ഉത്തരേന്ത്യയെയും ദക്ഷിണേന്ത്യയെയും ബന്ധിപ്പിക്കുന്ന പുതിയ ട്രെയിൻ സര്‍വീസുമായി റെയിൽവേ; ബെംഗളൂരു - ഋഷികേശ് സ‍‍ര്‍വീസ് ജൂൺ 19ന് ആരംഭിക്കും

ഉത്തരാഖണ്ഡ് സന്ദർശിക്കാൻ ആഗ്രഹിക്കുന്ന യാത്രക്കാർക്ക് ഏറെ ​ഗുണകരമാകുന്ന സര്‍വീസാണ് ആരംഭിക്കുന്നത്. 

ബെം​ഗളൂരു: കർണാടകയിലെ ബെംഗളൂരുവിനും ഉത്തരാഖണ്ഡിലെ ഋഷികേശിനുമിടയിൽ ആദ്യമായി നേരിട്ട് സർവീസ് ആരംഭിക്കാൻ ഇന്ത്യൻ റെയിൽവേ. 2025 ജൂൺ 19ന് ട്രെയിൻ സർവീസ് ആരംഭിക്കും. ട്രെയിൻ നമ്പർ 06597/06598 എന്ന് നാമകരണം ചെയ്തിരിക്കുന്ന ഈ സർവീസ് ഉത്തരാഖണ്ഡ് സന്ദർശിക്കാൻ ആഗ്രഹിക്കുന്ന യാത്രക്കാർക്ക് ഏറെ ​ഗുണകരമാകും. ഉത്തരേന്ത്യൻ സംസ്ഥാനങ്ങളെ ദക്ഷിണേന്ത്യൻ സംസ്ഥാനങ്ങളുമായി ബന്ധിപ്പിക്കുന്നതിന് ഇത് സഹായിക്കുകയും ചെയ്യും.

യശ്വന്ത്പൂർ-ഋഷികേശ് എക്സ്പ്രസ് സ്പെഷ്യൽ (06597) ജൂൺ 19, 26, ജൂലൈ 3 തീയതികളിൽ രാവിലെ 7 മണിക്ക് ബെംഗളൂരുവിലെ യശ്വന്ത്പൂരിൽ നിന്ന് പുറപ്പെട്ട് പിറ്റേന്ന് രാവിലെ 10:20 ന് ഋഷികേശിൽ എത്തിച്ചേരും. ട്രെയിൻ നമ്പർ 06598 ജൂൺ 21, 28, ജൂലൈ 5 തീയതികളിൽ വൈകുന്നേരം 5:55 ന് ഋഷികേശിൽ നിന്ന് പുറപ്പെട്ട് അടുത്ത ദിവസം വൈകുന്നേരം 7:45 ന് യശ്വന്ത്പൂരിൽ തിരിച്ചെത്തും. നാഗ്പൂർ, ഭോപ്പാൽ, ആഗ്ര, ഹരിദ്വാർ തുടങ്ങിയ പ്രധാന നഗരങ്ങളിലൂടെയാണ് ട്രെയിൻ സഞ്ചരിക്കുക.

എസി ഫസ്റ്റ് ക്ലാസ്, എസി 2 ടയർ, എസി 3 ടയർ, സ്ലീപ്പർ ക്ലാസ്, ജനറൽ അൺറിസർവ്ഡ് കോച്ചുകൾ എന്നിവയുൾപ്പെടെ വ്യത്യസ്ത യാത്രക്കാർക്ക് അനുയോജ്യമായ നിരവധി സൗകര്യങ്ങൾ ഈ ട്രെയിൻ വാഗ്ദാനം ചെയ്യുന്നുണ്ട്. ഓൺബോർഡ് കാറ്ററിംഗ് സേവനങ്ങളും ഇ-കാറ്ററിംഗ് ഓപ്ഷനുകളും ട്രെയിനിൽ ലഭ്യമാകും. യാത്രക്കാർക്ക് മനോഹരമായ കാഴ്ചകൾ ആസ്വദിക്കാനായി വലിയ ജനാലകളാണ് നൽകിയിരിക്കുന്നത്.

മണിക്കൂറിൽ 130 കിലോമീറ്ററായിരിക്കും ട്രെയിനിന്റെ പരമാവധി വേ​ഗത. യശ്വന്ത്പൂർ-ഋഷികേശ് എക്സ്പ്രസ് സ്പെഷ്യലിനുള്ള ടിക്കറ്റുകൾ ഇന്ത്യൻ റെയിൽവേയുടെ ഔദ്യോഗിക വെബ്സൈറ്റ് വഴിയോ റെയിൽവേ ടിക്കറ്റ് കൗണ്ടറുകളിലോ ബുക്ക് ചെയ്യാം.