
തിരുവനന്തപുരം: മിക്ക ആളുകൾക്കും കിഴക്കൻ ഹിമാലയൻ മലനിരകളിൽ മാത്രം കാണപ്പെടുന്ന, അധികമാർക്കും അറിയാത്ത ഒരു കുഞ്ഞൻ ഉഭയജീവി മാത്രമാണ് 'ഹിമാലയൻ സലാമാൻഡർ' (Himalayan Salamander). എന്നാൽ ഡോ. ബർഖ സുബ്ബയെ സംബന്ധിച്ചിടത്തോളം അതൊരു ജീവിവർഗ്ഗം മാത്രമല്ല; പ്രകൃതി അപ്രത്യക്ഷമാകുമ്പോൾ മുഴുവൻ ആവാസവ്യവസ്ഥകളും (അവയെ ആശ്രയിച്ചു കഴിയുന്ന മനുഷ്യസമൂഹങ്ങളും) ഇല്ലാതാകാൻ തുടങ്ങുമെന്നതിന്റെ വലിയൊരു ഓർമ്മപ്പെടുത്തലാണ്.
'ജീവിക്കുന്ന ഫോസിൽ' (Living Fossil) എന്നറിയപ്പെടുന്ന ഈ അപൂർവ്വ ജീവിയെയും അവയുടെ ആവാസവ്യവസ്ഥയായ പർവ്വത തണ്ണീർത്തടങ്ങളെയും സംരക്ഷിക്കാനുള്ള പോരാട്ടത്തിന് ഈ വർഷം പരിസ്ഥിതി രംഗത്തെ 'ഗ്രീൻ ഓസ്കാർ' എന്നറിയപ്പെടുന്ന വിറ്റ്ലി അവാർഡ് 2026 (Whitley Award 2026) നേടി രാജ്യത്തിന് അഭിമാനമായിരിക്കുകയാണ് ഡോ. ബർഖ സുബ്ബ. ജൈവവൈവിധ്യത്തിന്റെ ഈ വിസ്മയകഥകളും തന്റെ സംരക്ഷണ അനുഭവങ്ങളും പങ്കുവെക്കാൻ ഡോ. ബർഖ സുബ്ബ തിരുവനന്തപുരത്തേക്ക് എത്തുകയാണ്. നവംബർ 27, 28, 29 തീയതികളിൽ കനകക്കുന്ന് പാലസിൽ ഏഷ്യാനെറ്റ് ന്യൂസ് സംഘടിപ്പിക്കുന്ന ആശയങ്ങളുടെ മഹാസംഗമമായ ‘അഗോറ 2026’ (AGORA 2026) വേദിയിലാണ് അവർ അതിഥിയായി എത്തുന്നത്.
ഡാർജിലിംഗ് കുന്നുകളുടെ മടിത്തട്ടിൽ ജനിച്ച് വളർന്ന ബർഖയുടെ മനസ് നിറയെ കുട്ടിക്കാലത്ത് മുത്തശ്ശി പറഞ്ഞുകൊടുത്ത പർവ്വതങ്ങളുടെയും വന്യജീവികളുടെയും കഥകളായിരുന്നു. കാട്ടിൽ ഭക്ഷണവും മറ്റും ശേഖരിക്കാൻ നടത്തിയിരുന്ന യാത്രകളാണ് പ്രകൃതിയോടുള്ള അവരുടെ പ്രണയത്തിന് അടിത്തറയിട്ടത്. "ഒരു കൺസർവേഷൻ സയന്റിസ്റ്റ് ആകണമെന്ന് ഞാൻ സ്വപ്നം കണ്ടിരുന്നില്ല. ഞാൻ എന്റെ ജിജ്ഞാസയെ പിന്തുടരുക മാത്രമാണ് ചെയ്തത്" എന്നാണ് ബർഖ പുഞ്ചിരിയോടെ ഓർക്കുന്നത്.
കുടുംബത്തിലെ ആദ്യ ബിരുദാനന്തര ബിരുദധാരിയാണ് ബർഖ. ജന്തുശാസ്ത്രത്തിൽ (Zoology) ബിരുദാനന്തര ബിരുദം നേടിയ ശേഷമാണ് ഗവേഷണത്തിനായി പത്മജ നായിഡു ഹിമാലയൻ സുവോളജിക്കൽ പാർക്കിൽ ചേരുന്നത്. അവിടെ വെച്ചാണ് മഴക്കാലത്ത് മാത്രം പുറത്തുവരികയും വർഷത്തിന്റെ ബാക്കി സമയം മണ്ണിനടിയിൽ ഒളിച്ചിരിക്കുകയും ചെയ്യുന്ന, നാണംകുണുങ്ങിയായ ഹിമാലയൻ സലാമാൻഡറുകളിൽ അവർക്ക് കൗതുകം ജനിച്ചത്. പിന്നീട് ബെംഗളൂരുവിലെ പ്രശസ്തമായ 'അട്രീ'യിൽ (ATREE) നിന്ന് കൺസർവേഷൻ സയൻസ് ആൻഡ് സസ്റ്റൈനബിലിറ്റി സ്റ്റഡീസിൽ പിഎച്ച്ഡിയും കരസ്ഥമാക്കി.
