മധ്യപ്ര​ദേശിലെ സത്നയിൽ നാലുവയസ്സുകാരി ബലാത്സം​ഗത്തിനിരയായി

നാലുവയസ്സുകാരി ബലാത്സം​ഗത്തിനിരയായി മധ്യപ്രദേശിലെ സത്ന ജില്ലയിൽ  

മധ്യപ്രദേശ്: മധ്യപ്രേദേശിലെ സത്ന ജില്ലയിൽ നാല് വയസ്സുകാരിയെ ബലാത്സം​ഗം ചെയ്ത് വിജനമായ സ്ഥലത്ത് ഉപേക്ഷിച്ച നിലയിൽ കണ്ടെത്തി. സംഭവത്തിൽ ഇരുപത്തിമൂന്നുകാരനായ മഹേന്ദ്രസിം​ഗിനെ പൊലീസ് അറസ്റ്റ് ചെയ്തു. നാലുവയസ്സുകാരി പിച്ചിച്ചീന്തിയ അവസ്ഥയിലാണ് കാണപ്പെട്ടതെന്ന്  പോലീസ് പറയുന്നു. വീടിന്റെ വരാന്തയിൽ ഉറങ്ങിക്കിടക്കുകയായിരുന്ന കുട്ടിയെ മഹേന്ദ്രസിം​ഗ് തട്ടിയെടുക്കുകയായിരുന്നു.

കൃത്യത്തിന് ശേഷം കുട്ടി മരിച്ചെന്ന് കരുതി ആളൊഴിഞ്ഞ സ്ഥലത്ത് ഉപേക്ഷിക്കുകയായിരുന്നു. സത്ന ജില്ലയിലെ ഉച്ചേഹര പൊലീസ് സ്റ്റേഷന് സമീപത്തായിട്ടാണ് കുട്ടിയെ ഉപേക്ഷിച്ചത്. കുട്ടിയെ കാണാതെ വന്നപ്പോൾ മാതാപിതാക്കളും പ്രദേശവാസികളും അന്വേഷിച്ചിറങ്ങി. അപ്പോഴാണ് പെൺകുട്ടിയെ വളരെ ​ഗുരുതമായ അവസ്ഥയിൽ കണ്ടെത്തിയത്. പെൺകുട്ടിയെ തൊട്ടടുത്ത ആശുപത്രിയിൽ അഡ്മിറ്റ് ചെയ്തു. പ്രതിയായ മഹേന്ദ്ര സിം​ഗിനെതിരെ കേസെടുത്ത് അന്വേഷണം ആരംഭിച്ചതായി പൊലീസ് പറഞ്ഞു. 

ഒരാഴ്ച മുമ്പാണ് മാൻസോർ ജില്ലയിൽ ഏഴുവയസ്സുകാരിയെ കൂട്ട ബലാത്സം​ഗം ചെയ്തത്. ആ പെൺകുട്ടി സുഖം പ്രാപിച്ചു വരുന്നതേയുള്ളൂ. ​ഗുരുതരമായ മുറിവുകളാണ് ഏഴുവയസ്സുകാരിയുടെ ശരീരത്തിൽ‌ ഉണ്ടായിരുന്നത്. നടക്കാനോ സംസാരിക്കാനോ സാധിക്കാത്ത സാഹചര്യത്തിലാണ് ഏഴുവയസ്സുകാരിയെ കണ്ടെത്തുന്നത്.