ഷുജാത്ത് ബുഖാരിയുടെ കൊലപാതകം;  എഡിറ്റോറിയൽ കോളങ്ങൾ ശൂന്യമാക്കി പ്രതിഷേധിച്ച് കാശ്മീരിലെ പത്രങ്ങൾ

എ‍ഡിറ്റോറിയൽ ഇല്ലാതെ പതിനൊന്ന് പത്രങ്ങൾ കാശ്മീരിൽ മാധ്യമങ്ങളുടെ വ്യത്യസ്ത പ്രതിഷേധം

ശ്രീന​ഗർ: മുതിർന്ന മാധ്യമപ്രവർത്തകൻ ഷുജാത്ത് ബുഖാരിയുടെ മരണത്തിൽ എഡിറ്റോറിയൽ കോളങ്ങൾ ശൂന്യമാക്കി കാശ്മീരി പത്രങ്ങളുടെ പ്രതിഷേധം. ആദ്യമായിട്ടാണ് ദിനപത്രങ്ങൾ ഇത്തരമൊരു പ്രതിഷേധം നടത്തുന്നത്. റൈസിം​ഗ് കാശ്മീർ പത്രത്തിന്റെ എഡിറ്റർ ഇൻ ചീഫായ ഷുജാത്ത് ബുഖാരിയും രണ്ട് അം​ഗരക്ഷകരും റംസാൻ ദിവസത്തിലാണ് തിവ്രവാദികളാൽ കൊല്ലപ്പെട്ടത്. ഏറ്റവും നിശ്ശബ്ദമായൊരു പ്രതിഷേധമായിട്ട് വേണം ഇതിനെ കരുതാൻ. പതിനൊന്ന് പത്രങ്ങളാണ് ഇത്തരത്തിൽ പുറത്തിറങ്ങിയത്. കാശ്മീർ റീഡർ, ​ഗ്രേറ്റർ കാശ്മീർ, കാശ്മീർ ടൈംസ്, കാശ്മീർ ഒബ്സർവ്വർ എന്നീ പത്രങ്ങൾക്കൊന്നും എഡിറ്റോറിയൽ ഉണ്ടായിരുന്നില്ല. ഒരു ദിവസം പത്രം അച്ചടിക്കാതെ പ്രതിഷേധിക്കാനും ചില മാധ്യമങ്ങൾ തീരുമാനിച്ചിട്ടുണ്ട്. 

ബുഖാരിയുടെ പത്രമായ റൈസിം​ഗ് കാശ്മീർ തങ്ങളുടെ ചീഫ് എഡിറ്ററെക്കുറിച്ച് മൂന്ന് വാർത്തകളുമായിട്ടാണ് പുറത്തെത്തിയത്. അവർക്കും എഡിറ്റോറിയൽ ഉണ്ടായിരുന്നില്ല. സ്ഥാപനത്തോട് വായനക്കാർ പ്രകടിപ്പിച്ച പിന്തുണയ്ക്കും സ്നേഹത്തിനും നന്ദി പറയുകയും ചെയ്തിരുന്നു. കോൺ​ഗ്രസ് അധ്യക്ഷൻ രാഹുൽ ​ഗാന്ധി, കേന്ദ്ര ആഭ്യന്തരവകുപ്പ് മന്ത്രി രാജ്നാഥ് സിം​ഗ് എന്നിവർ ബുഖാരിയുടെ കൊലപാതകത്തിൽ അനുശോചനമറിയിച്ചു. മാധ്യമ സ്വാതന്ത്ര്യത്തിനും ജനാധിപത്യത്തിനും എതിരെയുള്ള അക്രമം എന്നാണ് ​ഗിൽഡ് ദിനപത്രം കൊലപാതകത്തെ വിശേഷിപ്പിച്ചത്.