ഔദ്യോ​ഗിക മീറ്റിങ്ങുകളിൽ മൊബൈൽ ഫോൺ വിലക്കേർപ്പെടുത്തി കർണാടക മുഖ്യമന്ത്രി കുമാരസ്വാമി

തീരുമാനം മീറ്റിങ്ങുകളിൽ അച്ചടക്കം പാലിക്കാൻ അധ്യാപകർക്കും മൊബൈൽ ഫോൺ വിലക്ക് സ്കൂളിൽ വേണ്ടത് മാതൃകാപരമായ അന്തരീക്ഷം

കർണാടക: ഔദ്യോ​ഗിക മീറ്റിങ്ങുകളിൽ ഉദ്യോ​ഗസ്ഥർ മൊബൈൽ ഫോൺ ഉപയോ​ഗിക്കാൻ പാടില്ലെന്ന നിർദ്ദേശവുമായി കർണാടക മുഖ്യമന്ത്രി എച്ച്. ഡി. കുമാരസ്വാമി. മുഖ്യമന്ത്രിയായി ചുമതലയേറ്റ് ദിവസങ്ങൾക്കുള്ളിലാണ് കുമാരസ്വാമിയുടെ ഈ നടപടി. ഔദ്യോ​ഗിക മീറ്റിങ്ങുകളിൽ അച്ചടക്കം പാലിക്കുന്നതിനും അസ്വസ്ഥതകൾ ഒഴിവാക്കുന്നതിനും വേണ്ടിയാണ് ഇങ്ങനെയൊരു നിർദ്ദേശമെന്ന്  സർക്കാർ വ്യക്തമാക്കുന്നു.

സ്വാ​ഗതാർഹമായ തീരുമാനമെന്നാണ് ചീഫ് സെക്രട്ടറി രത്നപ്രഭ ഈ നടപടിയെ വിശേഷിപ്പിക്കുന്നത്. കാരണം മൊബൈൽ ഫോൺ കയ്യിലില്ലെങ്കിൽ 
കൂടുതൽ ശ്രദ്ധയോടെയും ഫലപ്രദമായും ഔദ്യോ​ഗിക മീറ്റിങ്ങുകളി‍ൽ പങ്കെടുക്കാൻ‌ ഉദ്യോ​ഗസ്ഥർക്ക് സാധിക്കും. അടിയന്തിര സ്വ‌ഭാവമുള്ള മീറ്റിങ്ങുകളിലായിരിക്കും ഈ തീരുമാനം കൂടുതൽ ഫലപ്രദമാകുന്നത്. പത്ത് ദിവസം മുമ്പാണ് കുമാരസ്വാമി മുഖ്യമന്ത്രിയായി ചുമതലയേറ്റത്. ഇതിനകം വളരെ കുറച്ചു മീറ്റിങ്ങുകളിൽ മാത്രമാണ് അദ്ദേഹം പങ്കെടുത്തിട്ടുള്ളത്. 

കഴിഞ്ഞ ദിവസം സർക്കാർ സ്കൂൾ അധ്യാപകർക്കും ജീവനക്കാർക്കും മൊബൈൽ ഫോൺ ഉപയോ​ഗത്തിനെതിരെ സർക്കുലർ നൽകിയിരുന്നു. ക്ലാസ്സെടുക്കുന്ന സമയങ്ങളിൽ യാതൊരു കാരണവശാലും അധ്യാപകർ ഫോൺ ഉപയോ​ഗിക്കാൻ പാടില്ല എന്ന് സർക്കുലറിൽ കർശന നിർദ്ദേശം നൽകിയിട്ടുണ്ട്.

''സ്കൂളിൽ മാതൃകാപരമായ അന്തരീക്ഷമാണ് സൃഷ്ടിക്കേണ്ടത്. അത് അധ്യാപകരുടെ കടമയാണ്. ഈ ഉദ്ദേശ്യത്തെ മുൻനിർത്തിയാണ് സ്കൂളിൽ മൊബൈൽ ഫോൺ വിലക്കേർ‌പ്പെടുത്തിയത്'' - സർക്കുലറിൽ‌ പറയുന്നു. ഇതിന് വിരുദ്ധമായി ഏതെങ്കിലും അധ്യാപകരോ ജീവനക്കാരോ പ്രവർത്തിച്ചാൽ അവർക്കെതിരെ അച്ചടക്ക നടപടി സ്വീകരിക്കാൻ പ്രധാന അധ്യാപകർക്ക് അധികാരമുണ്ടെന്നും സർക്കുലറിൽ കൂട്ടിച്ചേർത്തിട്ടുണ്ട്.