ഇ-ബേ വൈന്‍ വില്‍പ്പന തുടങ്ങി

പ്രമുഖ ഓണ്‍ലൈന്‍ ഷോപ്പിംഗ് സൈറ്റായ ഇ-ബേ വൈന്‍ വില്‍പ്പന തുടങ്ങി. സിലിക്കണ്‍വാലി ആസ്ഥാനമാക്കി പ്രവര്‍ത്തിക്കുന്ന ഇ-ബേ അമേരിക്കന്‍ ഐക്യനാടുകളില്‍ മാത്രമായിരിക്കും വൈന്‍ കച്ചവടം നടത്തുക, വൈന്‍ പ്രേമികള്‍ക്ക് പുറമേ വൈന്‍ മൊത്ത വ്യാപരികളെയും ഇ-ബേ ലക്ഷ്യമിടുന്നുണ്ട്. വൈനുകള്‍ അവ ഉത്പാദിപ്പിക്കുന്ന സ്ഥലം, ഉപയോഗിക്കുന്ന അസംസ്കൃത വസ്തുക്കള്‍ എന്നിവയുടെ അടിസ്ഥാനത്തില്‍ വാങ്ങാം എന്നതും ഇ-ബേ വൈന്‍ സൈറ്റിന്‍റെ പ്രത്യേകതയാണ്.

നിങ്ങളുടെ പെര്‍ഫെക്ട് ബോട്ടില്‍ കണ്ടുപിടിക്കാനുള്ള ഏറ്റവും നല്ല മാര്‍ഗ്ഗമാണ് ഇ-ബേ എന്നാണ് ഇത് സംബന്ധിച്ച് ഇ-ബേ സൈറ്റ്  മാനേജര്‍ അലീസ സ്റ്റീല പറയുന്നു. ഡ്രിന്‍ക് എന്ന പേരിലുള്ള മദ്യം തേടാനുള്ള മൊബൈല്‍ ആപ്പുമായും ഇ-ബേ വൈന്‍ കച്ചവടത്തില്‍ ചങ്ങാത്തം കൂടുന്നു എന്നത് വലിയ വരവേല്‍പ്പ് പുതിയ കച്ചവടത്തിന് കിട്ടും എന്നാണ് ഇ-ബേ പ്രതീക്ഷിക്കുന്നത്. അടുത്തിടെ തുടങ്ങിയ ആമസോണിന്‍റെ വൈന്‍ ഷോപ്പിന് വെല്ലുവിളി ഉയര്‍ത്തുക എന്നതാണ് പുതിയ വൈന്‍ ഷോപ്പിലൂടെ ഇ-ബേ ലക്ഷ്യമിടുന്നത്.