രാജ്യത്ത് വൃത്തിയിലും വെടിപ്പിലും ഒന്നാം സ്ഥാനം മധുര മീനാക്ഷി ക്ഷേത്രത്തിന്

വൃത്തിയുടെയും ശുചിത്വത്തി​ന്‍റെയും കാര്യത്തിൽ ഇനി തമിഴ്​നാട്ടുകാരെ ഇകഴ്​ത്താൻ നോക്കേണ്ട. രാജ്യത്ത്​ ഏറ്റവും ​വൃത്തിയും വെടിപ്പുമുള്ള സ്​ഥലം ഇനി തമിഴ്​നാട്ടിലാണ്​. പ്രതിദിനം പതിനായിരക്കണക്കിന്​ ഭക്​തർ കയറിയിറങ്ങുന്ന മധുര മീനാക്ഷി ക്ഷേത്രത്തിനാണ്​ ഇന്ത്യയിലെ ഏറ്റവും വൃത്തിയുള്ള പ്രധാന സ്​ഥലമെന്ന പദവി ലഭിച്ചത്​. കേന്ദ്രസർക്കാറി​ന്‍റെ ശുചിത്വപദ്ധതിയായ സ്വച്​ഛത ഹി സേവക്ക്​ കീഴിലാണ്​ പുരസ്​ക്കാരം. താജ്​മഹൽ ഉൾപ്പെടെ രാജ്യത്തെ പത്ത്​ പ്രധാന കേന്ദ്രങ്ങളു​ടെ പട്ടികയിൽ നിന്നാണ്​ മധുര ക്ഷേത്രം തെരഞ്ഞെടുത്തത്​.

അജ്​മീർ ദർഗ, സുവർണ ക്ഷേത്രം, തിരുപ്പതി ക്ഷേത്രം, ശ്രീ വൈഷ്​ണോ ദേവി ക്ഷേത്രം എന്നിവയും അവസാന പത്തിൽ ഉൾപ്പെട്ടിരുന്നു. ദില്ലിയിൽ നടക്കുന്ന ചടങ്ങിൽ മധുര ജില്ലാ കലക്​ടർ വീര രാഘവ റാവുവും കോർപ്പറേഷൻ കമീഷണർ എസ്​. അനീഷ്​ ശേഖറും കേന്ദ്രമന്ത്രി ഉമാഭാരതിയിൽ നിന്ന്​ അവാർഡ്​ സ്വീകരിക്കും. ക്ഷേത്രം വൃത്തിയും പ്ലാസ്​റ്റിക്​ മുക്​തവുമാക്കാൻ വിപുലമായ പ്രവർത്തനങ്ങളാണ്​ മധുര കോർപ്പറേഷൻ നടപ്പിലാക്കിയത്​. 60 ജീവനക്കാരെയും 300 വളണ്ടിയർമാരെയും നിയോഗിച്ചായിരുന്നു ശുചീകരണ ജോലികൾ.

ടി.വി.എസ്​, ത്യാഗരാജർ മിൽസ്​ തുടങ്ങിയ വ്യവസായ സ്​ഥാപനങ്ങള്‍ ജീവനക്കാരെ ശുചീകരണ ജോലികൾക്കായി വിട്ടുനൽകുകയും ചെയ്​തിരുന്നു. 25 ഇ -ടോയ്​ലറ്റുകളും 15 വാട്ടർ എ.ടി.എമ്മുകളും ക്ഷേത്ര പരിസരത്ത്​ ഭക്​തർക്കായി ഒരുക്കിയിട്ടുണ്ട്​. ക്ഷേത്രത്തിലും പരിസരത്തും സെപ്​റ്റംബർ 30 മുതൽ മാലിന്യം നിക്ഷേപിക്കുന്നവർക്ക്​ കോർപ്പറേഷൻ 50 രൂപ പിഴയും ചുമത്തുന്നുണ്ട്​.