂലിപ്പണിയെടുത്ത് വരികയായിരുന്നു രംഗപ്പ. നെഞ്ചിന്‍റെ ഇടത് ഭാഗത്ത് ഏഴോളം വാരിയെല്ലുകള്‍ക്ക് പൊട്ടലുള്ളതായി പോസ്റ്റുമോര്‍ട്ടം റിപ്പോര്‍ട്ടില്‍ പറയുന്നു. സി.ഐ. ബാബു പെരിങ്ങേത്താണ്​ അന്വേഷണം നടത്തിയത്​. ഇരുനൂറിലേറെ ഇതര സംസ്ഥാന തൊഴിലാളികളെ ചോദ്യം ചെയ്തിരുന്നു. എസ്ഐ മാരായ രവീന്ദ്രന്‍, ഫിലിപ് തോമസ്, മെല്‍വിന്‍ ജോസ്, എസ്.സി.പി.ഒ. ലക്ഷ്മി നാരായണന്‍, ബാലകൃഷ്ണന്‍, റോജന്‍ എന്നിവരാണ്​ അന്വേഷണ സംഘത്ത ത്തിലുണ്ടായിരുന്നത്.