അത് ഞാനല്ല; ഇന്ത്യന്‍ ക്രിക്കറ്റ് ടീമിലെ ഏറ്റവും വലിയ പിശുക്കനാരെന്ന് വെളിപ്പെടുത്തി നെഹ്റ

ദില്ലി: ക്രിക്കറ്റ് താരങ്ങള്‍ കളിയിലൂടെയും പരസ്യങ്ങളിലൂടെയും ധാരാളം പണം സമ്പാദിക്കുന്നവരാണ്. ഇങ്ങനെ സമ്പാദിക്കുന്ന പണം ധൂര്‍ത്തടിച്ച് കളയുന്നവരുമുണ്ട്. എന്നാല്‍ ഇന്ത്യന്‍ ടീമിലെ ഏറ്റവും വലിയ പിശുക്കന്‍ ആരായിരിക്കും. യുവരാജ് സിംഗ് ഒരിക്കല്‍ പറഞ്ഞത് അത് ആശിഷ് നെഹ്റയാണെന്നായിരുന്നു. ഇത് സാധൂകരിക്കാന്‍ നിരവധി കഥകളും യുവി പറഞ്ഞിരുന്നു.

എന്നാല്‍ യഥാര്‍ഥ പിശുക്കന്‍ ആരാണെന്ന് നെഹ്റ ഇപ്പോള്‍ ഒരു ടെലിവിഷന്‍ പരിപാടിയില്‍ ഗൗരവ് കപൂറിനോട് വെളിപ്പെടുത്തിയിരിക്കുകയാണ്. അത് യുവി തന്നെയാണെന്നാണ് നെഹ്റയുടെ വെളിപ്പെടുത്തല്‍. പിശുക്കുന്നതിലുള്ള കുറ്റബോധം കൊണ്ടാണ് യുവരാജ് തന്റെ പേര് പറഞ്ഞതെന്നും കുറ്റം ചെയ്തവാരായിരിക്കും എപ്പോഴും ആദ്യം പ്രതിരോധവുമായി രംഗത്തിറങ്ങുകയെന്നും തമാശയായി നെഹ്റ പറഞ്ഞു.

ആരാണിത് മോഷ്ടിച്ചതെന്ന് പോലീസ് ചോദിക്കുമ്പോള്‍ ചിലര്‍ ആദ്യമേ കയറി ഞാനല്ലെന്ന് പറയുന്നതുപോലെയാണിത്. ആരും പറയുന്നതിന് മുമ്പെ യുവിയാണ് എന്നെക്കുറിച്ച് അത് പറഞ്ഞത്. അതിലേക്ക് പാവം കോലിയുടെ പേരും വലിച്ചിഴച്ചു. എന്നാല്‍ തങ്ങള്‍ പുറത്തുപോവുമ്പോള്‍ യുവിയാണ് എല്ലാറ്റിനും പണം കൊടുക്കാറുള്ളതെന്ന് ഗൗരവ് പറഞ്ഞപ്പോല്‍ എന്നാല്‍ അന്ന് മഴ പെയ്യുമെന്നായിരുന്നു നെഹ്റ‌യുടെ മറുപടി. ഇന്ത്യന്‍ ടീമിലെ ദീര്‍ഘകാല സുഹൃത്തുക്കളായ നെഹ്‌റയും യുവിയും പരസ്പരം കളിയാക്കാന്‍ കിട്ടുന്ന അവസരമൊന്നും പാഴാക്കാറില്ല. നാല്‍പതാം വയസുവരെ താന്‍ ക്രിക്കറ്റില്‍ തുടരുമെന്നും നെഹ്റ വ്യക്തമാക്കി.