സ്വന്തം കാര്‍ ഓടിച്ചുവന്ന മന്ത്രി കണ്ണന്താനത്തിനെ പൊലീസ് തടഞ്ഞു

ദില്ലി: സ്വന്തം കാർ ഒാടിച്ചെത്തിയ കേന്ദ്രമന്ത്രി അൽഫോൺസ്​ കണ്ണന്താനത്തെ സുരക്ഷാ ഉദ്യോഗസ്​ഥർ ഒാഫീസിന്​ പുറത്തുതടഞ്ഞു. സ്വന്തം കാറിൽ ഒൗദ്യോഗിക സ്​റ്റിക്കറുകൾ ഒന്നുമില്ലാതെയായിരുന്നു മന്ത്രിയുടെ യാത്ര. ഞായറാഴ്ച പാർലമെന്‍റ്​ ഹൗസിന്​ സമീപത്തെ ട്രാൻസ്​പോർട്​ ഭവനിലെ ഒാഫീസിലേക്ക്​ കാറോടിച്ചെത്തിയ മന്ത്രിയെ കെട്ടിടത്തി​ന്‍റെ പ്രവേശന കവാടത്തിൽ സി.​ഐ.എസ്​.എഫ്​ ഉദ്യോഗസ്​ഥർ തടയുകയായിരുന്നു.  

ആരാണെന്നു തിരക്കിയ ഉദ്യോഗസ്​ഥർ പാസുണ്ടെങ്കിൽ മാത്രമേ പ്രവേശിക്കാനാവൂ എന്നും വ്യക്​തമാക്കി. സ്വകാര്യവാഹനത്തിൽ എത്തിയതാണ്​ മന്ത്രിയെ സുരക്ഷാ ഉദ്യോഗസ്​ഥരുടെ ഗേറ്റ്​ പരിശോധനയിൽ കുരുക്കിയത്​. ഭരണാധികാരികൾ വാഹനങ്ങളിൽ നിന്ന്​ ചുവന്ന ലൈറ്റ്​ സംസ്​കാരം ഉ​പേക്ഷിച്ച്​ സാധാരണക്കാരെ പോലയാവണമെന്ന പ്രധാനമന്ത്രി നരേന്ദ്രമോദിയുടെ നിർദേശത്തോട്​ പലരും വൈമുഖ്യം പ്രകടിപ്പിച്ചിരുന്നു.

ഇതിന്​ പിന്നാലെയാണ്​ കേന്ദ്ര ടൂറിസം സഹമന്ത്രിയായ അൽഫോൺസ്​ കണ്ണന്താനത്തിന്​ ഒാഫീസ്​ ഗേറ്റിൽ പരിശോധന നേരിടേണ്ടിവന്നത്​. അതേസമയം, ഉദ്യോഗസ്​ഥരുടെ ജാഗ്രതയെ മന്ത്രി പ്രശംസിച്ചു.