മനം നിറച്ച് മനു! പാരീസില് ആദ്യ മെഡല് വെടിവെച്ചിട്ട് ഇന്ത്യ, ഷൂട്ടിംഗില് വെങ്കലം
Synopsis
യോഗ്യതാ റൗണ്ടില് മൂന്നാം സ്ഥാനത്ത് ഫിനിഷ് ചെയ്താണ് 22കാരിയായ മനു ഭാക്കര് ഫൈനലിന് യോഗ്യത നേടിയിരുന്നത്.
പാരീസ്: പാരീസ് ഒളിംപിക്സില് ഇന്ത്യക്ക് ആദ്യ മെഡല്. വനിതകളുടെ 10 മീറ്റര് എയര് പിസ്റ്റളില് മനു ഭാകര് വെങ്കലം നേടി. നേരിയ പോയിന്റിന്റെ വ്യത്യാസത്തിലാണ് താരത്തിന് വെള്ളി നഷ്ടമായത്. യോഗ്യതാ റൗണ്ടില് മൂന്നാം സ്ഥാനത്ത് ഫിനിഷ് ചെയ്താണ് 22കാരിയായ മനു ഭാക്കര് ഫൈനലിന് യോഗ്യത നേടിയിരുന്നത്. ആദ്യമായിട്ടാണ് ഷൂട്ടിംഗില് ഒരു ഇന്ത്യന് വനിത ഒളിംപിക്സ് മെഡല് നേടുന്നത്. ഷൂട്ടിംഗില് 12 വര്ഷത്തെ മെഡല്വരള്ച്ചയ്ക്കാണ് ഭാകര് വിരാമമിട്ടത്. കൊറിയക്കാണ് ഒന്നും രണ്ടും സ്ഥാനം.