തിലകരത്നെ ദില്‍ഷന്‍ വിരമിക്കുന്നു

കൊളംബോ: ശ്രീലങ്കയുടെ വെടിക്കെട്ട് ഓപ്പണര്‍ തിലകരത്നെ ദില്‍ഷന്‍ രാജ്യാന്തര ഏകദിന, ട്വന്റി- 20 മത്സരങ്ങളില്‍ നിന്ന് വിരമിക്കുന്നു. ഞായറാഴ്ച ഓസ്ത്രേലിയക്കെതിരെ നടക്കുന്ന മൂന്നാം ഏകദിനമാകും കരിയറിലെ തന്റെ അവസാന ഏകദിന മത്സരമെന്ന് 39 കാരനായ ദില്‍ഷന്‍ അറിയിച്ചു. ഓസീസിനെതിരെ തന്നെ സെപ്റ്റംബര്‍ ഒമ്പതിന് കൊളംബോയില്‍ നടക്കുന്ന ട്വന്റി-20 മത്സരമാകും ദില്‍ഷന്റെ അവസാന അന്താരാഷ്ട്ര ഇന്നിങ്സ്.

1999ല്‍ അരങ്ങേറ്റം കുറിച്ച ദില്‍ഷന്‍ 2009ല്‍ സ്ഥിര ഓപ്പണറായി സ്ഥാനക്കയറ്റം കിട്ടിയതോടെ മിന്നുന്ന പ്രകടനങ്ങള്‍ പുറത്തെടുത്ത് തുടങ്ങിയത്. ഓസീസിനെതിരായ ഏകദിന പരമ്പര തുടങ്ങുന്നതിന് മുന്നോടിയായി മുഖ്യ സെലക്ടറും മുന്‍ ഓപ്പണറുമായ സനത് ജയസൂര്യയുമായി ദില്‍ഷന്‍ കൂടിക്കാഴ്ച നടത്തിയിരുന്നു. വിരമിക്കണമെന്ന സെലക്ടര്‍മാരുടെ നിര്‍ദേശത്തോട് വിയോജിപ്പ് പ്രകടിപ്പിച്ച ദില്‍ഷന്‍ പിന്നീട് നിലപാട് മാറ്റുകയായിരുന്നു.

കഴിഞ്ഞവര്‍ഷം ഏകദിനങ്ങളില്‍ നിന്ന് 1207 റണ്‍സ്  അടിച്ചുകൂട്ടിയ ദില്‍ഷന്‍ മികച്ച ഫോമിലാണെങ്കിലും സെലക്ടര്‍മാരുടെ നിര്‍ബന്ധമാണ് വിരമിക്കല്‍ തീരുമാനത്തിന് പിന്നില്‍. 2019 ലോകകപ്പ് ലക്ഷ്യമിട്ട് ടീമിനെ വാര്‍ത്തെടുക്കുന്ന പ്രക്രിയയിലാണ് സെലക്ടര്‍മാരും നായകന്‍ ഏയ്ഞ്ചലോ മാത്യൂസും. കഴിഞ്ഞ ട്വന്റി-20 ലോകകപ്പില്‍ ലങ്കയുടെ ഏറ്റവും മികച്ച റണ്‍ വേട്ടക്കാരനായിരുന്ന ദില്‍ഷന്‍ ടീമിലെ മികച്ച ഫീല്‍ഡര്‍മാരിലൊരാള്‍ കൂടിയാണ്. ഏകദിനങ്ങളിലും ട്വന്റി-20യിലും പന്ത് വിക്കറ്റ് കീപ്പറുടെ തലയ്ക്ക് മുകളിലൂടെ അടിച്ചകറ്റുന്ന ദില്‍ഷന്‍ സ്കൂപ്പ് എന്നൊരു ഷോട്ട് തന്നെ അവതരിപ്പിച്ച് ദില്‍ഷന്‍ ശ്രദ്ധേയനായിരുന്നു.