അവിഹിത ബന്ധം സംശയിച്ച്​ യുവതിയെ കൊലപ്പെടുത്തിയ ഭർത്താവ്​ അറസ്​റ്റിൽ

ലഖ്‌നൗ: അവിഹിത ബന്ധം സംശയിച്ച്​ ഭാര്യയെ കൊലപ്പെടുത്തിയയാൾ അറസ്​റ്റിൽ. സരോജിനി നഗർ പൊലീസ്​ സ്​റ്റേഷൻ പരിധിയിൽ നാട്​കൂർ ഗ്രാമത്തിലാണ്​ സംഭവം. മദ്യപിച്ചാണ്​​ ഭർത്താവ്​ കൊല നടത്തിയത്​. 27കാരിയായ പൂനത്തെയാണ്​ ഭർത്താവ്​ കമൽ കിഷോർ കൊലപ്പെടുത്തിയത്.

ഭർത്താവിന്‍റെ സുഹൃത്തുക്കളിലൊരാളുമായി ഭാര്യക്ക്​ അവിഹിത ബന്ധമുണ്ടെന്ന സംശയത്തിലാണ്​ ​കൊല നടത്തിയത്​.  മൂർച്ചയേറിയ ആയുധം കൊണ്ട്​ മുറിപ്പെടുത്തിയാണ്​ കിഷോർ ഭാര്യയെ കൊലപ്പെടുത്തിയത്​.  കൊല നടത്തിയ കിഷോർ വീട്ടിൽ നിന്ന്​ രക്ഷപ്പെടുകയായിരുന്നു.

പൂനത്തിന്‍റെ ബന്ധുക്കൾക്ക്​ ഫോണിലൂടെയാണ്​ കൊലപാതകം സംബന്ധിച്ച്​ വിവരം ലഭിക്കുന്നത്​. പൂനത്തി​ന്‍റെ സഹോദരൻ കമലേഷും കുടുംബാംഗങ്ങളും വീട്ടിലെത്തുകയും ഭർത്താവിനെതിരെ പൊലീസിൽ പരാതി നൽകുകയുമായിരുന്നു.

കൊല നടത്താൻ ഉപയോഗിച്ച ആയുധം അന്വേഷണ സംഘം കണ്ടെടുത്തിട്ടുണ്ട്​. രക്ഷപ്പെടാൻ ശ്രമിക്കുന്നതിനിടെ കമാൽ കിഷോറിനെ ചർബാഗ്​ റെയിൽവെ സ്​റ്റേഷനിൽ നിന്ന്​ പൊലീസ്​ പിടികൂടുകയായിരുന്നു. പിടിയിലാകു​മ്പോഴും ഇയാൾ മദ്യലഹരിയിൽ ആയിരുന്നുവെന്ന്​ സ്​റ്റേഷൻ ഒാഫീസർ ധർമേന്ദ്രകുമാർ പറഞ്ഞു.

2010ലാണ്​ ഇവർ വിവാഹിതരായത്​. ഇവർക്ക്​ ആറും മൂന്നും വയസുള്ള രണ്ട്​ പെൺകുട്ടികളുണ്ട്​.