സിപിഎം നേതാക്കളുടെ മക്കള്‍ക്ക് ഉന്നത പദവി നല്‍കിയത് വിവാദത്തില്‍

തിരുവനന്തപുരം: സിപിഎം നേതാക്കളുടെ ബന്ധുക്കളെ പൊതുമേഖലാ സ്ഥാപനങ്ങളുടെ തലപ്പത്ത് നിയമിച്ചത് വിവാദമാകുന്നു. പി.കെ.ശ്രീമതിയുടെ മകൻ പികെ സുധീറിനെ കെഎസ്ഐഇ എംഡിയായും ജയരാജന്റെ ജ്യേഷ്ഠന്റെ മകന്റെ ഭാര്യയെ  കേരള ക്ലേസ് ആന്‍ഡ് സെറാമിക്സ് ജനറൽ മാനേജറായും നിയമിച്ചതാണ് വിവാദത്തിലായത്. ബന്ധുക്കളെ പലയിടത്തും നിയമിച്ചിട്ടുണ്ടാകാമെന്നായിരുന്നു ഇ.പി. ജയരാജന്റെ പ്രതികരണം

ഈ മാസം രണ്ടാം തിയ്യതിയാണ് പി.കെ. സുധീറിനെ കെഎസ്ഐഇ എംഡിയായി നിയമിച്ചത്. കഴിഞ്ഞമാസമാണ് ഇപി ജയരാജന്റെ ജ്യേഷ്ഠന്റെ മകന്റെ ഭാര്യ ദീപ്തി നിഷാന്തിന് കേരള ക്ലേസ് ആന്‍ഡ് സെറാമിക്സ് ജനറൽ മാനേജറാക്കിയത്. പൊതുമേഖലാ സ്ഥാപനങ്ങളിലെ അഴിമതി തടയാൻ എംഡിമാരെ നിശ്ചയിക്കാൻ വ്യവസായ വകുപ്പിന് കീഴിലെ റിയാബ് പ്രത്യേക വിജ്ഞാപനം ഇറക്കിയിരുന്നു. എംബിഎ അല്ലെങ്കിൽ ബി-ടെക് , 15 വർഷത്തെ സർക്കാർ സർവ്വീസ് അതിൽ തന്നെ 5 വർഷം മേലധികാരിയാകണം എന്നിവയായിരുന്നു എംഡിയാകാനുള്ള യോഗ്യത.

റിയാബ് അഭിമുഖം നടത്തി തയ്യാറാക്കിയ പട്ടിക മറികടന്നാണ് സുധീറിന്റെ നിയമനം. റിയാബ് നിശ്ചയിച്ച യോഗ്യതയില്ലാത്ത സുധീർ അഭിമുഖത്തിലും പങ്കെടുത്തില്ല. നിയമനത്തെ കുറിച്ച് ഇപി ജയരാജനോട് ചോദിക്കണമെന്നായിരുന്നു പികെ ശ്രീമതിയുടെ പ്രതികരണം, ബന്ധുക്കളെ പലയിടത്തും നിയമിച്ചിട്ടുണ്ടാകാമെന്നായിരുന്നു ജയരാജന്റെ വിശദീകരണം.

ആനത്തലവട്ടം ആനന്ദന്റെ മകൻ, കോലിയക്കോട് കൃഷ്ണൻനായരുടെ മകൻ, ഇ.കെ. നായനാരുടെ ചെറുമകൻ എന്നിവരെയും വിവിധ പൊതുമേഖലാ സ്ഥാപനങ്ങളുടെ തലപ്പത്ത് നിയമിച്ചിട്ടുണ്ട്. നേതാക്കളുടെ മക്കളുടെ നിയമനങ്ങൾ റദ്ദാക്കണമെന്ന് ബിജെപി മുൻ അധ്യക്ഷൻ വി.മുരളീധരൻ ആവശ്യപ്പെട്ടു.