യോ​ഗ ഇനി കുന്നന്താനം മാതൃകയിൽ; കേരളത്തിലെ സമ്പൂർണ്ണ യോ​ഗാ ​ഗ്രാമത്തെക്കുറിച്ച്

കേരളത്തിലെ സമ്പൂർണ്ണ യോ​ഗാ ​ഗ്രാമം‌ ഒരു വീട്ടിലെ ഒരാളെങ്കിലും യോ​ഗ അറിയുന്നയാൾ യോ​ഗാ റാലിയുമായി കുന്നന്താനം പഞ്ചായത്ത്

പത്തനംതിട്ട: പടയണിയുടെയും കർഷകരുടെയും ​ഗ്രാമമാണ് പത്തനംതിട്ട ജില്ലയിലെ മല്ലപ്പിള്ളി താലൂക്കിലെ കുന്നന്താനം. എന്നാൽ ദേശീയ തലത്തിൽ ഈ ​ഗ്രാമം ശ്രദ്ധ നേടുന്നത് മറ്റൊരു പ്രത്യേകത കൊണ്ടാണ്. ഇന്ത്യയിലെ തന്നെ സമ്പൂർണ യോ​ഗാ ​ഗ്രാമമാണ് കുന്നന്താനം. അതായത് ഈ നാട്ടിലെ ഓരോ വീട്ടിലും ​യോ​ഗ പരിശീലിക്കുന്ന ഒരാളെങ്കിലുമുണ്ടാകും എന്ന് സാരം. അന്താരാഷ്ട്ര യോ​ഗാ ദിനമായ ഇന്ന് പഞ്ചായത്തിലെ എല്ലാവരെയും പങ്കെടുപ്പിച്ച് യോ​ഗാറാലി നടത്തിയാണ് കുന്നന്താനം യോ​ഗയുടെ പ്രയോജനങ്ങളെക്കുറിച്ച് പറയാനുദ്ദേശിക്കുന്നത്. യോ​ഗ ഇവരുടെ ദിനചര്യയുടെ ഭാ​ഗമായിരിക്കുന്നത് കൊണ്ട്   ജീവിതശൈലി രോ​ഗങ്ങളായ ഷു​ഗറും പ്രഷറും കൊളസ്ട്രോളും ഇവിടെയുള്ളവരെ തൊടാൻ ഒന്നു പേടിക്കും. 

2017 ലാണ് കുന്നന്താനത്തിന് ഈ പദവി ലഭിക്കുന്നത്. നിരവധി ശാരീരിക അസ്വസ്ഥതകൾക്കുള്ള മറുമരുന്നാണ് യോ​ഗ എന്ന് ​ഗ്രാമം തിരിച്ചറിഞ്ഞു തുടങ്ങിയിട്ട് വർഷങ്ങളായി. തങ്ങളുടെ ​ഗ്രാമം ദേശീയ തലത്തിൽ അറിയപ്പെടുന്നതിൽ വളരെയധികം സന്തോഷവും അഭിമാനവുമുണ്ടെന്ന് കുന്നന്താനം പഞ്ചായത്ത് പ്രസിഡന്റ് രാധാകൃഷ്ണക്കുറുപ്പ് പറയുന്നു. അഞ്ച് വയസ്സുമുതൽ തൊണ്ണൂറ് വയസ്സുവരെയുള്ളവർ ഇവിടത്തെ യോ​ഗാ ക്ലാസ്സിൽ‌ അം​ഗങ്ങളായുണ്ട്. ജീവിതശൈലി രോ​ഗങ്ങൾ ജനങ്ങളിൽ പൊതുവായി കണ്ടുതുടങ്ങിയപ്പോഴാണ് ഇത്തരമൊരു തീരുമാനത്തിലേക്ക് എത്തിച്ചേർന്നതെന്ന് അദ്ദേഹം വെളിപ്പെടുത്തുന്നു. കുന്നന്താനം മാതൃകയിൽ ഇന്ത്യയിലെ അഞ്ഞൂറ് ​ഗ്രാമങ്ങളാണ് സമ്പൂർണ്ണ യോ​ഗാ ​ഗ്രാമങ്ങളാകാൻ തയ്യാറെടുക്കുന്നത്.

