കൊച്ചി: പെക്കൂസണ്, ആ പെനാല്ട്ടി താങ്കള് ലക്ഷ്യത്തില് എത്തിച്ചിരുന്നെങ്കില്. ഓരോ മഞ്ഞപ്പട ആരാധകനും ഇപ്പോള് ഈ ചോദ്യം ഉന്നയിക്കുന്നുണ്ടാവും. പ്ലേ ഓഫ് സാധ്യത നിലനിര്ത്താന് അതിനിര്ണായകമായ മത്സരത്തില് കേരളത്തിന്റെ ഭാവി തീരുമാനിച്ചത് പെക്കൂസണ് പാഴാക്കിയ പെനാള്ട്ടിയാണ്. അതോടെ ബ്ലാസ്റ്റേഴ്സ് കൈവിട്ടത് പ്ലേ ഓഫിനൊപ്പം ആര്ത്തിരമ്പുന്ന മഞ്ഞപ്പടയുടെ പ്രതീക്ഷ കൂടിയാണ്.
കൊച്ചിയിലെ മഞ്ഞക്കടലില് തിരയിളക്കത്തിന് ആക്കം കൂട്ടി അമ്പത്തിരണ്ടാം മിനുറ്റില് ബ്ലാസ്റ്റേഴ്സിനനുകൂലമായ പെനാള്ട്ടി. ഗുഡ് ജോണിനെ ചെന്നൈയിനിന്റെ ജെറി വീഴ്ത്തിയപ്പോള് റഫറി പെനാള്ട്ടി ബോക്സിലേക്ക് വിരല്ചൂണ്ടി. കേരളത്തിനായി പെനാള്ട്ടിയെടുക്കാന് എത്തിയത് സൂപ്പര്താരം കറേജ് പെക്കൂസണ്. എന്നാല് പെക്കുസന്റെ ദുര്ബലമായ ഷോട്ട് ചെന്നൈയിന് ഗോള് കീപ്പര് കരന്ജിത്ത് അനായാസം തട്ടിയകറ്റി.
അതോടെ ഐഎസ്എല് നാലാം സീസണില് മഞ്ഞപ്പടയുടെ പ്രതീക്ഷകള് പോസ്റ്റിന് പുറത്തായി. കൊച്ചിയിലെ മഞ്ഞക്കടല് ഇത്ര നിശംബ്ധമായ നിമിഷം വേറെയുണ്ടാവില്ല. ജീവന്മരണ പോരാട്ടത്തില് ലീഡ് നേടാനുള്ള സുവര്ണാവസരം നഷ്ടപ്പെടുത്തിയ ബ്ലാസ്റ്റേഴ്സിന്റെ വലിയ പിഴവ്. എന്നാല് അവിടുന്നും കൈവിടാതിരുന്ന ടീമിലെ പന്ത്രണ്ടാമന് നല്കാന് ബ്ലാസ്റ്റേഴ്സിന്റെ കൈയില് ഒരു മറുപടിയുണ്ടായിരുന്നില്ല.