ഒമാനില് കെട്ടിടം തകര്ന്ന് തമിഴ്നാട് സ്വദേശി മരിച്ചു; മലയാളിക്ക് പരിക്ക്
Synopsis
ശനിയാഴ്ച പുലർച്ചെ അഞ്ച് മണിക്കാണ് അപകടം സംഭവിച്ചത്. ഒമാന് ഫ്ലവർ മില്ലില് കയറ്റിറക്ക് ജോലിക്കാരായിരുന്നു ഇരുവരും. രാവിലെ ജോലിക്ക് പോകാനായി എഴുന്നേറ്റ സദാനന്ദന് ഗ്യാസ് സ്റ്റൗ കത്തിച്ചപ്പോള് ഉഗ്രശബ്ദത്തോടെ പൊട്ടിത്തെറിക്കുകയായിരുന്നു.
മസ്കറ്റ്: ഒമാനിലെ മത്രയില് കെട്ടിടം തകര്ന്നുവീണ് തമിഴ്നാട് സ്വദേശി മരിച്ചു. കണ്ണൂര് ജോസ്ഗിരിയില് സ്ഥിര താമസമാക്കിയ തമിഴ്നാട് സ്വദേശി ദാസാണ്(57) കെട്ടിട അവശിഷ്ടങ്ങള്ക്കിടയില്പ്പെട്ട് മരിച്ചത്. പയ്യന്നൂര് കവ്വായി സ്വദേശി സദാനന്ദന് പരിക്കേറ്റ് ആശുപത്രിയില് ചികിത്സയിലാണ്.
ശനിയാഴ്ച പുലർച്ചെ അഞ്ച് മണിക്കാണ് അപകടം സംഭവിച്ചത്. ഒമാന് ഫ്ലവർ മില്ലില് കയറ്റിറക്ക് ജോലിക്കാരായിരുന്നു ഇരുവരും. രാവിലെ ജോലിക്ക് പോകാനായി എഴുന്നേറ്റ സദാനന്ദന് ഗ്യാസ് സ്റ്റൗ കത്തിച്ചപ്പോള് ഉഗ്രശബ്ദത്തോടെ പൊട്ടിത്തെറിക്കുകയായിരുന്നു. പൊട്ടിത്തെറി ഉണ്ടായതോടെ സദാനന്ദന് പുറത്തേക്കോടി. ഈ സമയം ദാസ് ഉറങ്ങി കിടക്കുകയായിരുന്നു. സ്ഫോടനത്തെ തുടര്ന്ന് പഴയ കെട്ടിടം നിലം പതിക്കുകയായിരുന്നു. സിവില് ഡിഫന്സ് അധികൃതര് എത്തി മൃതദേഹം കെട്ടിടാവശിഷ്ടങ്ങളില് നിന്ന് പുറത്തെടുത്തു. ജോസ്ഗിരി സ്വദേശി മരിയയാണ് മരിച്ച ദാസിന്റെ ഭാര്യ. ഒരു മകളുണ്ട്. കെട്ടിടം തകര്ന്ന് ഒരു ഏഷ്യന് വംശജന് മരിച്ചതായും പരിക്കേറ്റയാളെ ആശുപത്രിയിലേക്ക് മാറ്റിയെന്നും അധികൃതര് സ്ഥിരീകരിച്ചു.
ഏഷ്യാനെറ്റ് ന്യൂസ് മലയാളത്തിലൂടെ Pravasi Malayali News ലോകവുമായി ബന്ധപ്പെടൂ. Gulf News in Malayalam ജീവിതാനുഭവങ്ങളും, അവരുടെ വിജയകഥകളും വെല്ലുവിളികളുമൊക്കെ — പ്രവാസലോകത്തിന്റെ സ്പന്ദനം നേരിട്ട് അനുഭവിക്കാൻ Asianet News Malayalam