ഭർത്താവിനെ കൊലപ്പെടുത്തി കഷ്​ണങ്ങളാക്കി സൂക്ഷിച്ച ഭാര്യക്കും കാമുകനും 30 വർഷം കഠിന തടവ്​

ദില്ലി: ഭർത്താവിനെ കൊലപ്പെടുത്തി വീട്ടിൽ കഷ്​ണങ്ങളാക്കി സൂക്ഷിച്ച കേസിൽ ഭാര്യക്ക്​ 30 വർഷത്തെ കഠിന തടവ്​. ഹരിയാനയിലെ ജാജ്ജർ ജില്ലാ കോടതിയുടെതാണ്​ വിധി. 2016ൽനടന്ന കൊലപാതകത്തിൽ ഭാര്യയെ സഹായിച്ച കാമുകനും ഇതേ ശിക്ഷ വിധിച്ചിട്ടുണ്ട്​. 

പ്രതിയായ 30കാരി പൂജക്ക്​ അയൽവാസിയുമായി വിവാഹേതര ബന്ധമുണ്ടായിരുന്നു. ഭർത്താവ്​ ബൽജിത്​ സിങിനെ കൊലപ്പെടുത്തി എട്ട്​ കഷ്​ണമാക്കി വീട്ടിലെ എട്ട്​ വിവിധ ഭാഗങ്ങളിലാക്കി വെക്കുകയായിരുന്നു. 2016 ഏപ്രിലിൽ അസന്ത വില്ലേജിലെ വീട്ടിലായിരുന്നു ദാരുണ കൊല നടന്നത്​. ഇരുഭാഗങ്ങളുടെയും വാദം കേട്ട അഡീഷനൽ സെഷൻസ്​ ജഡ്​ജി എച്ച്​.എസ്​ ദാഹിയ പ്രതികൾ കുറ്റം ചെയ്​തതായി കണ്ടെത്തുകയും ആസൂത്രിത കൊലപാതകത്തിന്​ ശേഷം മൃതദേഹത്തിന്​ മുന്നിൽ വെച്ച്​ ഇരുവരും സ്​നേഹം പ്രകടിപ്പിക്കുകയും ചെയ്​തതായും കണ്ടെത്തി. 

സഹോദരൻ കുല്‍ജിത്​ സിങ്​ ബൽജിതി​ന്‍റെ കാണാതായതിനെതിരെ പരാതി നൽകിയതോടെയാണ്​ സംഭവം വെളിച്ചത്ത്​ വന്നത്​. വീട്ടിൽ നിന്ന്​ ദുർഗന്ധം വമിക്കുന്നതായി തിരിച്ചറിഞ്ഞ ബൽജിതിന്‍റെ സഹോദരിമാര്‍  പൂജയാണ്​ സഹോദര​ന്‍റെ തിരോധാനത്തിന്​ പിന്നിലെന്ന്​ മനസിലാക്കുകയും ചെയ്​തു. 

സംശയത്തെ തുടർന്ന്​ പൂജയുടെ പേര്​ കൂടി എഫ്​.​ഐ.ആറിൽ ഉൾപ്പെടുത്തുകയായിരുന്നു. അ​ന്വേഷണ സംഘം ചോദ്യം ചെയ്​തപ്പോൾ തൃപ്​തികരമായ മറുപടി നൽകാൻ പൂജക്ക്​ സാധിച്ചില്ല. ഭാര്യയുടെ മറുപടിയിൽ പൊലീസ്​ വൈരുധ്യങ്ങൾ കണ്ടെത്തുകയും ചെയ്​തു. എഫ്​.​ഐ.ആറിൽ ഉൾപ്പെട്ട പൂജയുടെ കാമുകൻ ഉൾപ്പെടെയുള്ള ആറ്​ പേരെയും പൊലീസ്​ കസ്​റ്റഡിയിൽ എടുത്തു. 

കാമുകനൊപ്പം ചേർന്ന്​ കൃത്യം നടത്തിയതായി പൂജ സമ്മതിക്കുകയും ചെയ്​തു.  ബൽജിതി​ന്‍റെ ദാരുണ കൊലക്ക്​ പൂജയും കാമുകനുമാണെന്ന്​ കണ്ടെത്തിയ കോടതി മറ്റ്​ നാല്​ പേരെ വെറുതെവിട്ടു.