ഓഫീസ് സമയത്തെ ഓണാഘോഷം- നിലപാടില്‍ ഉറച്ച് മുഖ്യമന്ത്രി

ദില്ലി: സര്‍ക്കാര്‍ ഓഫീസുകളില്‍  ഓഫീസ് സമയത്ത് ഓണാഘോഷം പാടില്ലെന്ന നിലപാടില്‍ ഉറച്ച് നില്‍ക്കുന്നതായി പിണറായി വിജയന്‍. സര്‍ക്കാര്‍ ചടങ്ങുകളില്‍ മതപരമായ ആചാരങ്ങള്‍ പാടില്ലെന്നും മുഖ്യമന്ത്രി വ്യക്തമാക്കി. സര്‍ക്കാര്‍ ഓഫീസുകളില്‍ ഓഫീസ് സമയത്ത് ഓണാഘോഷം പാടില്ലെന്ന് പറഞ്ഞത് സദുദ്ദേശപരമായാണെന്ന് മുഖ്യമന്ത്രി പിണറായി വിജയന്‍ പറഞ്ഞു.

സര്‍ക്കാര്‍ ചടങ്ങുകളില്‍ നിലവിളക്ക് കൊളുത്തുന്നതുമായി ബന്ധപ്പെട്ട് മന്ത്രി ജി സുധാകരന്റെയും പി കെ ശശി എംഎല്‍എയുടേയും അഭിപ്രായപ്രകടനങ്ങളോട് സര്‍ക്കാര്‍ പരിപാടികളില്‍ മതപരമായ ചിഹ്നങ്ങള്‍ ഒഴിവാക്കുന്നതാണ് നല്ലതെന്നായിരുന്നു മുഖ്യമന്ത്രിയുടെ പ്രതികരണം.

ഉപദേഷ്ടാക്കളുടെ നിയമനവിവാദമൊന്നും സര്‍ക്കാരിന്റെ പ്രവര്‍ത്തനത്തെ ബാധിച്ചിട്ടില്ലെന്ന് മുഖ്യമന്ത്രി പിണറായി വിജയന്‍ പറഞ്ഞു. സി പി ഐയും സി പി ഐ എമ്മും തമ്മില്‍ അഭിപ്രായവ്യത്യാസങ്ങളില്ലെന്നും മുഖ്യമന്ത്രി വ്യക്തമാക്കി. പലകാര്യങ്ങളിലും പ്രധാനമന്ത്രി നരേന്ദ്രമോദിയെ പിന്‍തുടരുകയാണല്ലോ എന്ന ചോദ്യത്തിന് റേഡിയോ പ്രഭാഷണം നേരത്തെയും നടത്തിയിട്ടുള്ളതാണെന്ന് മുഖ്യമന്ത്രി പറഞ്ഞു.