ഇന്ത്യയുടെ സ്വാതന്ത്ര്യ ദിനം ബഹ്റൈനും പ്രിയപ്പെട്ടത്, പവിഴദ്വീപും ഭാരതവും തമ്മിലെ ചരിത്രപരമായ യാദൃശ്ചികത

ഇന്ത്യയും ബഹ്റൈനും തമ്മില്‍ ചരിത്രപരമായും വാണിജ്യപരമായും ശക്തമായ ബന്ധമാണ് നിലനില്‍ക്കുന്നത്. ഏകദേശം 5000 വർഷത്തോളം പഴക്കമുള്ള വാണിജ്യബന്ധം ഇന്ത്യയും ബഹ്റൈനും തമ്മിലുണ്ടെന്നാണ് ചരിത്രം.

79-ാമത് സ്വാതന്ത്ര്യദിനം ആഘോഷിക്കാൻ ഒരുങ്ങുകയാണ് ഇന്ത്യ. ബ്രിട്ടീഷ് ആധിപത്യത്തില്‍ നിന്ന് ഇന്ത്യ സ്വാതന്ത്ര്യം നേടിയ ദിവസം ആഘോഷിക്കാന്‍ രാജ്യം തയ്യാറെടുക്കുകയാണ്. ഓഗസ്റ്റ് 15 ഇന്ത്യക്ക് മാത്രമല്ല ഒരു ഗൾഫ് രാജ്യത്തിനും ഏറെ പ്രധാനപ്പെട്ട തീയതിയാണ്. ബ്രിട്ടീഷ് ആധിപത്യത്തില്‍ നിന്ന് ബഹ്റൈന്‍ സ്വാതന്ത്ര്യം നേടിയതും ഇതേ ദിവസമാണ്. ഇന്ത്യയും ബഹ്റൈനും തമ്മില്‍ ചരിത്രപരമായും വാണിജ്യപരമായും ശക്തമായ ബന്ധമാണ് നിലനില്‍ക്കുന്നത്. ഏകദേശം 5000 വർഷത്തോളം പഴക്കമുള്ള വാണിജ്യബന്ധം ഇന്ത്യയും ബഹ്റൈനും തമ്മിലുണ്ടെന്നാണ് ചരിത്രം.

ബഹ്‌റൈന്‍റെ സ്വാതന്ത്ര്യത്തിലേക്കുള്ള പാത പ്രതിരോധത്തിന്‍റെയും ദൃഢനിശ്ചയത്തിന്‍റെയും ഒരു കഥയാണ്. 1971 ഓഗസ്റ്റ് 15നാണ് രാജ്യം ഔദ്യോഗികമായി സ്വാതന്ത്ര്യം നേടിയതെങ്കിലും, അതേ വർഷം ഡിസംബർ 16-നാണ് യഥാർത്ഥ പരമാധികാര രാജ്യമെന്ന പദവിയിലേക്ക് ബഹ്റൈൻ എത്തിയത്. ഈ ദിവസം ഭരണാധികാരിയായ ഇസ ബിൻ സൽമാൻ അൽ ഖലീഫ അധികാരത്തിലേറുകയും ബ്രിട്ടീഷ് സൈന്യം പൂർണ്ണമായി പിൻവാങ്ങുകയും ചെയ്തു. ഇതോടെ ബഹ്‌റൈൻ ഒരു പുതിയ യുഗത്തിലേക്ക് പ്രവേശിച്ചു. ഡിസംബര്‍ 16നാണ് ബഹ്റൈന്‍ ദേശീയ ദിനം ആഘോഷിക്കുന്നത്.

