ഹാംബര്‍ഗ്: ഇന്ത്യയില്‍ നിന്ന് വായ്പയെടുത്തു മുങ്ങിയ വ്യവസായി വിജയ് മല്യയെ ഇന്ത്യയ്ക്ക് കൈമാറണമെന്ന് ബ്രിട്ടനോട് പ്രധാനമന്ത്രി നരേന്ദ്ര മോദി ആവശ്യപ്പെട്ടു. ജി 20 ഉച്ചകോടിക്കിടെ ബ്രിട്ടിഷ് പ്രധാനമന്ത്രി തെരേസ മേയുമായി നടത്തിയ കൂടിക്കാഴ്ചയിലാണ് മോദി ഇക്കാര്യം ആവശ്യപ്പെട്ടത്. സാമ്പത്തിക തട്ടിപ്പു നടത്തി ഇന്ത്യയിൽ നിന്നും മുങ്ങിയ കുറ്റവാളികളെ തിരിച്ചയക്കാൻ ബ്രിട്ടൻ സഹകരിക്കണമെന്നും മോദി ആവശ്യപ്പെട്ടു. നേരത്തെ ബ്രിട്ടനില്‍ വിജയ് മല്യയെ അറസ്റ്റ് ചെയ്യുകയും പിന്നീട് ജാമ്യത്തില്‍ വിടുകയും ചെയ്തിരുന്നു. ജി 20 ഉച്ചകോടിക്ക് ശേഷം ഇന്ത്യൻ സമയം വൈകിട്ട് ഏഴരയ്ക്ക് പ്രധാനമന്ത്രി ദില്ലിക്ക് മടങ്ങും.