ആധാർ ബന്ധിപ്പിച്ചില്ല​; മൊബൈൽ കമ്പനി പണി കൊടുത്തത്​ ആധാർ മേധാവിക്ക്​

ബംഗളുരു: മൊബൈൽ നമ്പർ ആധാറുമായി ബന്ധിപ്പിക്കാനുള്ള സേവനദാതക്കളുടെ ശ്രമത്തിനിടയിൽ ആധാർ കാർഡ്​ അനുവദിക്കുന്ന യു.ഐ.ഡി പ്രൊജക്​ട്​ ഡയറക്​ടർക്കും പണികിട്ടി. മൊബൈൽ നമ്പർ ആധാറുമായി ബന്ധിപ്പിച്ചില്ലെന്ന കാരണം പറഞ്ഞ്​ ഡയറക്​ടറുടെ നമ്പറിലേക്കുള്ള സേവനം തടയുകയായിരുന്നു. കർണാടകയിലെ ആധാർ പ്രൊജക്​ട്​ ഡയറക്​ടർ എച്ച്​.എൽ പ്രഭാകറിനെയാണ്​ ആധാർ ബന്ധം കുരുക്കിലാക്കിയത്​. അഞ്ച്​ ദിവസം മുമ്പാണ്​ സേവനം തടഞ്ഞതെന്ന്​ പ്രഭാകർ പറയുന്നു. 

അതേസമയം, വൺ ടൈം പാസ്​വേഡ്​ ഒാതൻറിക്കേഷൻ രീതിയിൽ താൻ ആധാറുമായി ഫോൺ നമ്പർ ബന്ധിപ്പിച്ചിട്ടുണ്ടെന്നാണ്​ പ്രഭാകർ പറയുന്നത്​. എന്നാൽ കണക്ഷൻ പുനഃസ്​ഥാപിക്കാൻ ആധാർ മേധാവി വിരലടയാളം നൽകണ​മെന്നാണ്​ സേവനദാതാക്കൾ പറയുന്നത്​. ഫോൺ പ്രവർത്തന രഹിതമായപ്പോൾ കസ്​റ്റമർ കെയറിൽ ബന്ധപ്പെട്ടപ്പോൾ സാങ്കേതിക പിഴവാണെന്നായിരുന്നു മറുപടി.

പലതവണ വിളി​ച്ചപ്പോൾ കസ്​റ്റമർ കെയർ ഒൗട്ട്​ലെറ്റിൽ പോയി ആധാർ ബന്ധിപ്പിക്കാൻ വിരലടയാളം നൽകാൻ നിർദേശിച്ചു. എന്നാൽ ത​ന്‍റെ ആധാർ വെരിഫിക്കേഷൻ നടപടികൾ പൂർത്തിയായതാണെന്നും നിയമം തനിക്ക്​ അറിയാമെന്നും പ്രഭാകർ പറഞ്ഞു. ജനങ്ങൾക്ക്​ തിരിച്ചറിയൽ കാർഡ്​ നൽകുന്ന വിഭാഗത്തി​ന്‍റെ മേധാവിയായ തന്നെ മൊബൈൽ സേവനദാതാക്കൾ വിഢിയാക്കുകയാണെന്ന്​ പ്രഭാകർ പറയുന്നു.

മാത്രവുമല്ല, സിം കാർഡ്​ വീണ്ടും പ്രവർത്തിപ്പിക്കാനായി തിരിച്ചറിയൽ രേഖ ഹാജരാക്കണമെന്നും ഇവർ ആവശ്യപ്പെടുന്നു. ഇത് പരിഹാസ്യകരമാണെന്നും താൻ എന്തിന്​ വീണ്ടും ​ഐഡൻറിറ്റി തെളിയിക്കണ​മെന്നും പ്രഭാകർ ചോദിക്കുന്നു. കണക്ഷൻ എടുക്കുന്ന സമയത്ത്​ തന്നെ ആവശ്യമായ രേഖകൾ എല്ലാം സമർപ്പിച്ചതാണ്​. പിന്നീട്​ ആധാർ ഒാതന്‍റിക്കേഷൻ ലഭിക്കുകയും ചെയ്​തു.

ആളുകൾക്ക്​ ​തിരിച്ചറിയൽ കാർഡ്​ നൽകുന്ന ഡിവിഷന്‍റെ മേധാവിയെയാണ്​ സേവനദാതാക്കൾ​ വിഢിയാക്കാൻ ശ്രമിക്കുന്നതെന്നും പ്രഭാകർ പറയുന്നു. എന്നാൽ ആരുടെയും സിം കണക്ഷൻ വിഛേദിച്ചിട്ടില്ലെന്നാണ്​ കമ്പനിയുടെ വക്​താവ്​ പറയുന്നത്​. ടെലികോം മന്ത്രാലയം നിർദേശിച്ചതനുസരിച്ച്​ ആധാറുമായി ബന്ധിപ്പിക്കാൻ ഒാർമപ്പെടുത്തി ഉപഭോക്​താക്കൾക്ക്​ പലതവണ സന്ദേശം നൽകിയിട്ടു​ണ്ടെന്നും കമ്പനി പറയുന്നു​.