സീറ്റില്ല, കൈക്കുഞ്ഞുമായി മെട്രോയിൽ നിലത്തിരിക്കുന്ന അമ്മ; വീഡിയോ പങ്കുവച്ച് ഐഎഎസ് ഉദ്യോഗസ്ഥൻ

കൈക്കുഞ്ഞുമായി കയറിയ അമ്മയ്ക്ക് സീറ്റ് നൽകാതെ ആളുകൾ സുഖമായി ഇരിക്കുകയാണല്ലോ, എന്നാണ് സോഷ്യൽ മീഡിയയിൽ ഉയരുന്ന വിമർശനം.

ദില്ലി: ​ദില്ലി മെട്രോയിൽ യാത്ര ചെയ്യുന്ന അമ്മയുടെയും കുഞ്ഞിന്റെയും ദൃശ്യങ്ങളാണ് ഇപ്പോൾ സോഷ്യൽ മീഡിയയിൽ പ്രചരിക്കുന്നത്. ധാരാളം പേ‍ർ കുട്ടികളുമായി യാത്ര ചെയ്യുന്ന ദില്ലി മെട്രോയിൽ ഈ അമ്മയുടെയും കുഞ്ഞിന്റെയും യാത്ര സോഷ്യൽ മീഡിയ ഏറ്റെടുക്കുന്നത് എന്തിനാണെന്നല്ലേ...! എല്ലാവരും സീറ്റിലിരുന്ന് യാത്ര ചെയ്യുമ്പോൾ ഈ അമ്മ തന്റെ കൈക്കുഞ്ഞുമായി മെട്രോയുടെ ബേസിലാണ് ഇരിക്കുന്നത്. തന്റെ കുഞ്ഞിനെ മടിയിൽ വച്ച് ചടഞ്ഞിരിക്കുകയാണ് ഈ അമ്മ. കൈക്കുഞ്ഞുമായി കയറിയ അമ്മയ്ക്ക് സീറ്റ് നൽകാതെ ആളുകൾ സുഖമായി ഇരിക്കുകയാണല്ലോ, എന്നാണ് സോഷ്യൽ മീഡിയയിൽ ഉയരുന്ന വിമർശനം.

ഐഎഎസ് ഉദ്യോഗസ്ഥൻ അവനീഷ് ശരൺ ആണ് വീഡിയോ പങ്കുവെച്ചിരിക്കുന്നത്. യഥാ‍ർത്ഥ സ്വഭാ​വം വ്യക്തമാക്കുന്നത് ബിരുദമല്ല, പകരം പെരുമാറ്റമാണെന്നാണ് ട്വീറ്റിൽ അവനീഷ് ശരൺ കുറിച്ചത്. ഏഴ് ലക്ഷത്തിലധികം ആളുകളാണ് വീഡിയോ കണ്ടത്. അവിടെ നിരവധി സ്ത്രീകൾ സീറ്റിൽ ഇരിക്കുന്നുണ്ടായിരുന്നെങ്കിലും ഒരാൾ പോലും അവരെ ​ഗൗനിച്ചില്ല.  ചിലർ വീഡിയോയിൽ കാണുന്ന സ്ത്രീകളെ വിമർശിക്കുകയായിരുന്നു. എന്നാൽ ഇതൊരു പഴ വീഡിയോ ആണെന്നും പലരും സ്ത്രീക്ക് സീറ്റ് വാ​ഗ്ദാനം ചെയ്തിട്ടും അവ‍ർ ഇരിക്കാതിരുന്നതാണെന്ന് ചിലർ ട്വീറ്റിന് കമന്റ് ചെയ്തു.