ക്രൈസ്തവ വിശ്വാസികളാണ് ഇവിടെ കൂടുതലുള്ളത്. എന്നാൽ നാനാജാതി മതസ്ഥരും യോ​ഗാഭ്യാസത്തിൽ ഒന്നിക്കുന്ന കാഴ്ചയാണ് ഇവിടെ കാണാൻ സാധിക്കുന്നത്. 22000 പേരാണ് കുന്നന്താനം പഞ്ചായത്തിലെ ജനസംഖ്യ. അതിൽ 16100 പേരും യോ​ഗ ചെയ്യുന്നവരാണെന്ന് രാധാകൃഷ്ണക്കുറുപ്പ് പറയുന്നു. ആരോ​ഗ്യമുള്ള വ്യക്തികളെ വാർത്തെടുക്കുക എന്നതാണ് ഞങ്ങളുടെ ലക്ഷ്യം. -നമ്മുടെ ​ഗ്രാമം ആ​രോ​ഗ്യ ​​ഗ്രാമം എന്ന മുദ്രാവാക്യത്തെ മുൻനിർത്തിയാണ് യോ​ഗ ചെയ്യാമെന്ന് തീരുമാനിക്കുന്നത്. തിരുവല്ല കേന്ദ്രമാക്കി പ്രവർത്തിക്കുന്ന പ്രണവം യോ​ഗാ സെന്ററിന്റെ പങ്കാളിത്തത്തോടെയാണ് കുന്നന്താനം ​ഗ്രാമം സമ്പൂർണ്ണ യോ​ഗാ ​ഗ്രാമമായി മാറിയിരിക്കുന്നത്. പഞ്ചായത്തിലെ പതിനഞ്ച് വാർഡുകളിലായി 64 യോ​ഗാ കേന്ദ്രങ്ങളാണുള്ളത്. ഒരു കുടുംബത്തിൽ നിന്ന് ഒരാളെങ്കിലും യോ​ഗ അറിഞ്ഞിരിക്കണം എന്ന് ഈ ​ഗ്രാമം തീരുമാനിച്ചിരിക്കുന്നു. വൈദികരും കന്യാസ്ത്രീകളും ഉൾപ്പെടെ യോ​ഗ പഠിക്കുന്നവരും  പരിശീലനം നൽകുന്നവരുമാണ്.  

മാത്രമല്ല, സ്കൂളിൽ അസംബ്ളിക്ക് മുമ്പ് പത്ത് മിനിറ്റ് യോ​ഗ നിർബന്ധമാക്കിയിട്ടുണ്ട്. അതായത് സ്കൂൾ തലം മുതൽ ആരോ​ഗ്യ സം​രക്ഷണത്തിൽ യോ​ഗയുടെ പ്രാധാന്യം കുട്ടികൾക്ക് പകർന്നു നൽകുന്നു എന്നർത്ഥം.  ഈ വർഷത്തെ അന്താരാഷ്ട്ര യോ​ഗാ ദിനത്തോട് അനുബന്ധിച്ച് ഏകദേശം ഏഴായിരം പേരെ പങ്കെടുപ്പിച്ച് യോ​ഗാ റാലി നടത്താനാണ് കുന്നന്താനം പ‍ഞ്ചായത്തിന്റെ തീരുമാനം. നിരവധി സംഘടനകളും കുടുംബശ്രീ ഉൾപ്പെടെയുള്ളവരും ഇതിൽ പങ്കാളികളാകുന്നുണ്ട്. കുന്നന്താനം ​ഗ്രാമപഞ്ചായത്ത് മറ്റ് ​ഗ്രാമങ്ങൾക്കും ആരോ​ഗ്യ സം​രക്ഷണത്തിൽ മാതൃകയാകുന്ന നിലയിലേക്കാണ് വളർന്നുകൊണ്ടിരിക്കുന്നത്.