യുഎഇയിൽ ഇന്ധനവില കുത്തനെ കൂട്ടി; ഒക്ടോബർ മാസത്തെ പുതുക്കിയ പെട്രോൾ, ഡീസൽ നിരക്കുകൾ പ്രഖ്യാപിച്ചു

യുഎഇയിൽ ഒക്ടോബർ മാസത്തേക്കുള്ള പെട്രോൾ, ഡീസൽ വില അധികൃതർ പ്രഖ്യാപിച്ചു. ആഗോള തലത്തിലുള്ള സംഘർഷങ്ങളുടെ പശ്ചാത്തലത്തിൽ ഇന്ധനവിലയിൽ വലിയ വർധനവാണ് രേഖപ്പെടുത്തിയിരിക്കുന്നത്. ഇത് യുഎഇയിലെ സാധാരണക്കാരായ കുടുംബങ്ങളുടെ പ്രതിമാസ ബജറ്റിനെ നേരിട്ട് ബാധിക്കും.

ദുബായ്: യുഎഇയിൽ ഒക്ടോബർ മാസത്തേക്കുള്ള പെട്രോൾ, ഡീസൽ വില പ്രഖ്യാപിച്ചു. ഓഗസ്റ്റ്, സെപ്റ്റംബർ മാസങ്ങളിലെ വർധനവിന് പിന്നാലെ ഒക്ടോബറിലും ഇന്ധനവില കുത്തനെ കൂട്ടിയിരിക്കുകയാണ് അധികൃതർ. പുതുക്കിയ നിരക്കുകൾ 2026 ഒക്ടോബർ 1 മുതൽ നിലവിൽ വന്നു.

സൂപ്പർ 98 പെട്രോൾ ലിറ്ററിന് 4.40 ദിർഹം ആണ് പുതിയ വില. സെപ്റ്റംബറിൽ ലിറ്ററിന് 3.80 ദിർഹമായിരുന്നു. സ്പെഷ്യൽ 95 പെട്രോൾ ലിറ്ററിന് 4.28 ദിർഹം ആണ് പുതുക്കിയ നിരക്ക്. സെപ്റ്റംബറിൽ 3.69 ദിർഹമായിരുന്നു. ഇ-പ്ലസ് 91 പെട്രോൾ ലിറ്ററിന് 4.21 ദിർഹം ആണ് പുതിയ നിരക്ക്. സെപ്റ്റംബറിൽ 3.61 ദിർഹമായിരുന്നു. ഡീസൽ ലിറ്ററിന് 4.80 ദിർഹം ആണ് പുതിയ നിരക്ക്. സെപ്റ്റംബറിൽ 4.30 ദിർഹമായിരുന്നു. ഫെബ്രുവരി 28-ന് പശ്ചിമേഷ്യയിൽ യുദ്ധം ആരംഭിച്ചതുമുതൽ യുഎഇയിലെ റീട്ടെയിൽ ഇന്ധനവില 60 ശതമാനത്തിലധികം വർധിച്ചിരുന്നു.

ജൂലൈയിൽ ചെറിയ തോതിൽ വില കുറഞ്ഞെങ്കിലും ഓഗസ്റ്റ് മുതൽ വീണ്ടും ഉയരുകയാണ്. അമേരിക്കയും ഇറാനും തമ്മിലുണ്ടായിരുന്ന 60 ദിവസത്തെ വെടിനിർത്തൽ കരാറിന്റെ കാലാവധി അവസാനിച്ചതും, കരാർ നീട്ടാൻ വാഷിംഗ്ടൺ തയ്യാറാകാത്തതും മേഖലയിൽ സംഘർഷം വീണ്ടും രൂക്ഷമാക്കിയിട്ടുണ്ട്. കൂടാതെ, ചെങ്കടലിലെ എണ്ണ ശേഖരണ കേന്ദ്രങ്ങൾക്ക് നേരെ ഹൂതികൾ ആക്രമണം ശക്തമാക്കിയതും അന്താരാഷ്ട്ര തലത്തിൽ എണ്ണവില വർധിക്കാൻ കാരണമായി. ഇന്ധനവിലയിലുണ്ടാകുന്ന ഈ പെട്ടെന്നുള്ള വർധനവ് യുഎഇയിലെ സാധാരണക്കാരായ കുടുംബങ്ങളുടെ പ്രതിമാസ ബജറ്റിനെ നേരിട്ട് ബാധിക്കും.