തായ് ​ഗുഹയിൽ അകപ്പെട്ട കുട്ടികൾക്ക് വേണ്ടി മണൽശിൽപ്പവുമായി സാൻഡ് ആർട്ടിസ്റ്റ്

ആ കുട്ടികൾ സുരക്ഷിതരായി വീട്ടിലെത്താൻ ഞാൻ പ്രാർത്ഥിക്കുന്നു  രക്ഷാപ്രവർത്തനത്തിൽ മരണപ്പെട്ട നേവി ഉദ്യോ​ഗസ്ഥന് ആദരാജ്ഞലി അർപ്പിക്കുന്നു

തായ് ലാന്റ്: വടക്കൻ തായ് ലാന്റിലെ തം ലുവാങ്ങ് ​ഗുഹയിൽ അകപ്പെട്ട കുട്ടികൾക്ക് വേണ്ടി മണൽ ശിൽപ്പമൊരുക്കി ഒറീസ സ്വദേശിയായ അന്തർദ്ദേശീയ സാൻഡ് ആർട്ടിസ്റ്റ് സുദർശൻ പട്നായിക്. ഒഡിഷയിലെ പുരി ബീച്ചിൽ സുദർശൻ ഒരുക്കിയ മണൽശിൽപം ഈ കുട്ടികൾക്ക് വേണ്ടിയുള്ള പ്രാ‍ർത്ഥനയാണ്. രക്ഷാ പ്രവർത്തനത്തിൽ മരണപ്പെട്ട സമൻ കുനാൻ എന്ന നേവി ഉദ്യോ​ഗസ്ഥന് ആദരാജ്ഞലി അർപ്പിച്ചും മണൽശിൽപം തയ്യാറാക്കിയിട്ടുണ്ട്. 

രണ്ടാഴ്ച മുമ്പാണ് പന്ത്രണ്ട് കുട്ടികളും കോച്ചും വടക്കൻ തായ് ലാന്റിലെ തം ലുവാങ് ​​ഗുഹയിൽ‌ അകപ്പെട്ട് പോയത്. അപ്രതീക്ഷിതമായി മഴ പെയ്തതിനെത്തുടർന്ന് ​ഗുഹാമുഖം ഇടിഞ്ഞ് വീഴുകയും ​ഗുഹയ്ക്കുള്ളിൽ‌ വെള്ളം നിറയുകയുമായിരുന്നു. തന്റെ മണൽ ശിൽപ്പത്തിലും ഇതേ സംഭവം തന്നെയാണ് ആർട്ടിസ്റ്റ് സുദർശൻ പട്നായിക് സ്വീകരിച്ചിരിക്കുന്നത്. യഥാർത്ഥ ഹീറോയ്ക്ക് ആദരാജ്ഞലികൾ എന്നാണ് സമൻ കുനാന്റെ ശിൽപത്തിലെ വാക്കുകൾ. അഞ്ച് ടൺ മണൽ ഉപയോ​ഗിച്ച് മൂന്ന് മണിക്കൂർ കൊണ്ടാണ് സുദർശൻ ഈ ശിൽപം പൂർത്തിയാക്കിയത്. ഇവയ്ക്ക് നാലടി ഉയരമുണ്ട്. തന്റെ ട്വിറ്റർ അക്കൗണ്ടിലൂടെയാണ് ഈ ശിൽപങ്ങളുടെ ചിത്രം സുദർശൻ പങ്ക് വച്ചിരിക്കുന്നത്. 

''ആ കുട്ടികൾ സുരക്ഷിതരായി വീട്ടിലെത്താൻ ഞാൻ പ്രാർത്ഥിക്കുന്നു. അതുപോലെ രക്ഷാ പ്രവർത്തനത്തിൽ മരണപ്പെട്ട നേവി ഉദ്യോ​ഗസ്ഥന് ആദരാജ്ഞലി അർപ്പിക്കുകയും ചെയ്യുന്നു'' സുദർശൻ പറയുന്നു. പന്ത്രണ്ട് കുട്ടികളിൽ എട്ട് പേരെ പുറത്തെത്തിച്ചു കഴിഞ്ഞു. ഇനി നാല് കുട്ടികളും കോച്ചും കൂടി മാത്രമേ ​ഗുഹയിൽ അവശേഷിക്കുന്നുള്ളൂ. ഇവരെ രക്ഷപ്പെടുത്താനുള്ള മൂന്നാം ഘട്ട രക്ഷാ പ്രവർത്തനത്തിലാണ് ഇപ്പോൾ തായ് നേവി ഉദ്യോ​ഗസ്ഥർ. ലോകം മുഴുവനും ഇപ്പോൾ ഈ കുഞ്ഞുങ്ങളുടെ രക്ഷയിലേക്കാണ് പ്രാർത്ഥനകളോടെ കാത്തിരിക്കുന്നത്.