ന്യൂസിലാന്‍ഡിനെതിരെ പൂജ്യത്തിന് പുറത്തായാലും കോലിക്ക് ലോകറെക്കോര്‍ഡ്

മുംബൈ: ഏകദിന കരിയറില്‍ പുതിയ നാഴികക്കല്ല് പിന്നിടാനൊരുങ്ങി ഇന്ത്യന്‍ നായകന്‍ വിരാട് കോലി. ഞാറാഴ്ച്ച ന്യൂസിലാന്‍ഡിനെതിരായ മത്സരത്തോടെ ഏകദിനത്തില്‍ 200 മത്സരങ്ങള്‍ തികയ്ക്കുന്ന കോലിയെ കാത്തിരിക്കുന്നത് അപൂര്‍വ്വ റെക്കോര്‍ഡ്. പൂജ്യത്തിന് പുറത്തായാലും 200 മത്സരങ്ങളില്‍ കൂടുതല്‍ റണ്‍സ് നേടിയ താരമെന്ന റെക്കോര്‍ഡ് കോലിയുടെ പേരിലാകും. 200 ഏകദിനങ്ങളില്‍ നിന്ന് 8,621 റണ്‍സ് നേടിയ ഡിവില്ലേഴ്സിന്‍റെ പേരിലാണ് നിലവിലെ റെക്കോര്‍ഡ്. 

199 മത്സരങ്ങളില്‍ നിന്നായി 8,767 റണ്‍സുമായി ഇന്ത്യന്‍ നായകന്‍ റണ്‍വേട്ടയില്‍ ഡിവില്ലേഴ്സിനെ ഇതിനകം പിന്നിലാക്കിയിട്ടുണ്ട്. രണ്ടും മൂന്നും സ്ഥാനങ്ങളിലുള്ള ഇന്ത്യന്‍ ഇതിഹാസങ്ങളായ ഗാംഗുലിയെയും സച്ചിനെയും കോലി മറികടന്നാല്‍ അതും നാഴികക്കല്ലാകും. ഏകദിനത്തില്‍ 200 മത്സരങ്ങല്‍ തികയ്ക്കുന്ന 14-ാംമത്തെ ഇന്ത്യനും 72-ാംമത്തെ താരവുമാണ് കോലി. സെഞ്ചുറിവേട്ടയില്‍ 30 ഏകദിന സെഞ്ചുറികളുമായി ഓസീസ് ഇതിഹാസം റിക്കി പോണ്ടിംഗിനോടൊപ്പം രണ്ടാമതുണ്ട് വിരാട് കോലി.