പിഎസ്‍സി പരീക്ഷ സംബന്ധിച്ച് വ്യാപകപരാതി

തിരുവനന്തപുരം: ഹയർസെക്കണ്ടറി അധ്യാപകരെ കണ്ടെത്താനായി കഴിഞ്ഞ ദിവസങ്ങളിലായി പിഎസ്‍സി നടത്തിയ പരീക്ഷ സംബന്ധിച്ച് വ്യാപകപരാതി. ചോദ്യപേപ്പറിലും പിഎസ്‍സി പുറത്തുവിട്ട പ്രൊവിഷണൽ ഉത്തരസൂചികയിലും നിരവധി തെറ്റുകളുണ്ടെന്നാണ് ഉദ്യോഗാർത്ഥികളുടെ ആക്ഷേപം. മലയാളം, ഗണിതം ചോദ്യങ്ങളെ സംബന്ധിച്ചാണ് കൂടുതൽ പരാതികളുള്ളത്. ഈ മാസം 29 ന് നടന്ന മലയാളം പരീക്ഷയിലെ ചോദ്യപേപ്പറിലും പിഎസ്‍സി പുറത്തുവിട്ടിരിക്കുന്ന ഉത്തരസൂചികയും പതിനഞ്ചോളം തെറ്റുണ്ടെന്ന് ഉദ്യോഗാർത്ഥികൾ ചൂണ്ടിക്കാട്ടുന്നു.

    മലയാളത്തിന്റെ അഭിമാനമായ എംടി വാസുദേവൻ നായർക്ക് ജ്ഞാനപീഠം കിട്ടിയത് ഏത് വർഷമാണെന്ന് ചോദ്യമുണ്ടായിരുന്നു. പിഎസ്‍സി പുറത്തുവിട്ടിരിക്കുന്ന ഉത്തരസൂചികയിൽ ശരിയുത്തരം 1996 ആണ്. എന്നാൽ എംടിക്ക് 1995ലാണ് ജ്ഞാനപീഠപുരസ്കാരം ലഭിച്ചത്. പിഎസ്‍സി പറയുന്ന 1996ൽ മഹാശ്വേതാ ദേവിക്കാണ് പുരസ്കാരം ലഭിച്ചതെന്ന് ജ്ഞാനപീഠസമിതിയുടെ ഔദ്യോഗിക വെബ്സൈറ്റ് തന്നെ പറയുന്നു. ഇതുപോലെ പല ചോദ്യങ്ങൾക്കും പിഎസ്‍സി നൽകിയിരിക്കുന്ന ഉത്തരസൂചിക തെറ്റാണെന്ന് ഉദ്യോഗാർത്ഥികൾ പറയുന്നു.

കുമാരനാശാന്റെ ലീല പ്രസിദ്ധീകരിച്ച വർഷമെന്ന ചോദ്യത്തിന് ശരിയായ ഉത്തരം ഓപ്ഷനിൽ ഉണ്ടായിരുന്നില്ല. പല ചോദ്യങ്ങളിലും ആശയക്കുഴപ്പവും ഉണ്ടായിരുന്നു. ചോദ്യപേപ്പറിലും ഉത്തരസൂചികയിലും തെറ്റുകൾ കടന്നുകൂടിയതിനെക്കുറിച്ച് വിദഗ്ധ സമിതിയെക്കൊണ്ട് അന്വേഷണം വേണമെന്ന് ഉദ്യോഗാർത്ഥികൾ ആവശ്യപ്പെടുന്നു. പരീക്ഷ റദ്ദാക്കി വീണ്ടും നടത്തുകയോ, തെറ്റായ ചോദ്യങ്ങൾ ഒഴിവാക്കി മൂല്യനിർണയം നടത്തുകയോ വേണമെന്നാവശ്യപ്പെട്ട് പിഎസ്‍സിയെ സമീപിക്കാനാണ് ഇവരുടെ തീരുമാനം.