സംസ്ഥാന പോളിടെക്‌നിക് കായികമേള: തൃശൂര്‍ വിമന്‍സ് പോളിക്ക് ഓവറോള്‍ കിരീടം

അതിലറ്റിക്‌സ് പുരുഷ വിഭാഗത്തില്‍ 37 പോയന്റ് നേടി ത്യാഗരാജര്‍ പോളിയാണ് ഒന്നാമത്.

കോഴിക്കോട്: സംസ്ഥാന പോളിടെക്‌നിക് കോളേജ് കായികമേളയില്‍ 53 പോയന്റുമായി തൃശൂര്‍ വിമന്‍സ് പോളിടെക്‌നിക് കോളേജ് ഓവറോള്‍ ചാംപ്യന്മാരായി. 50 പോയന്റ് നേടിയ അളഗപ്പനഗര്‍ ത്യാഗരാജര്‍ ഗവ. പോളിടെക്‌നിക്കിനാണ് രണ്ടാം സ്ഥാനം. 43 പോയന്റ് നേടിയ ആലപ്പുഴ കാര്‍മല്‍ പോളിടെക്‌നിക് മൂന്നാം സ്ഥാനം നേടി. 

അതിലറ്റിക്‌സ് പുരുഷ വിഭാഗത്തില്‍ 37 പോയന്റ് നേടി ത്യാഗരാജര്‍ പോളിയാണ് ഒന്നാമത്. 26 പോയന്റ് നേടിയ മീനങ്ങാടി ഗവ. പോളി രണ്ടാം സ്ഥാനവും 18 പോയന്റ് നേടി പാലക്കാട് സെന്റ് മേരീസ് പോളി മൂന്നാം സഥാനവും കരസ്ഥമാക്കി. വനിത വിഭാഗം അതിലറ്റിക്‌സില്‍ 20 പോയന്റ് നേടിയ എറണാകുളം വിമന്‍സ് പോളി രണ്ടാം സ്ഥാനവും 13 പോയന്‍േറാടെ ത്യാഗരാജര്‍ പോളി മൂന്നാം സ്ഥാനവും നേടി. പുരുഷന്മാരില്‍ മീനങ്ങാടി ഗവ. പോളിയിലെ ജസ്റ്റിന്‍ മത്തായിയും കെ.എച്ച് യദു കൃഷ്ണയും വനിത വിഭാഗത്തില്‍ തൃശൂര്‍ വിമന്‍സ് പോളിയിലെ വിഷ്ണു പ്രീമയും വ്യക്തിത ചാംപ്യന്മാരായി.

വിജയികള്‍ക്ക് സമാപന ചടങ്ങില്‍ കോഴിക്കോട് കോര്‍പറേഷന്‍ മേയര്‍ തോട്ടത്തില്‍ രവീന്ദ്രന്‍ സമ്മാനദാനം നടത്തി. വി. ശംസുദ്ദീന്‍, എം. രാധാകൃഷ്ണന്‍, എന്‍. ശാന്തകുമാര്‍, കെ.വി ബാബുരാജ്, പി.എം ഷിനു, എം.സി പ്രകാശന്‍, എന്‍.ശ്രീകുമാര്‍ എന്നിവര്‍ പങ്കെടുത്തു.