ഷവര്‍മ ഉണ്ടാക്കാന്‍ കൊണ്ടുവന്ന രണ്ട് ക്വിന്‍റല്‍ ഇറച്ചി മാലിന്യം പിടികൂടി

കോഴിക്കോട്: വിലങ്ങാട് ഉരുട്ടിയില്‍ രണ്ട് ക്വന്‍റല്‍ ഇറച്ചി മാലിന്യം ആരോഗ്യവകുപ്പ് പിടികൂടി. ഇതര സംസ്ഥാന തൊഴിലാളികളായ രണ്ട് പേരെ കസ്റ്റഡിയിലെടുത്തു. ഷവര്‍മ്മയെന്ന ഭക്ഷണ പദാര്‍ത്ഥിത്തില്‍ ഉപയോഗിക്കാന്‍ തയ്യാറാക്കിവെച്ചതാണ് ഇറച്ചിയെന്ന് ആരോഗ്യ വകുപ്പ് ഉദ്യോഗസ്ഥര്‍ പറഞ്ഞു.

പശു, പോത്ത് ,ആട് എന്നിവയുടെ ആന്തര ഭാഗങ്ങളിലുള്ള ഇറച്ചിയാണ് ആരോഗ്യവകുപ്പ് പിടിച്ചെടുത്തത്. ഇറച്ചി അവശിഷ്ടങ്ങള്‍ അമോണിയവും ഉപ്പും ചേര്‍ത്ത നിലയിലായിരുന്നു. ജാതിയേരി സ്വദേശിയായ ഒരാളുടെ പറമ്പിലെ ഷെഡില്‍ നിന്നാണ് ഇറച്ചി പിടികൂടിയത്. ഉണക്കി സൂക്ഷിച്ച നിലയിലും ഇവിടെ നിന്ന് ഇറച്ചി കണ്ടെടുത്തു. ഷവര്‍മയില്‍ കോഴിയിറച്ചിക്കൊപ്പം ചേര്‍ത്ത് വില്‍പനനടത്താനാണ് ഇവ തയ്യാറാക്കിയതെന്ന് ആരോഗ്യ വകുപ്പ് ഉദ്യോഗസ്ഥര്‍ പറഞ്ഞു.

ദുര്‍ഗന്ധം അനുഭവപ്പെട്ടതിനെ തുടര്‍ന്ന് നാട്ടുകാരുടെ പരാതിയിലാണ് ആരോഗ്യവകുപ്പ് ഷെഡില്‍ പരിശോധന നടത്തിയത്.കുറ്റ്യാടി പൊലീസ് കേസ്സെടുത്തു. മാംസം സംസ്കരിച്ചിരുന്ന ഷെഡില്‍ ജോലി ചെയ്ത രണ്ട് ഇതര സംസ്ഥാന തൊഴിലാളികളെ പൊലീസ് കസ്റ്റഡിയിലെടുത്തു. വടകര, നാദാപുരം , കുറ്റ്യാടി എന്നിവിടങ്ങളില്‍ ഷവര്‍മ്മ വില്‍പ്പന നടത്തുന്ന കടകളില്‍ അന്വേഷണം  നടത്തുമെന്ന് ആരോഗ്യവകുപ്പ് ഉദ്യോഗസ്ഥര്‍ അറിയിച്ചു.