നിലവിൽ ഡാർജിലിംഗിലെ പരിസ്ഥിതി സംരക്ഷണ രംഗത്തെ സന്നദ്ധ സംഘടനയായ ഫോസെപ്പിലെ (FOSEP - Federation of Societies for Environmental Protection) കൺസർവേഷൻ സയന്റിസ്റ്റായി പ്രവർത്തിക്കുകയാണ് ഡോ. ബർഖ സുബ്ബ. ഒരു പതിറ്റാണ്ടിലേറെയായി കിഴക്കൻ ഹിമാലയൻ മേഖലയിലെ ശാസ്ത്രം, പ്രാദേശിക സമൂഹങ്ങൾ, നയരൂപീകരണ ഇടപെടലുകൾ എന്നിവയെ തമ്മിൽ ബന്ധിപ്പിക്കുന്ന പാലമായി അവർ പ്രവർത്തിക്കുന്നു.
കോവിഡ് മഹാമാരിയുടെ കാലത്ത് ഡാർജിലിംഗിലെ വേൾഡ് വൈഡ് ഫണ്ട് ഫോർ നേച്ചറിനൊപ്പം (WWF) പ്രവർത്തിക്കാൻ തുടങ്ങിയ ബർഖ, പിന്നീട് ഹിമാലയൻ സലാമാൻഡറുകളെ കേന്ദ്രീകരിച്ച് പ്രാദേശിക സമൂഹത്തിന്റെ നേതൃത്വത്തിലുള്ള ഒരു വിപുലമായ സംരക്ഷണ പദ്ധതിക്ക് തുടക്കമിട്ടു. ശാസ്ത്രം കൊണ്ട് മാത്രമല്ല, വിശ്വാസം, കൂട്ടായ ഉടമസ്ഥത, ജനപങ്കാളിത്തം എന്നിവയിലൂടെയും പ്രകൃതി സംരക്ഷണം വിജയിപ്പിക്കാൻ കഴിയുമെന്ന് അവർ തെളിയിച്ചു. ഇന്ന് തേയിലത്തോട്ടം തൊഴിലാളികൾ, ഗ്രാമീണർ, വിദ്യാർത്ഥികൾ, വനംവകുപ്പ് ഉദ്യോഗസ്ഥർ എന്നിവരെല്ലാം സലാമാൻഡറുകൾ പ്രജനനം നടത്തുന്ന തണ്ണീർത്തടങ്ങൾ സംരക്ഷിക്കുന്നതിൽ സജീവ പങ്കാളികളാണ്.
‘ഗ്രീൻ ഓസ്കാർ’ തിളക്കം
പരിസ്ഥിതി ശാസ്ത്രം (Ecology), സ്പേഷ്യൽ മോഡലിംഗ്, സമൂഹാധിഷ്ഠിത സംരക്ഷണം എന്നിവ സംയോജിപ്പിച്ചുകൊണ്ടുള്ള ബർഖയുടെ പ്രവർത്തനങ്ങളാണ് അവരെ 2026-ലെ വിറ്റ്ലി അവാർഡിന് അർഹയാക്കിയത്. ഡാർജിലിംഗിലെ ഏഴ് പ്രധാന പ്രജനന കേന്ദ്രങ്ങളിലെ പർവ്വത തണ്ണീർത്തടങ്ങളുടെ പുനഃസ്ഥാപനത്തിനും, അധിനിവേശ ജീവികളുടെ നിയന്ത്രണത്തിനും, ഉഭയജീവികളെ ബാധിക്കുന്ന രോഗങ്ങൾ നിരീക്ഷിക്കുന്നതിനും വിറ്റ്ലി പുരസ്കാരത്തിലൂടെ ലഭിച്ച അന്താരാഷ്ട്ര ശ്രദ്ധയും സാമ്പത്തിക സഹായവും ഡോ. ബർഖ സുബ്ബ വലിയ കരുത്തായി മാറിയിട്ടുണ്ട്.
അഗോറ 2026-ൽ പങ്കെടുക്കാം, സൗജന്യമായി!
നഗരവൽക്കരണവും കാലാവസ്ഥാ വ്യതിയാനവും നമ്മുടെ ആവാസവ്യവസ്ഥകളെ എങ്ങനെ ബാധിക്കുന്നുവെന്നും, പ്രാദേശിക സമൂഹങ്ങളെ ചേർത്തുപിടിച്ച് എങ്ങനെ പ്രകൃതിയെ വീണ്ടെടുക്കാമെന്നും ഡോ. ബർഖ സുബ്ബ അഗോറ 2026 വേദിയിൽ സംസാരിക്കും.
ജൈവവൈവിധ്യ ലോകത്തെ വിസ്മയങ്ങളെക്കുറിച്ച് അടുത്തറിയാനും, ലോകപ്രശസ്തരായ ചിന്തകരോടും ശാസ്ത്രജ്ഞരോടും സംവദിക്കാനും നവംബർ 27, 28, 29 തീയതികളിൽ തിരുവനന്തപുരം കനകക്കുന്ന് പാലസിൽ നടക്കുന്ന ഏഷ്യാനെറ്റ് ന്യൂസ് അഗോറ 2026-ലേക്ക് നിങ്ങൾക്കും എത്താം. പരിപാടിയിലേക്ക് പ്രവേശനം പൂർണ്ണമായും സൗജന്യമാണ്. പങ്കെടുക്കാൻ താൽപ്പര്യമുള്ളവർ agora.asianetnews.in എന്ന വെബ്സൈറ്റ് വഴി മുൻകൂട്ടി രജിസ്റ്റർ ചെയ്യേണ്ടതാണ്.
ആശയങ്ങളുടെ ഉത്സവം- അഗോറയില് രജിസ്റ്റര് ചെയ്യാൻ ഇവിടെ ക്ലിക് ചെയ്യുക