മുത്തും പവിഴവും ശേഖരിച്ചിരുന്ന കാലം മുതൽ സുഗന്ധവ്യഞ്ജനങ്ങളുടെ ഇറക്കുമതി വരെ ഇന്ത്യയുമായി ബഹ്റൈന് ആത്മബന്ധം ഉണ്ട്. അത് ഇന്നും ശക്തമായി തന്നെ തുടരുന്നു. ഭൂമിശാസ്ത്രപരമായും ജനസംഖ്യയിലും താരതമ്യേന ചെറിയ രാജ്യമാണ് ബഹ്റൈന്‍. ബഹ്റൈനിലെ ആകെ ജനസംഖ്യയില്‍ 30 ശതമാനത്തിലേറെ ഇന്ത്യക്കാരുമാണ്. ബഹ്റൈനിലെ ഏറ്റവും വലിയ പ്രവാസി സമൂഹവും ഇന്ത്യക്കാരാണ്.

ബഹ്‌റൈന്‍റെ ചരിത്രത്തിലുടനീളം ദിൽമുൻ നാഗരികത മുതൽ ഇന്ത്യയിലെ സിന്ധുനദീതട സംസ്കാരം വരെ നീളുന്ന ഇന്ത്യയുമായുള്ള ബഹ്റൈന്‍റെ ബന്ധത്തിന്‍റെ അനേകം തെളിവുകളുണ്ട്. ബിസി 3000ൽ തന്നെ കപ്പലുകൾ ഹാരപ്പൻ വാസസ്ഥലങ്ങൾ, ഒമാൻ, ബഹ്‌റൈൻ എന്നിവിടങ്ങളിൽ നിന്ന് മെസൊപ്പൊട്ടേമിയയിലേക്ക് വ്യാപാരത്തിനായി യാത്ര ചെയ്തിരുന്നതായി പറയപ്പെടുന്നു. പുരാതന ബഹ്‌റൈൻ വ്യാപാരികൾ ഇന്ത്യയിൽ നിന്ന് സുഗന്ധവ്യഞ്ജനങ്ങൾ വാങ്ങി ബഹ്‌റൈൻ മുത്തുകൾക്ക് പകരമായി വ്യാപാരം നടത്തിയിരുന്നു.

അടുത്തിടെയുള്ള ചരിത്രം പരിശോധിക്കുമ്പോൾ, പത്തൊൻപതാം നൂറ്റാണ്ടിന്‍റെ അവസാന പാദത്തിൽ ഇന്ത്യൻ വ്യാപാരികൾ ബഹ്‌റൈനിൽ തങ്ങളുടെ സാന്നിധ്യം ഉറപ്പിച്ചു. ബാഗ്ദാദിൽ നിന്നും ബസ്രയിൽ നിന്നും മറ്റ് പലരും ബഹ്‌റൈനിലേക്ക് കുടിയേറി. ഈ വ്യാപാരി കുടുംബങ്ങൾ സിന്ധ് പ്രവിശ്യയിൽ നിന്നും ഗുജറാത്തിലെ കത്തിയവാഡ് പ്രദേശങ്ങളിൽ നിന്നും വന്നവരായിരുന്നു. 1925 ആയപ്പോഴേക്കും ഏകദേശം 2500 ഇന്ത്യൻ കുടുംബങ്ങൾ ബഹ്‌റൈനിൽ സ്ഥിരതാമസമാക്കി. അവരിൽ ഭൂരിഭാഗവും ചെറുകിട റീട്ടെയിൽ വ്യാപാരത്തിലാണ് ഏർപ്പെട്ടിരുന്നത്.

1932-ൽ എണ്ണ കണ്ടെത്തിയതോടെ, കുടിയേറ്റ തൊഴിലാളികൾ എണ്ണ വ്യവസായത്തിലേക്കും അതിന്‍റെ അനുബന്ധ വികസന പ്രവർത്തനങ്ങളിലേക്കും ആകർഷിക്കപ്പെട്ടു. തുടർന്നുള്ള ബഹ്‌റൈൻ സാമ്പത്തിക വികസനത്തോടെ, ഇന്ത്യക്കാർ ബിസിനസ്സ് തുടങ്ങുന്നതിനും മാനേജർമാർ, വിൽപ്പനക്കാർ, സഹായികൾ, തൊഴിലാളികൾ എന്നിങ്ങനെയുള്ള ജോലികൾ ചെയ്യുന്നതിനും ബഹ്‌റൈനിലേക്ക് കുടിയേറാൻ തുടങ്ങി. ബഹ്‌റൈനിലെ പല പ്രമുഖർക്കും ഇന്ത്യയുമായി അടുത്ത ബന്ധമുണ്ട്.

