കാമുകിയെ കൊന്ന് കോണ്‍ക്രീറ്റ് അറയില്‍ കുഴിച്ചിട്ട യുവാവ് മാതാപിതാക്കളെയും കൊലപ്പെടുത്തി

ഭോപ്പാല്‍: യുവതിയെ കൊന്ന്​ കോൺക്രീറ്റ് അറയിൽ ഒളിപ്പിച്ച യുവാവ് ഏഴ്​ വർഷം മുമ്പ്​ സ്വന്തം മാതാപിതാക്കളെയും സമാനരീതിയില്‍ കൊലപ്പെടുത്തിയതായി പൊലീസ്.കൂടുതൽ ചോദ്യം ചെയ്​തപ്പോള്‍​ പ്രതി കുറ്റം സമ്മതിച്ചതായി പൊലീസ്​ ഉദ്യോഗസ്​ഥൻ അറിയിച്ചതായാണ് റിപ്പോര്‍ട്ടുകള്‍. മാതാപിതാക്ക​ൾ ത​ന്‍റെ ജീവിതത്തിൽ ഇടപെട്ടതിനാൽ അവരെ കൊന്ന്​ വീട്ടിൽ ഒളിപ്പിക്കുകയായിരുന്നുവെന്നാണ്​ പ്രതിയുടെ മൊഴി. 2011ല്‍ അച്ഛന്‍ വിജേന്ദ്ര ദാസിനെയും അമ്മ ഇന്ദ്രാണിയെയും കൊന്ന് വീട്ടിനുള്ളില്‍ അടക്കിയതായാണ് ഇയാള്‍ പൊലീസിനോട് സമ്മതിച്ചിരിക്കുന്നത്.

മധ്യ​പ്രദേശ്​ സാകേത്​ നഗർ സ്വദേശിയും 32കാരനുമായ ഉദ്യാൻ ദാസിനെ​ കഴിഞ്ഞ ദിവസമാണ് കാമുകിയെ കൊലപ്പെടുത്തിയ കേസിൽ പൊലീസ്​ അറസ്റ്റ് ചെയ്‍തത്​. പശ്ചിമ ബംഗാൾ സ്വദേശിയും 27കാരിയുമായ അകൻക്ഷയെ കാണാതായെന്ന മാതാപിതാക്കളുടെ പരാതിയിൽ പൊലീസ്​ നടത്തിയ അന്വേഷണത്തിലാണ്​ യുവതിയുടെ മൃതദേഹം ഉദ്യാൻ ദാസ്​  വീട്ടിനകത്ത് മാർബിൾ പാകിയ കോൺക്രീറ്റ് അറയിൽ ഒളിപ്പിച്ചതായി കണ്ടെത്തിയത്​.

2007ൽ ഓൺലൈൻ വഴിയാണ്​ അകൻക്ഷ  ഉദ്യാന്‍ ദാസി​നെ പരിചയപ്പെടുന്നത്. പിന്നീട്​ അമേരിക്കയിൽ ​ജോലി​ ലഭിച്ചതായി വീട്ടുകാരോട്​ കള്ളം പറഞ്ഞ യുവതി ഉദ്യാൻ ദാസിനൊപ്പം താമസമാരംഭിച്ചു. വീട്ടുകാര്‍ ബന്ധപ്പെടുമ്പോഴെല്ലാം താന്‍ അമേരിക്കയിലാണെന്നാണ് അകൻക്ഷ  പറഞ്ഞിരുന്നത്.

എന്നാല്‍ കഴിഞ്ഞ കുറച്ചു നാളായി യുവതിയുടെ ഒരുവിവരവും ഇല്ലാത്തതിനെ തുടർന്ന്​ സംശയം തോന്നിയ വീട്ടുകാർ ​പൊലീസിൽ പരാതിപ്പെടുകയായിരുന്നു. തുടർന്നാണ്​ യുവതി ഭോപ്പാലിൽ നിന്നാണ്​ ഫോണില്‍ വിളിച്ചിരുന്നതെന്ന്​​ കണ്ടെത്തുന്നത്​.

മറ്റൊരാളോട്​ യുവതി പതിവായി സംസാരിക്കുന്നത്​ സംബന്ധിച്ച്​ തർക്കമുണ്ടാവുകയും തുടർന്ന്​ ദാസ്​ യുവതിയെ ശ്വാസം മുട്ടിച്ച്​ കൊല്ലുകയുമായിരുന്നുവെന്നാണ്​ പൊലീസ്​ പറയുന്നത്​. ഡിസംബർ 27നായിരുന്നു കൊലപാതകം. തുടര്‍ന്ന് ​​ഇയാള്‍  യുവതിയുടെ മൃതദേഹത്തിൽ സിമൻറ്​ തേച്ച് സൂക്ഷിച്ചിരിക്കുകയായിരുന്നു. ശവകുടീരത്തിന്റെ മാതൃകയിലുള്ള സിമൻറ്​അറ വെട്ടിപ്പൊളിച്ചാണ്​ മൃതദേഹം പുറത്തെടുത്തത്​.

യുവാവിനെ ചോദ്യം ചെയ്യുമ്പോള്‍ കൂടുതല്‍ വിവരങ്ങള്‍ ലഭിക്കുമെന്നാണ് പൊലീസ് കരുതുന്നത്.