കാ​മു​ക​നെ വിട്ടുകിട്ടാന്‍  വീ​ട്ടു​പ​ടി​ക്ക​ൽ  സ​മ​രവുമായി കാമുകി

ഖ​മ്മം: തന്‍റെ പ്രണയം തിരിച്ചുപിടിക്കാനായി കാമുകന്‍റെ വീ​ട്ടു​പ​ടി​ക്ക​ലില്‍ കാ​മു​കി​യുടെ വേറിട്ട സ​മ​രം. തെ​ലു​ങ്കാ​ന​യി​ലെ ഭ​ദ്രാ​ദ്രി കൊ​ഥാ​ഗു​ഡം ജി​ല്ല​യി​ലെ സീ​താം​പേ​ട്ട് ബ​ഞ്ചാ​ര​യി​ലാ​ണ് സംഭവം. മു​ള​ക​പ്പ​ള്ളി മ​ണ്ഡ​ൽ സ്വ​ദേ​ശ​നി​യാ​യ ബോ​ഡ രാ​ജ​മ്മ​യാ​ണ് (27) കാ​മു​ക​നെ വി​ട്ടു​കി​ട്ട​ണ​മെ​ന്നാ​വ​ശ്യ​പ്പെ​ട്ട്  സമരം ചെയ്യുന്നത്. 

രാ​ജ​മ്മ​യും സീ​താം​പേ​ട്ട് ബ​ഞ്ചാ​ര സ്വ​ദേ​ശി ലാ​വു​ദ്യ വെ​ങ്കി​ടേ​ശ്വ​ര​ലു​വും ഏ​ഴു വ​ർ​ഷ​മാ​യി പ്ര​ണ​യ​ത്തി​ലാ​ണ്. ഖ​മ്മം ന​ഗ​ര​ത്തി​ൽ ബി​രു​ദ​പ​ഠ​ന​ത്തി​ന്‍റെ കാ​ല​ത്താ​യി​രു​ന്നു വെ​ങ്കി​ടേ​ശ്വ​ര​ലു​വു​മാ​യി പ്ര​ണ​യ​ത്തി​ലാ​യ​ത്. നെ​ല്ലൂ​രി​ൽ സെ​ക്യൂ​രി​റ്റി ഗാ​ർ​ഡാ​യി ജോ​ലി ചെ​യ്യു​ക​യാ​ണ് വെ​ങ്കി​ടേ​ശ്വ​ര​ലു. ത​ന്നെ വി​വാ​ഹം ക​ഴി​ക്കാ​മെ​ന്ന് വെ​ങ്കി​ടേ​ശ്വ​ര​ലു വാ​ക്ക് ന​ൽ​കിയിരുന്നുവെന്ന് രാ​ജ​മ്മ പ​റ​യു​ന്നു.

എ​ന്നാ​ൽ വെ​ങ്കി​ടേ​ശ്വ​ര​ലു​വി​ന്‍റെ വീ​ട്ടു​കാ​ർ‌​ക്ക് ഈ ​വി​വാ​ഹ​ത്തി​ൽ താ​ൽ‌​പ​ര്യ​മി​ല്ലായിരുന്നു. നെ​ല്ലൂ​രി​ൽ​നി​ന്ന് വെ​ങ്കി​ടേ​ശ്വ​ര​ലു​വി​നെ വീ​ട്ടു​കാ​ർ ത​ട്ടി​ക്കൊ​ണ്ടു​പോ​യി ഒ​ളി​വി​ൽ‌ താ​മ​സി​പ്പി​ച്ചി​രി​ക്കു​ക​യാ​ണെ​ന്നും രാ​ജ​മ്മ പ​റ​യു​ന്നു. ഇ​തോ​ടെ​യാ​ണ് വെ​ങ്കി​ടേ​ശ്വ​ര​ലു​വി​ന്‍റെ വീ​ടി​നു മു​ന്നി​ൽ രാ​ജ​മ്മ സ​മ​രം ആ​രം​ഭി​ച്ച​ത്.

വീ​ട്ടു​കാ​ർ വെ​ങ്കി​ടേ​ശ്വ​ര​ലു​വി​നെ വി​ട്ടു​ന​ൽ​കു​ക​യോ പോ​ലീ​സ് ഇ​ട​പെ​ടു​ക​യോ ചെ​യ്യു​ന്ന​തു​വ​രെ സ​മ​രം തു​ട​ര​നാ​ണ് രാ​ജ​മ്മ​യു​ടെ തീ​രു​മാ​നം. അതേസമയം വെ​ങ്കി​ടേ​ശ്വ​ര​ലു​വി​ന്‍റെ വീട് പൂട്ടിക്കിടക്കുകയാണ്.