യുഎഇയില്‍ കൊവിഡ് വാക്സിനേഷന്‍ ഒന്നരക്കോടി ഡോസ് കവിഞ്ഞു

ശനിയാഴ്‍ച 1,03,196 ഡോസ് വാക്സിനുകളാണ് രാജ്യത്ത് നല്‍കിയത്. ഇതോടെ ഇതുവരെ നല്‍കിയ ആകെ ഡോസുകളുടെ എണ്ണം ഒന്നരക്കോടി കവിഞ്ഞു.

അബുദാബി: യുഎഇയിലെ ദേശീയ വാക്സിനേഷന്‍ പദ്ധതി പുതിയ നാഴികക്കല്ല് പിന്നിട്ടു. രാജ്യത്ത് ഇതുവരെ നല്‍കിയ വാക്സിന്‍ ഡോസുകളുടെ എണ്ണം ഒന്നരക്കോടി പിന്നിട്ടതായാണ് അധികൃതര്‍ അറിയിച്ചത്. ജനസംഖ്യയുമായി താരതമ്യം ചെയ്യുമ്പോള്‍ ലോകത്തിലെത്തന്നെ മികച്ച വാക്സിനേഷന്‍ പൂര്‍ത്തീകരണ നിരക്കാണിതെന്നും അധികൃതര്‍ വിശദീകരിച്ചു.

ശനിയാഴ്‍ച 1,03,196 ഡോസ് വാക്സിനുകളാണ് രാജ്യത്ത് നല്‍കിയത്. ഇതോടെ ഇതുവരെ നല്‍കിയ ആകെ ഡോസുകളുടെ എണ്ണം ഒന്നരക്കോടി കവിഞ്ഞു. 100 പേര്‍ക്ക് 152.10 ഡോസ് വാക്സിനുകള്‍ എന്ന കണക്കിലാണ് രാജ്യത്തെ വാക്സിനേഷന്‍ നിരക്ക്. അതേസമയം രാജ്യത്ത് ഇന്ന് 2,282 പേര്‍ക്ക് കൂടി കൊവിഡ് വൈറസ് ബാധ സ്ഥിരീകരിച്ചതായി ആരോഗ്യ - പ്രതിരോധ മന്ത്രാലയം അറിയിച്ചു. ചികിത്സയിലായിരുന്ന 2,233 പേര്‍ സുഖം പ്രാപിക്കുകയും 10 പേര്‍ മരണപ്പെടുകയും ചെയ്തു.

പുതിയതായി നടത്തിയ 2,74,917 പരിശോധനകളില്‍ നിന്നാണ് പുതിയ രോഗികളെ കണ്ടെത്തിയത്. ഇതുവരെയുള്ള കണക്കുകള്‍ പ്രകാരം ആകെ 6,24,814 പേര്‍ക്ക് യുഎഇയില്‍ കൊവിഡ് സ്ഥിരീകരിച്ചിട്ടുണ്ട്. ഇവരില്‍ 6,03,541 പേര്‍ രോഗമുക്തരാവുകയും 1,792 പേര്‍ മരണപ്പെടുകയും ചെയ്തു. നിലവില്‍ 19,481 കൊവിഡ് രോഗികളാണ് രാജ്യത്തുള്ളത്.