മതസഹിഷ്ണുതയും സമാധാനപരമായ സഹവർത്തിത്വവുമെന്ന ബഹ്‌റൈന്‍റെ തത്വശാസ്ത്രമാണ് ഇന്ത്യൻ പ്രവാസികൾക്ക് ഈ രാജ്യത്തെ പ്രിയപ്പെട്ട ഇടമാക്കി മാറ്റാനുള്ള പ്രധാന കാരണം. സാമൂഹികവും മതപരവുമായ കാര്യങ്ങളിൽ ബഹ്‌റൈനിലെ ഇന്ത്യൻ സമൂഹത്തിന് വലിയ സ്വാതന്ത്ര്യം അനുവദിച്ചിട്ടുണ്ട്. 200 വർഷം പഴക്കമുള്ള ഒരു ഹൈന്ദവ ക്ഷേത്രവും, 5 പള്ളികളും, 3 ഗുരുദ്വാരകളും ഉൾപ്പെടെ വിവിധ മതങ്ങളുടെ ആരാധനാലയങ്ങൾ ഇവിടെയുണ്ട്. ഹൈന്ദവ വിശ്വാസികൾക്കായി മൃതദേഹങ്ങൾ സംസ്കരിക്കാനുള്ള സൗകര്യവും ബഹ്‌റൈൻ സർക്കാർ ഒരുക്കിയിട്ടുണ്ട്. ഏകദേശം 100 വർഷം മുൻപാണ് ആദ്യത്തെ ശ്മശാനം അനുവദിച്ചത്. എല്ലാ പ്രധാനപ്പെട്ട ഇന്ത്യൻ ഉത്സവങ്ങളും ബഹ്‌റൈനിൽ ആഘോഷിക്കാറുണ്ട്. ഈ ആഘോഷങ്ങളിൽ ഇന്ത്യക്കാർ മാത്രമല്ല, രാജകുടുംബാംഗങ്ങൾ ഉൾപ്പെടെയുള്ള ബഹ്‌റൈനികളും വലിയ താല്പര്യത്തോടെ പങ്കെടുക്കാറുണ്ട്.

1971ൽ ആരംഭിച്ച ഇരുവരും തമ്മിലുള്ള ഡിപ്ലോമാറ്റിക് ബന്ധം പിന്നീടിങ്ങോട്ട് കരുത്തായി തന്നെ വളരുകയായിരുന്നു. 1973 ജനുവരിയിലാണ് ബഹ്റൈനിൽ ഇന്ത്യൻ എംബസി സ്ഥാപിതമാകുന്നത്. 34 വർഷങ്ങൾക്കു ശേഷം 2007 ൽ ഇന്ത്യയിലെ ബഹ്റൈൻ എംബസി ഡൽഹിയിൽ ആരംഭിച്ചു. വാണിജ്യം, വ്യവസായം, പ്രതിരോധം, വിദ്യാഭ്യാസം തുടങ്ങി നിരവധി മേഖലകളിലെ നിർണായ വ്യവസ്ഥകളിൽ ഇരുവരും അനിഷേധ്യമായ ബന്ധം വളർത്തിയെടുത്തു. 2019ൽ നരേന്ദ്ര മോദിയുടെ ബഹ്റൈൻ സന്ദർശനത്തിലൂടെ പവിഴ ദ്വീപ് സന്ദർശിച്ച ആദ്യ ഇന്ത്യൻ പ്രധാനമന്ത്രിയെന്ന ഖ്യാതിയും അതുവഴി വളർത്തിയെടുത്ത ബന്ധങ്ങളും ഇരു രാജ്യങ്ങൾക്കും നേട്ടങ്ങളായി.