ഇടുക്കിയിലെ കർഷക ആത്മഹത്യ; എം എം മണി രാജി വെക്കണമെന്ന് ഡീൻ കുര്യാക്കോസ്

റോമാ നഗരം കത്തിയപ്പോൾ വീണ വായിച്ച നീറോ ചക്രവർത്തിയെ പോലെയാണ് ജോയ്‌സ് ജോർജ് എംപിയെന്നും   യൂത്ത്‌ കോൺഗ്രസ്‌ പ്രസിഡന്‍റ് ഡീൻ കുര്യാക്കോസ്

ഇടുക്കി: ഇടുക്കിയിലെ കർഷക ആത്മഹത്യയുടെ ഉത്തരവാദിത്തം ഏറ്റെടുത്ത് മന്ത്രി എം എം മണി രാജി വെക്കണമെന്ന് യൂത്ത്‌ കോൺഗ്രസ്‌ സംസ്‌ഥാന പ്രസിഡന്‍റ്  ഡീൻ കുര്യാക്കോസ്. ഇടുക്കിയിലെ കർഷകർക്ക് വേണ്ടി സർക്കാർ ഒന്നും ചെയ്തില്ലെന്നും കർഷകരുടെ കടം അടിയന്തിരമായി എഴുതി തള്ളണമെന്നും ഡീൻ കുര്യോക്കോസ് പറഞ്ഞു. റോമാ നഗരം കത്തിയപ്പോൾ വീണ വായിച്ച നീറോ ചക്രവർത്തിയെ പോലെയാണ് ജോയ്‌സ് ജോർജ് എംപിയെന്നും യൂത്ത്‌ കോൺഗ്രസ്‌  പ്രസിഡന്‍റ് പറഞ്ഞു. 

അടിമാലി  ഇരുന്നൂറേക്കർ കുന്നത്ത് സുരേന്ദ്രനാണ് ആത്മഹത്യ  ചെയ്തത്. ഒരു മാസം മുമ്പ് റബ്ബറിനടിക്കുന്ന കീടനാശിനി കഴിച്ച് ചികിത്സയിലായിരുന്ന സുരേന്ദ്രൻ ഇന്നു പുലർച്ചെയാണ് മരിച്ചത്.

കാ‌‌‌ർഷിക ​ഗ്രാമ വികസന ബാങ്കിൽ നിന്ന് ആറു ലക്ഷത്തോളം രൂപ സുരേന്ദ്രൻ വായ്പ എടുത്തിരുന്നു. ഒരേക്കർ കൃഷി ഭൂമി പണയപ്പെടുത്തിയാണ്  സുരേന്ദ്രൻ വായ്പയെടുത്തത്. ബാങ്കിൽ നിന്ന് ജപ്തി നോട്ടീസ് ലഭിച്ചതിന്‍റെ മനോവിഷമത്തിലാണ് സുരേന്ദ്രൻ ആത്മഹത്യ ചെയ്തതെന്ന് ബന്ധുക്കൾ പറയുന്നു. കഴിഞ്ഞ ഒന്നരമാസത്തിനിടെ ഇടുക്കി ജില്ലയിൽ ആത്മഹത്യ ചെയ്യുന്ന മൂന്നാമത്തെ ക‌‌ർഷകനാണ് സുരേന്ദ്രൻ.