പിടികൊടുക്കാതെ പൊലീസിനെ ചുറ്റിച്ച മോഷ്​ടാവ്​ ‘നയൻതാര’ക്ക്​ മുന്നിൽ കീഴടങ്ങി

ദില്ലി: പിടികൊടുക്കാതെ പൊലീസിനെ ചുറ്റിച്ച മോഷണ സംഘാം​ഗത്തെ വലയിൽ വീഴ്​ത്താൻ ഒടുവിൽ ദക്ഷിണേന്ത്യൻ താരസുന്ദരി നയൻതാര ത​ന്നെ വേണ്ടിവന്നു. നയൻതാരയുടെ ‘വേഷം കെട്ടി’ ഇറങ്ങിയ വനിതാ ​പൊലീസ്​ ഒാഫീസർക്ക്​ മുന്നിൽ സർവവും സമർപ്പിച്ച്​ മോഷ്​ടാവ്​ കീഴടങ്ങിയതോടെ തല​വേദന ഒഴിഞ്ഞ ആശ്വാസത്തിലാണ്​ ബീഹാർ പൊലീസ്​. 

പാറ്റ്​നയിൽ നിന്ന്​ 150 കിലോമീറ്റർ അകലെ ദർഭംഗ ജില്ലയിലെ ബി.ജെ.പി നേതാവ്​ സഞ്​ജയ്​കുമാർ മഹതോയുടെ വിലകൂടിയ മൊബൈൽ കവർന്ന മോഷ്​ഠാവിനെയാണ്​ നയൻതാരയിലൂടെ പൊലീസ്​ പിടികൂടിയത്​. മൊബെൽ മോഷണം സംബന്ധിച്ച്​ അസി.സബ്​ ഇൻസ്​പെക്​ടർ മധുബാല ദേവിക്ക്​ പരാതി നൽകിയിരുന്നു.

മുഹമ്മദ്​ ഹസ്​നൈൻ എന്നയാളാണ്​ ഫോൺ ഉപയോഗിക്കുന്നതെന്ന്​ കോൾ വിവരങ്ങൾ പരിശോധിച്ച പൊലീസി​ന്‍റെ അ​ന്വേഷണത്തിൽ കണ്ടെത്തി. ഇയാളെ കുരുക്കാൻ പൊലീസ്​ പലതവണ ശ്രമിച്ചെങ്കിലും രക്ഷപ്പെടുകയായിരുന്നു. ഇതോടെ പൊലീസ്​ തന്ത്രം മാറ്റി. പൊലീസ്​ ഒാഫീസർ ആയ മധുബാല തന്നെ കെണിയൊരുക്കി. ഹസനൈനുമായി ഫോണിൽ പ്രണയാഭ്യർഥന നടത്തിയായിരുന്നു ഇത്.

ദിവസവും ഇടവേളകളിൽ പൊലീസ്​ ഒാഫീസർ പ്രണയമാണെന്ന വ്യാജേന മോഷ്​ഠാവിനെ വിളിക്കാൻ തുടങ്ങി. ആദ്യമൊന്നും താൽപര്യം കാണിക്കാതിരുന്ന ഹസനൈൻ പതിയെ തന്ത്രത്തിൽ വീണു. പ്രണയിക്കുന്ന പെൺകുട്ടിയുടെ ​ഫോട്ടോ വേണമെന്നായി ഹസനൈൻ. മധുബാലയാക​ട്ടെ തന്‍റെ മൊബൈൽ ഫോൺ ​പ്രൊഫൈൽ പിക്​ചറായി നയൻതാരയുടെ ചിത്രം ഉപയോഗിച്ചു. 
ചിത്രം കണ്ടുമതിമറന്ന ഹസനൈന്​ ‘കാമുകി’യെ നേരിട്ട്​ കാണാൻ ധൃതിയായി. ദർഭംഗ സിറ്റിയിലെ ഒരിടത്ത്​ ​വെച്ച്​ കാണാമെന്ന്​ ഇരുവരും ധാരണയായി. നിശ്​ചയിച്ച സ്​ഥലത്ത്​ ഹസനൈൻ എത്തിയതോടെ പൊലീസ്​ അറസ്​റ്റ്​ ചെയ്യുകയായിരുന്നു.

മധുബാലയാക​ട്ടെ സ്​ഥലത്തെത്തിയത്​ ബുർഖ ധരിച്ചുകൊണ്ടായിരുന്നു. അതിനാൽ ഇവരെ തിരിച്ചറിയാൻ ഹസനൈന്​ കഴിഞ്ഞതുമില്ല. സ്​ഥലത്ത്​ വേഷം മാറി എത്തിയ മറ്റ്​ പൊലീസുകാരുടെ സഹായത്തോടെ ഹസനൈനെ കീഴടക്കുകയായിരുന്നു. എന്നാൽ മൊബൈൽ ഫോൺ താൻ ​മറ്റൊരു കുറ്റവാളിയിൽ നിന്ന്​ 4500 രൂപക്ക്​ വാങ്ങിയതാണെന്ന്​ ഹസനൈൻ പറഞ്ഞു. ഇയാൾ നൽകിയ വിവരം അനുസരിച്ച്​ മൊബൈൽ വിറ്റയാൾ എന്ന്​ കരുതുന്നയാളെയും പൊലീസ്​ പിടികൂടി. കേസന്വേഷണത്തിലെ ബുദ്ധിസാമർഥ്യത്തിന്​ ബീഹാർ പൊലീസ്​ മധുബാല ​ദേവിക്ക്​ ബഹുമതിയും പ്രഖ്യാപിച്ചു. ഇന്ത്യ ടുഡേയാണ് വാര്‍ത്ത റിപ്പോര്‍ട്ട് ചെയ്തത്.