മുത്തലാഖ് വിഷയത്തില് നടക്കുന്നത് തത്പരകക്ഷികളുടെ കുപ്രചരണം: പി കെ കുഞ്ഞാലിക്കുട്ടി
Synopsis
മുത്തലാഖ് ബില്ലിന്മേലുള്ള വോട്ടെടുപ്പില് താന് ഹാജരായില്ലെന്നതുമായി ബന്ധപ്പെട്ട് ചില തല്പര കക്ഷികള് പ്രചാരണം നടത്തുന്നുണ്ടെന്നും ഇത് വസ്തുതാപരമായി ശരിയല്ലെന്നും മുസ്ലിം ലീഗ് ദേശീയ ജനറല് സെക്രട്ടറി പി കെ കുഞ്ഞാലിക്കുട്ടി എംപി
അബുദാബി: മുത്തലാഖ് ബില്ലിന്മേലുള്ള വോട്ടെടുപ്പില് താന് ഹാജരായില്ലെന്നതുമായി ബന്ധപ്പെട്ട് ചില തല്പര കക്ഷികള് പ്രചരണം നടത്തുന്നുണ്ടെന്നും ഇത് വസ്തുതാപരമായി ശരിയല്ലെന്നും മുസ്ലിം ലീഗ് ദേശീയ ജനറല് സെക്രട്ടറി പി കെ കുഞ്ഞാലിക്കുട്ടി എംപി. മുത്തലാഖ് ചര്ച്ച ബഹിഷ്കരിക്കാനായിരുന്നു തീരുമാനം. ചില കക്ഷികള് വോട്ടെടുപ്പില് പങ്കെടുത്തപ്പോള് ലീഗും തീരുമാനം മാറ്റി. ഇ ടി മുഹമ്മദ് ബഷീര് എതിര്ത്ത് വോട്ട് ചെയ്യുകയും ചെയ്തു.
പാര്ട്ടിപരമായും വിദേശയാത്രാപരമായും അത്യാവശ്യം ഉളളതിനാല് ഹാജരായില്ല എന്നും കുഞ്ഞാലിക്കുട്ടി വ്യക്തമാക്കി. മുത്തലാഖ് ബില്ല് ചര്ച്ചയില് കുഞ്ഞാലിക്കുട്ടി പങ്കെടുക്കാത്തതിനെതിരെ വിമര്ശനം ശക്തമാവുന്ന സാഹചര്യത്തിലാണ് പ്രതികരണം. മുത്തലാഖ് ബില് രണ്ടാം വട്ടം ലോക്സഭയില് വരുമ്പോള് ചര്ച്ചക്കു ശേഷം ബഹിഷ്കരിക്കുക എന്നാണ് കോണ്ഗ്രസ് ഉള്പ്പെടെയുള്ള കക്ഷികള് തീരുമാനിച്ചിരുന്നത്.
എന്നാല്, ചില കക്ഷികള് വോട്ടെടുപ്പില് പങ്കെടുക്കാന് പൊടുന്നനെ തീരുമാനിച്ചപ്പോള്, മുസ്ലിം ലീഗും പ്രതിഷേധ വോട്ട് ചെയ്യുന്നതാണ് നല്ലത് എന്ന് അപ്പോള്ത്തന്നെ താനും ഇ.ടി മുഹമ്മദ് ബഷീര് എംപിയും കൂടിയാലോചിച്ചു തീരുമാനിച്ചു. അദ്ദേഹം അത് നിര്വഹിക്കുകയും ചെയ്തു. അതിനാലാണ്, പാര്ട്ടിപരമായും വിദേശ യാത്രാപരമായും മറ്റും പല അത്യാവശ്യങ്ങളുള്ളതിനാല് പാര്ലമെന്റില് താന് ഹാജരാവാതിരുന്നത്. പെട്ടെന്ന് എടുത്ത തീരുമാനമായതിനാലാണ് എതിര്ത്ത് വോട്ട് ചെയ്യാന് 11 പേര് മാത്രം ഉണ്ടായത്. പൂര്ണമായ നിലക്കുള്ള വോട്ടെടുപ്പല്ല അവിടെ നടന്നതും. വസ്തുത ഇതായിരിക്കെ, കുപ്രചാരണമാണ് ചില കേന്ദ്രങ്ങള് നടത്തുന്നതെന്നും അദ്ദേഹം വ്യക്തമാക്കി.
കേരളത്തിലെ എല്ലാ വാർത്തകൾ Kerala News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam