ഇസ്ലാമാബാദ്: പാക് ക്രിക്കറ്റ് മുന്‍ നായകനും പാകിസ്ഥാനിലെ മുഖ്യപ്രതിപക്ഷ പാര്‍ട്ടിയായ തെഹ്രീകെ ഇന്‍സാഫ് നേതാവുമായ ഇമ്രാന്‍ഖാന്‍ വീണ്ടും വിവാഹിതനാകാന്‍ പോകുന്നുവെന്ന് റിപ്പോര്‍ട്ട്. നേരത്തെ രണ്ടുതവണ വിവാഹം കഴിച്ചിട്ടുള്ള ഇമ്രാന്‍ഖാന്‍ രണ്ടുതവണയും വിവാഹമോചനം നേടിയിരുന്നു. അതിനിടെയാണ് ഇമ്രാന്‍ഖാന്റെ മൂന്നാം വിവാഹ വാര്‍ത്ത ചില പാകിസ്ഥാന്‍ മാധ്യമങ്ങള്‍ പുറത്തുവിട്ടിരിക്കുന്നത്. ഇമ്രാന്‍ഖാന്റെ അടുത്ത സുഹൃത്തിന്റെ സഹോദരിയെയാണ് മൂന്നാമത് വിവാഹം ചെയ്യുന്നതെന്നാണ് സൂചന. മര്യാം എന്നാ എന്നാണ് വധുവിന്റെ പേര്. ഇവര്‍ ആദ്യ വിവാഹ ബന്ധം ഒഴിഞ്ഞതാണ്. അതേസമയം വിവാഹ വാര്‍ത്ത ഇമ്രാന്‍ ഖാന്‍ നിഷേധിച്ചിട്ടുണ്ട്. അതേസമയം ഇമ്രാന്‍ഖാന്റെ അടുത്ത സുഹൃത്തുക്കള്‍ വിവാഹ വാര്‍ത്ത രഹസ്യമായി സമ്മതിക്കുന്നുണ്ട്. വിവാഹം ഉടനുണ്ടാകുമെന്നാണ് സൂചന. മുന്‍ വിവാഹം പോലെ തീര്‍ത്തും സ്വകാര്യവും ലളിതവുമായ ചടങ്ങായിരിക്കുമെന്നും റിപ്പോര്‍ട്ടുണ്ട്.
ബ്രിട്ടീഷ് സ്വദേശിനിയായ ജെമിമ ഗോള്‍ഡ്സ്‌മിത്തിനെയാണ് ഇമ്രാന്‍ഖാന്‍ ആദ്യം വിവാഹം കഴിച്ചത്. ഈ ബന്ധത്തില്‍ രണ്ടു മക്കളുണ്ട്. ബ്രിട്ടീഷ് ടെലിവിഷന്‍ മാധ്യമപ്രവര്‍ത്തക റഹാം ഖാനെയാണ് ഇമ്രാന്‍ രണ്ടാമത് വിവാഹം ചെയ്‌തത്. ഈ ബന്ധം പത്തു മാസം മാത്രമെ നിലനിന്നുള്ളു. 2015 ഒക്‌ടോബറിലായിരുന്നു വിവാഹമോചനം.