ക്ഷേത്രോത്സവത്തിന് പാചകക്കാരിയായി പഞ്ചായത്ത് പ്രസിഡന്റ്

കാസര്‍കോട്:  നാട്ടിലെ ഉത്സവത്തില്‍ പാചകക്കാരിയായി പഞ്ചായത്ത് പ്രസിഡന്റ്. വെസ്റ്റ് എളേരി ഗ്രാമ പഞ്ചായത്ത് പ്രസിഡന്റ് പ്രസീത രാജനാണ് വീടിന് മുന്നിലെ ഭഗവതി ക്ഷേത്രത്തിലെ കളിയാട്ട മഹോത്സവത്തില്‍ അടുക്കളക്കാരിയുടെ റോളിലുള്ളത്. പ്രസിദ്ധമായ കമ്മാടം ഭവതി ക്ഷേത്രത്തിലെ കളിയാട്ടം തുടങ്ങിയതോടെയാണ് സി.പി.എം ഭരിക്കുന്ന പഞ്ചായത്തിന്റെ സാരഥി പാചകക്കാരിയായത്. ക്ഷേത്രത്തിലെത്തുന്നവര്‍ക്ക് ഭക്ഷണം വിളമ്പിയും. പാചകം ചെയ്തും പാത്രം കഴുകിയും ഈ പ്രസിഡന്റ് താരമാവുകയാണ്.

തിരക്ക് പിടിച്ച എല്ലാ പരിപാടികളും മാറ്റിവെച്ച് പ്രസീദ രാജന്‍ ഇനിയുള്ള നാള്‍ ഉത്സവം തീരുംവരെ കമ്മാടം ക്ഷേത്രത്തിലായിരിക്കും. കമ്മാടം ഭവതി ക്ഷേത്രത്തിലെ മാതൃസമിതി പ്രസിഡണ്ടായിരിക്കെയാണ് പ്രസീതാ രാജന്‍ എന്ന 38 കാരി ഒരു ഗ്രാമത്തിന്റെ തന്നെ പ്രസിഡണ്ടായത്. ഇപ്പോള്‍ ക്ഷേത്ര മാതൃസമിതിയുടെ ട്രഷററാണ് പ്രസീത രാജന്‍. നിനച്ചിരിക്കാതെ വന്ന പദവി ലഭിച്ചത് കമ്മാടത്തമ്മയുടെ അനുഗ്രഹമാണെന്ന വിശ്വാസത്തിലാണ് ഇവര്‍. നിലവില്‍ പ്രസീതരാജന്‍ ക്ഷേത്രത്തിലെ മാതൃസമിതിയുടെ ട്രഷററാണ്.