'ഹീറോ ഡാ'; വടിയൂന്നി പ്ലാറ്റ്ഫോമിലേക്ക് കയറി വൃദ്ധ ഓടിത്തുടങ്ങിയ വണ്ടിക്ക് കൈ നീട്ടി, ട്രെയിൻ നിന്നു, വീഡിയോ

മുംബൈ നഗരത്തിൽ പ്ലാറ്റ്‌ഫോമിൽ നിന്നും നീങ്ങിത്തുടങ്ങിയ ട്രെയിൻ പ്രായമായ ഒരു സ്ത്രീക്ക് കയറുന്നതിനായി ലോക്കോ പൈലറ്റ് നിർത്തിക്കൊടുത്തു. ഈ ദൃശ്യങ്ങൾ സമൂഹ മാധ്യമങ്ങളിൽ വൈറലായി. ലോക്കോ പൈലറ്റിനെ യഥാർത്ഥ ജീവിതത്തിലെ നായകനെന്ന് വിശേഷിപ്പിക്കുകയും ചെയ്തു,

തിരക്കുപിടിച്ച മുംബൈ നഗരത്തിൽ മനുഷ്യത്വത്തിന്‍റെ കരുണാർദ്രമായ ഒരു കാഴ്ച സമൂഹ മാധ്യമങ്ങളിൽ തരംഗമാകുന്നു. പ്ലാറ്റ്‌ഫോമിൽ നിന്നും ഓടിത്തുടങ്ങിയ ട്രെയിൻ, പ്രായമായ ഒരു സ്ത്രീക്ക് സുരക്ഷിതമായി കയറുന്നതിനായി ലോക്കോ പൈലറ്റ് നിർത്തിക്കൊടുത്തതാണ് ഇപ്പോൾ എല്ലാവരുടെയും കൈയടി നേടുന്നത്. വീഡിയോ ഗ്രാഫറായ ഓം ത്രിപാഠിയാണ് ഈ ദൃശ്യങ്ങൾ പകർത്തിയത്.

ട്രെയിനിന് കൈ നീട്ടിയ വൃദ്ധ

ഊന്നുവടിയുടെ സഹായത്തോടെ നടന്നു വരുന്ന ഒരു വയോധിക, പ്ലാറ്റ്‌ഫോമിൽ നിന്നും നീങ്ങിത്തുടങ്ങിയ ട്രെയിനിൽ കയറാൻ ശ്രമിക്കുന്നത് വീഡിയോയിൽ കാണാം. സാധാരണഗതിയിൽ മുംബൈ ലോക്കൽ ട്രെയിനുകൾ നിശ്ചിത സമയക്രമം പാലിക്കുന്നതിനാൽ ഒരിക്കൽ എടുത്തുതുടങ്ങിയാൽ നിർത്താറില്ല. എന്നാൽ, ആ സ്ത്രീയുടെ അവസ്ഥ മനസ്സിലാക്കിയ ലോക്കോ പൈലറ്റ് ഉടൻ തന്നെ ട്രെയിനിന്റെ വേഗത കുറയ്ക്കുകയും നിർത്തുകയും ചെയ്തു. അവർ സുരക്ഷിതമായി അകത്ത് കയറിയെന്ന് ഉറപ്പുവരുത്തിയ ശേഷമാണ് ട്രെയിൻ പിന്നീട് യാത്ര തുടർന്നത്. "മനുഷ്യത്വം ഇന്നും നിലനിൽക്കുന്നു" എന്ന അടിക്കുറിപ്പോടെ പങ്കുവെച്ച ഈ വീഡിയോ ഇതിനോടകം 14 ലക്ഷത്തിലധികം ആളുകൾ കണ്ടുകഴിഞ്ഞു. "ഇതൊരു ട്രെയിൻ നിർത്തൽ മാത്രമല്ല, സഹജീവികളോടുള്ള കരുണ ഇന്നും ഉണ്ട് എന്നതിന്റെ തെളിവാണ്" എന്ന് വീഡിയോയുടെ അടിക്കുറിപ്പിൽ പറയുന്നു.

യഥാർത്ഥ ജീവിതത്തിലെ നായകൻ

മുംബൈ പോലുള്ള ഒരു മഹാനഗരത്തിൽ, ഒരു ഡ്രൈവർ കാണിച്ച ഈ ക്ഷമയെയും കാരുണ്യത്തെയും പ്രശംസിച്ചുകൊണ്ട് നിരവധി പേരാണ് രംഗത്തെത്തുന്നത്. സംഭവത്തെക്കുറിച്ച് ഒരു ഉപയോക്താവ് കുറിച്ചത് ഇങ്ങനെയാണ്: "ഇത് പാൽഘർ റെയിൽവേ സ്റ്റേഷനാണ്. ആ ട്രെയിൻ അന്ന് അവിടെനിന്ന് പോയിരുന്നെങ്കിൽ അടുത്ത രണ്ട് മണിക്കൂർ നേരത്തേക്ക് വേറെ ട്രെയിൻ ഉണ്ടാകുമായിരുന്നില്ല. ആ ലോക്കോ പൈലറ്റിനോട് വലിയ ബഹുമാനം തോന്നുന്നു." സമയക്രമം തെറ്റിക്കാതെ ഓടുക എന്നതിനേക്കാൾ സഹജീവികളോടുള്ള, യാത്രക്കാരോടുള്ള കരുണയ്ക്ക് മുൻഗണന നൽകിയ ആ ഡ്രൈവറെ സമൂഹ മാധ്യമ ഉപയോക്താക്കൾ "യഥാർത്ഥ ജീവിതത്തിലെ നായകൻ" എന്നാണ് വിശേഷിപ്പിക്കുന്നത്.