​ കുട്ടികള്‍ ഒരിടത്തും സുരക്ഷിതരല്ലെന്ന്​ കൈലാഷ്​ സത്യാർഥി

ഗുവാഹത്തി: കുട്ടികൾ ഉൾപ്പെടെ മനുഷ്യക്കടത്തിനെതിരെ  നിയമം ഉണ്ടായിട്ടും രാജ്യത്ത്​ കുഞ്ഞുങ്ങൾ ഒരിടത്തും സുരക്ഷിതരല്ലെന്ന്​ നോബൽ സ​മ്മാന ജേതാവ്​ കൈലാഷ്​ സത്യാർഥി. താൻ നയിക്കുന്ന ഭാരത്​യാത്രയുടെ പ്രധാന ആവശ്യം കുട്ടികൾ ഉൾപ്പെടെയുള്ള മനുഷ്യക്കടത്തിനെതിരെ പാർലമെന്‍റ്​ കർശനമായ നിയമനിർമാണം നടത്തണമെന്നതാണെന്നും അദ്ദേഹം പറഞ്ഞു.  യാത്രയുടെ മേഘാലയ ഘട്ടം ഫളാഗ് ഒാഫ്​ ചെയ്​ത്​ സംസാരിക്കുകയായിരുന്നു അദ്ദേഹം. 

ബലാത്സംഗം, ലൈംഗിക ചൂഷണം, കുട്ടിക്കടത്ത്​ എന്നിവക്കെതിരെ താൻ യുദ്ധം പ്രഖ്യാപിച്ചിരിക്കുകയാണെന്നും ഭാരത്​യാത്രയിലൂടെ ഇന്ത്യ കുഞ്ഞുങ്ങൾക്ക്​ സുരക്ഷിത ഇടമായി മാറുമെന്ന്​ പ്രതീക്ഷിക്കുന്നതായും അദ്ദേഹം പറഞ്ഞു. പീഡിതരായ കുഞ്ഞുങ്ങളിൽ നിന്നുള്ള ചിരി എനിക്ക്​ സ്വീകരിക്കാൻ കഴിയില്ല. ഇതൊന്നും സാധാരണ കുറ്റമല്ല. ഇത്​ നാടി​ന്‍റെ ധാർമികതയെ ബാധിക്കുന്ന പകർച്ച വ്യാധിയാണ്​.

നമ്മുടെ കുട്ടികൾ വീട്ടിലും സ്​കൂളിലും അയൽപക്കങ്ങളിലും ഒന്നും തന്നെ സുരക്ഷിതരല്ല. കുറ്റവാളികൾ സ്വതന്ത്രമായി വിഹരിക്കുകയാണ്​. നമുക്ക്​ വെറുതെ കാത്തിരിക്കാനും നിരീക്ഷിക്കാനും കഴിയില്ലെന്നും സത്യാർഥി പറഞ്ഞു.

2014ൽ മലാല യൂസുഫ്​ സായിക്കൊപ്പമാണ്​ കൈലാഷ്​സത്യാർഥിയെ തേടി സമാധാന നൊബേൽ സമ്മാനം എത്തിയത്​. സെപ്​റ്റംബർ 11നാണ്​ സത്യാർഥി 35 ദിവസം നീണ്ടുനിൽക്കുന്ന ഭാരത്​യാത്ര തുടങ്ങിയത്​. 22 സംസ്​ഥാനങ്ങളിലൂടെ 11000 കിലോമീറ്റർ ദൂരം താണ്ടുന്ന യാത്ര ഒക്​ടോബർ 16ന്​  ദില്ലിയിൽ സമാപിക്കും.