ധോണിക്ക് ഈ വര്‍ഷം അഞ്ചു കളികള്‍ മാത്രം

ടീം ഇന്ത്യക്ക് ഈ വര്‍ഷം ഇനി ഏറെയും കളിക്കാനുള്ളത് ടെസ്റ്റ് മത്സരങ്ങളാണ്. ഏകദിന നായകന്‍ ധോണിക്ക് ഇന്ത്യന്‍ കുപ്പായത്തില്‍ ഈ വര്‍ഷം ഇനി 5 മത്സരങ്ങള്മാത്രമാണ് ഉള്ളത്. വെസ്റ്റ് ഇന്‍ഡീസിനെതിരായ ട്വന്റി 20 പരമ്പര കഴിഞ്ഞതോടെ ടീം ഇന്ത്യക്ക് ഇനിയങ്ങോട്ട് ടെസ്റ്റ് മത്സരങ്ങളുടെ കാലമാണ്. ഈ മാസം 22ന് ന്യുസീലന്‍ഡിനെതിരെ തുടങ്ങുന്ന പരമ്പര മുതല്‍ സീസണില്‍ കളിക്കേണ്ടത് 13 ടെസ്റ്റ് മത്സരങ്ങള്‍. 2014ല്‍ ടെസ്റ്റില്‍ നിന്ന് വിരമിച്ച എം എസ് ധോണി ഈ പരമ്പരകളിലുമുണ്ടാകില്ല.

ധോണിയെ ഈ വര്‍ഷം ഇന്ത്യന്‍ കുപ്പായത്തില്‍ കാണാനാവുക ന്യുസീലന്‍ഡിനെതിരായ ഏകദിന പരമ്പരയില്‍ മാത്രം. ഒക്ടോബര്‍
16ന് തുടങ്ങുന്ന പരമ്പരയില്‍ അഞ്ചു ഏകദിനങ്ങളാണ് ഉള്ളത്. നാലാം ഏകദിനത്തിന്റെ വേദി ധോണിയുടെ ജന്മനാടായ റാഞ്ചിയും. ഈ വര്‍ഷം എട്ടു ഏകദിനത്തിലും 19 ട്വന്റി 20യിലും ധോണി കളിച്ചിരുന്നു.

അമേരിക്കയിലെ ആദ്യ ട്വന്റി 20യില്‍ വെസ്റ്റിന്‍ഡീസിനെതിരായ മല്‍സരത്തില്‍ അവസാന പന്തില്‍ ധോണി പുറത്തായതാണ് ഇന്ത്യക്ക് തിരിച്ചടിയായത്. പരമ്പരയില്‍ ഇന്ത്യ 2-0ന് തോറ്റിരുന്നു. രണ്ടാം മല്‍സരം മഴ മൂലം ഉപേക്ഷിച്ചിരുന്നു. കരിയറിലെ സുവര്‍ണകാലം പിന്നിട്ടെങ്കിലും രണ്ടു വര്‍ഷം കൂടെയെങ്കിലും രാജ്യാന്തര ക്രിക്കറ്റില്‍ തുടരാമെന്നാണ് 35കാരനായ ഇന്ത്യന്‍ നായകന്റെ പ്രതീക്ഷ.